Ekadimwelo Lo Wembola Anyu

◼ Ɛlɔlɔ akɔna wakondjaso lo mbɔtɔka sanganya l’etshumanelo kele l’ɛtshi ka nkɛtɛ kodjashiso?

Oma lo tɛdikɔ tɔsama l’etshumanelo, sho nongolaka ekeketshelo ‘katotshutshuya lo ngandji ndo l’elimu w’ɔlɔlɔ.’ (Heb. 10:​24, 25) Lo tshimbo y’etshumanelo mbekaso akambo wa mɛtɛ ndo mbalongolaso dihomɔ diatokimanyiya dia kotsha ɔkɛndɛ aso wa mbetɛ anto ambeki. (Mat. 28:​19, 20) Sho keketshamaka nto dia mbikikɛ ehemba la kɔlamelo tshɛ ndo tekɔ l’emendji woludi la ngandji watokimanyiya dia sho ndɔshana l’ekakatanu ndo l’ekiyanu. Lo mɛtɛ, etshumanelo kekɔ ohomba efula dikambo di’ekokelo kaso ka lo nyuma. Ko onde mbɔtɔka nsanganya l’etshumanelo kele l’ɛtshi ka nkɛtɛ kodjashiso ekɔ l’ɛlɔlɔ ɛmɔtshi?

Awui wele l’onto l’onto tshikitana, ndo akambo wele oko olimu wa l’emunyi, olonganyi wele bu ombetawudi, ndo ofutelo wa mituka mbeyaka monga la shɛngiya lo yɛdikɔ yɔsa onto lo kɛnɛ kendana l’etshumanelo kahombande mbɔtɔka nsanganya. Koko, ekɔ ɛlɔlɔ wa lo nyuma ndo wa weho ekina wakoka onto kondja naka nde mbɔtɔka nsanganya l’etshumanelo kele l’ɛtshi ka nkɛtɛ kodjashinde. Dikumanyi mbeyaka monga l’akoka wa komɛ apandjudi tshɛ esadi w’efula etena katomba akambo amɔtshi wa wanyandja. Ekadimwelo lo Wembola Anyu wa l’ɛnɔnyi wakete mɛnyaka ɛlɔlɔ ekina wakoka onto kondja.​—⁠Ngɔndɔ ka Dikumi l’Ɔtɔi 1991.

Ekɔ dimɛna efula mbɔtɔka nsanganya l’etshumanelo kele suke la so, dia sho monga la diaaso dia komaka la wonya dia sho sawolaka l’anto akina, mboka sso l’awui amɔtshi w’ohomba ndo monga lam’asalema dɔmbɛlɔ ndo wembama osambo wa ndjihwelo. Naka anto amɔtshi weke esadi wa ndjasha l’akambo wa mɛtɛ mbidjasɛ suke la so, kete tayonga l’akoka wa mbaembolaka, mbeka la wɔ Bible, ndo mbalɔmbɔla otsha l’etshumanelo kahanganyi la wɔ etale.

Tekɔ l’eshikikelo dia ewandji wa nkumbo wayɔsɛdingola dikambo nɛ lo dɔmbɛlɔ, lo mbɛdika akambo tshɛ wakoka mbakimanyiya dia shikikɛ kɛnɛ koleki dimɛna dikambo dia yônge ya lo nyuma ndo ya lo demba ya nkumbo yawɔ.​—⁠1 Tim. 5:⁠8.