Onde wɛ ekɔ lo tônɔ?

Naka eelo, kete ekɔ akambo efula wahombayɛ wɛ ndo wanɛ wayonɔ kâmɛ la yɛ takanyi yimba la ntondo. Naka nyu ndjela awui anɛ wotɛnyishawɔ l’ɛse, kete hanyototshimbatshimba dia mbekesanɛ l’etshumanelo kanyu k’oyoyo.

(1) Naka wɛ ambeya dihole diatayatshu, sekeletɛlɛ ka l’etshumanelo kɛnɛ kakiyɛ ayokoka kondja adrɛsɛ wa Mbalasa ka Diolelo k’etshumanelo kayɛ k’oyoyo. Kam’akomɛ l’ɛtshi ka nkɛtɛ kele etshumanelo kakɔ, yanga lɛnɛ ele mbalasa ndo ntsha tshɛ dia mbeya wenya wasalema nsanganya ya l’etshumanelo. Naka tshumanelo efula nsanganaka lo Mbalasa ka Diolelo kakɔ, mbola dikumanyi dia mbeya l’ɛtshi ka nkɛtɛ k’etshumanelo kakɔna kodjashiyɛ. Totshimbatshimbake dia tatɛ ntshɔ lo nsanganya ndo mbekesanɛ la dikumanyi dia l’etshumanelo.

(2) Sekeletɛlɛ ka l’etshumanelo kakiyɛ ntondo la ka lɛnɛ ayayɛ wayokamba kâmɛ lo kɛnɛ kendana l’otomelo wa fishi kayɛ k’opandjudi wa l’etshumanelo ndo y’ase nkumbo kayɛ. Wayotomɛ dikumanyi mukanda wa vɔ ndjokolowola la ntondo k’etshumanelo kayɛ k’oyoyo. (Enda lo mukanda wa Ngɔndɔ ka Samalo 1999, wakawatomɛ elui tshɛ wa dikumanyi ndo lo kiombo yele l’ɔtɛ a dui ɔnɛ Ekadimwelo lo Wembola Anyu, ya l’Olimu Aso wa Diolelo wa Ngɔndɔ k’Esambele 1991. Kɔmite k’Olimu ka l’Etshumanelo kayayɛ pombaka mbewoya ɔnɔmbɔdi a wekelo wa dibuku ɔmɔtshi lo kɛnɛ kendana l’oyelo ayɛ dia nde sawola la yɛ ko kewoya l’olui akɔna wayoyonga.​—⁠Romo 15:⁠7.

(3) Apandjudi tshɛ wa l’etshumanelo kayɛ k’oyoyo wekɔ l’olimu w’ɔngɛnɔngɛnɔ wahombawɔ ntsha​—⁠olimu wa mbekesanɛ la yɛ ndo wɛ mboka dia wɛ mɛtɛ ambolongɔma dimɛna. (Enda lo 3 Joani 8.) Lâsɔ wɛ pombaka monga lo nsanganya dia keketshanya kâmɛ l’ananyɔ ndo l’akadiyɛ.

(4) Wɛ hahombe konga dia paka elimu tshɛ wendana la wonwelo ayɛ wamboshila ko wɛ ndjomɛ tomba l’esambishelo l’apandjudi wa l’etshumanelo kayɛ k’oyoyo. Naka wɛ mbetsha wahɔ wa Diolelo la ntondo, kete akambo akina tshɛ wayeta dimɛna ndo wɛ ayokeketshama efula lo dihole di’oyoyo diayayɛ. (Mat. 6:33) Lam’ayoyoshikimala lo luudu layɛ l’oyoyo, ondo wɛ ayolanga mbelɛ ase etshumanelo amɔtshi dia vɔ ndjokenda dia nyu mbeya mbekesanɛ dimɛna.​—⁠Romo 12:13b.

Monɔ kema yana ya dikambo. Ko naka onto tshɛ lendana la dikambo sɔ ayotsha kɛnɛ kalɔmbama, kete ndoko wale wa lo nyuma wayonga. Wanɛ tshɛ watonɔ wayamba dia mɛna ngandji kaso k’Akristo k’onto l’ɔnango.