Tosangane Kâmɛ dia Tombola Jehowa
1. Losanganya la Distrikɛ layonga l’ɔtɛ a dui akɔna, ndo lande na kasungana Jehowa tombɔma?
1 Jehowa mbele Nzambi kele la nkudu koleki tshɛ, Nzambi koludi la lomba, Nzambi ka losembwe, ndo loto lande ndola la ngandji. Oko wende otungi, Lashana Lɔsɛnɔ, ndo Omboledi waheme lâdiko dia tshɛ, ndamɛ mbakoka nongola lotombo laso. (Osam. 36:9; Eny. 4:11; 15:3, 4) Losanganya laso la Distrikɛ l’ɔnɔnyi ɔnɛ lele l’ɔtɛ a dui ɔnɛ: “Tosha Nzambi Lotombo” layokeketsha eshikikelo kaso ka mbotombolaka oko Nzambi kâmɛ ka mɛtɛ.—Osam. 86:8-10.
2, 3. Woho akɔna wayotokimanyiya ɔlɔngɔswɛlɔ w’ɔlɔlɔ dia kondja wahɔ efula?
2 Ɔlɔngɔswɛlɔ wa Dimɛna Wekɔ Ohomba: Dia sho kondja wahɔ lo dambo diambotɔlɔngɔswɛ Jehowa sɔ, ekɔ ohomba efula sho tayalɔngɔsɔdi ntondo. (Ef. 5:15, 16) Onde wɛ amboshidiya ɛlɔngɔswɛlɔ ayɛ wa tokondja dihole dia ndala, futa mutuka, ndo nɔmba dikimɔ l’olimu kana lo kalasa? Aha wɛ ndjokana yimba l’awui w’ohomba asɔ paka naka losanganya laya ka suke. Naka wɛ ayotshimbatshimba dia nɔmba dikimɔ, kete wɛ mbeyaka ndjohomba awui amɔtshi wa lo diaaso di’ɔngɛnɔngɛnɔ sɔ. L’ɔkɔngɔ wa mbidja welo dia tɔtɔ lo losanganya la distrikɛ, hatokoke mbetawɔ dia kânga dikambo ɔtɔi mbidja wekamu lo wahɔ wahombaso kondja oma l’ekongelo k’otondo. Ekɔ awui ahende wakoka tofutanya di’aha sho ndjela ekongelo ka losanganya l’otondo dimɛna. Dui dimɔtshi ele wodjaselo wa lo sɛkɛ, aha l’okombɔ ɔmɔtshi wakoka tokokɛ oma l’esase wa yanyi, ndo dui dikina ele mvula koka ndɔ mbala mɔtshi la shashimuya. Lam’ohɔso dikambo sɔ, tambɔlɔmba dia nkumbo tshɛ mbela akombe awɔ, wayowakimanyiya dia ndjela ekongelo dimɛna ayodi kânga akambo asɔ kongaka. Sho tshɛ pombaka ndjela tenyi tshɛ dia losanganya.
3 Yadjɛ oyango wa komaka esadi lo dihole diasalema losanganya lushi tshɛ. Dikambo sɔ diayokokimanyiya dia wɛ kondja dihole dia mbidjasɛ ntondo k’osambo wa ndjihwelo ndo dia shikikadia yimba woho wa mpokamɛ awui watama. Kuke yayodihɔmaka lo eshidi 8:00 wa pindju lushi tshɛ. Lam’alanganyu tanyambɛke anto akina ahole wa mbidjasɛ paka ase nkumbo kanyu ato kana wanɛ wayotshɔ lanyu kâmɛ lo losanganya.
4. Lande na kalɔmbama di’onto tshɛ la l’atei aso tɔla diangɔ dia tɔlɛ la midi lo losanganya?
4 Nɔmbamaka di’onto l’onto tɔla diangɔ diande dia tɔlɛ la midi lo dihole dia totshika dihole diasalema losanganya wonya wa diomuyelo ko tshɔ dia toyanga kana tosomba diangɔ dia ndɛ. Naka nyu ndjela ɔlɔngɔswɛlɔ ɔsɔ, kete nyayokimanyiya dia wɔladi monga ndo dia nyu kondja wenya efula wa monga kâmɛ l’ambetawudi akina. (Osam. 133:1-3) Lam’alanganyu nyohɔke dia kema dimɛna mɛmbana l’alɔnga wa weke kana la wanu l’ahole wasalema losanganya.
5. Woho akɔna wakokaso tatɛ nɔngɔsɔla etema aso otsha lo losanganya?
5 Hokamɛ ndo Kondja Wetshelo: Ɛzɛra akalɔngɔsɔla otema ande lo dɔmbɛlɔ dia nongola ɔtɛkɛta wa Nzambi. (Ez. 7:10) Nde akasembola otema ande otsha lo wetshelo waki Jehowa. (Tuk. 2:2) Sho koka tatɛ nɔngɔsɔla etema aso lo kɛnɛ kendana la losanganya kânga la ntondo ka sho tshika mvudu yaso lo kana yimba l’ɔtɛ a dui wa losanganya ndo lo kɛtshanya ɔtɛ akɔ wa dui kâmɛ la nkumbo kaso.
6. Kakɔna kakoka tokimanyiya dia nama yambalo yaso lo kɛnɛ katama lo losanganya? (Enda lo kiombo.)
6 Lo dihole diotshumanyi anto efula, mbeyaka monga awui efula wakoka futanya yambalo yaso. Efutanu ɛsɔ mbeyaka mbekola yimba yaso esadi eto oma le ɔtɛkɛtshi. Naka dikambo sɔ diambotokomɛ, kete tayoshisha awui w’ohomba. Awui wele lo kiombokombo kokaka tokimanyiya dia sho nyomoleka mbidja yimba.
7, 8. Woho akɔna wakokaso nɛmiya anto akina, ndo ɔlɔngɔswɛlɔ akɔna wambosalema dia anto wahoke esadi?
7 Tonge la Dilɛmiɛlɔ Otsha le Anto Akina: Nyu mbeyaka kamba la kamɛra kana munda fɔtɔ wonya wa losanganya, koko dia mbewɔ dia futanya anto akina, nyu pombaka sala dikambo sɔ oma l’ahole wodjashinyu. Nyu pombaka sala woho waha telefɔnɛ ya l’anya futanya anto akina. Ndoko ɛngɔ ɔtɔi kaki onto kahomba kɔhama l’eshinga wa kura kana wa sɔnɔrizasiɔ wakamba lawɔ lo losanganya.
8 Tekɔ lo nongamɛ mɛtɛ dia sangana kâmɛ l’oyango wa tombola Jehowa! Tɔshi yɛdikɔ ya mbôtombola lo mbɔtɔ nshi yakɔ shato tshɛ lo losanganya, lo mpokamɛka awui watama la yambalo tshɛ, ndo lo kamba l’awui wekaso.—Euh. 31:12.
[Kiombo ya lo lɛkɛ 3]
Dia Mpokamɛ Awui wa lo Nsanganya
▪ Kana yimba l’ɛtɛ w’asawo
▪ Yanga avɛsa washama
▪ Ɔsaka nɔtɛ ya tomondo
▪ Sɔna awui wa tokamba lawɔ
▪ Vusola akambo wekayɛ