‘Nyɛsɔ Totombole Lokombo Lande Kâmɛ’
1. Diaaso diakɔna diayotokondja dia tombola lokombo la Nzambi kâmɛ, ndo akokaso sala kakianɛ dia ndjalɔngɔsɔla?
1 Omembi w’esambo akêmbe ate: ‘Nyotombolake Jehowa kâmɛ la mi, totombolake lokombo lande kâmɛ.’ (Osam. 34:3) Losanganya laso la Distrikɛ layaye lele l’ɔtɛ a dui ɔnɛ: “Tɔkɛndɛkɛndɛ la Nzambi” ayotosha diaaso dia tombola lokombo la Jehowa kâmɛ l’anɛngɛso ndo l’akadiyɛso w’oma lo tshumanelo efula. Onde wɛ amboyalɔngɔsɔla lo kɛnɛ kendana la lɛnɛ ayoyotohanga, ekolo ayɛ wa lɔkɛndɔ ndo tɔshi vakashi oma l’olimu ayɛ wa l’emunyi? Tayɛnya dia tekɔ la lomba, naka sho tendji awui asɔ la ntondo.—Tuk. 21:5.
2. Lande na kele ekɔ ohomba mbɔsa yɛdikɔ ya komaka lo dihole dia losanganya la wonya?
2 Okomelo wa lo Dihole dia Losanganya: Ekɔ awui efula wahombaso mbidja yimba lam’akongɛso wɔtwɛlɔ wa lo losanganya lɔmɔtshi la woke. Tshɔ la wonya otsha lo losanganya ayotokimanyiya diaha koma l’ɔkɔngɔ ndo dia tana ahole wa sho mbidjasɛ dia memba osambo wa ndjihwelo kâmɛ l’anto akina ndo ndjela dɔmbɛlɔ dia mbɔtwɛlɔ. (Osam. 69:30) La ntondo k’etenyi ka losanganya tatɛ, ɔnɔmbɔdi ayodjasɛ lo lɔyɛnga minitɛ ngana etena kahomama mishiki wa Diolelo wakadjama l’eshinga. Sho tshɛ pombaka mbidjasɛ l’ahole aso l’etena kɛsɔ dia losanganya tatɛ lo yoho ya dimɛna.—1 Kor. 14:33, 40.
3. Ngande wakokaso mɛnya dilɛmiɛlɔ diaso otsha le anto akina etena kayangaso ahole wa mbidjasɛ?
3 Ɔtɛkɛta wa Nzambi tɔlɔmbaka dia sho ‘ntsha akambo aso tshɛ la ngandji.’ (1 Kor. 16:14) Etena kadihɔma nkuke l’eshidi 8 wa pindju, woho wɔsaso anto akina la nɛmɔ ayotoshimba diaha sho susana kana sokɔna l’oyango wa sho todjasɛ lo dihole dialangaso la ntondo k’anto akina mbidjasɛ lo dihole diakɔ. Paka wanɛ wakaye layɛ kana wodjashi layɛ dihole ɔtɔi ato mbahombayɛ mombɛ ahole.—1 Kor. 13:5; Fil. 2:4.
4. Naa tɛdikɔ tambɔsama lo kɛnɛ kendana la wonya wa diomuyelo ndo wahɔ akɔna wele la tɛdikɔ tɔsɔ?
4 Lam’alanganyu, kanyoyake la yema ya diangɔ ya ndjɔlɛ la midi lo dihole dia ndjotshikaka dihole dia losanganya ko tshɔ toyanga diangɔ dia ndɛ wonya wa diomuyelo dia la midi. Dui sɔ diayotosha diaaso dia sawola l’anto akina kana monga kam’atatɛ etenyi ka l’ɔkɔngɔ a midi. Naka kokaka, nyu koka ndja la tɔlɔndɔ t’ashi takokanyu kitsha l’ɛse ka dihole diodjashinyu. Tanyoyake la disaka dia weke dia mbo ya ndɛ, diangɔ diakoka ndjôlɛ kana wanu lo dihole dia losanganya.
5. Yɛdikɔ yakɔna yambɔsama lo kɛnɛ kendana l’anto waya epalanga ndo wanɛ wele la dikɔmɔ kana la hemɔ?
5 Wayombɛ esombe w’anto ndo wanɛ wele la dikɔmɔ kana hemɔ ahole wa mbidjasɛ. Dui sɔ ayowakimanyiya dia vɔ mbidjasɛ dimɛna ndo mbeya ndjakokɛ oma lo mvula kana yanyi, naka kokaka. Diewoyelo diayoshama lo kɛnɛ kendana la dikambo sɔ l’etatelo k’etenyi ka ntondo.
6. Ngande wakokaso nɔngɔsɔla etema aso lo kɛnɛ kendana la wetshelo wayototolongola?
6 Dambo dia lo Nyuma Diekɔ lo Tokongɛ: Nkumekanga Jɛhɔshafata aki onto ɔmɔtshi ‘lakalɔngɔsɔla otema ande dia nyanga Nzambi ka mɛtɛ.’ (2 Ek. 19:3) Ngande wakokaso nɔngɔsɔla etema aso la ntondo ka losanganya? Asawo wele lo dikatshi di’ekomelo dia Réveillez-vous! wa Ngɔndɔ ka Tanu 22 ndo Ngɔndɔ ka Samalo 8, wekɔ la yema y’awui amɔtshi wambowotombɛ lo dambo diaso dia lo nyuma sɔ. Lande na kahatayatshungolɛ etena dia kana yimba l’asawo asɔ, dia sho pamia nsaki kaso otsha lo kɛnɛ kambotombɛ Jehowa na? Nɔngɔsɔla etema aso nembetshiyaka nto nɔmba Jehowa dia nde tokimanyiya dia sho shihodia ohomba wa wetshelo wayotolongola ndo woho wa kamba la wɔ olimu.—Osam. 5:4, 5.
7. Kakɔna kakombolaso, ndo lande na?
7 Sho tshɛ kombolaka mbeka akambo efula oma l’Ɔtɛkɛta wa Nzambi, teya ɔnɛ oma lo tshimbo yawɔ sho kokaka ndjokondja panda. (1 Pet. 2:2) Ɔnkɔnɛ, tokonge Losanganya laso la Distrikɛ lele l’ɔtɛ a dui ɔnɛ: “Tɔkɛndɛkɛndɛ la Nzambi” dia ‘tombola lokombo la Jehowa kâmɛ.’—Osam. 34:3.
[Kiombo ya lo lɛkɛ 3]
Woho wa Tombola Lokombo la Nzambi
◼ Ndjalɔngɔsɔla la ntondo
◼ Monga la ngandji otsha le anto akina
◼ Nɔngɔsɔla etema aso