Losanganya la Distrikɛ 1999 “Ɔtɛkɛta wa Prɔfɛsiya Waki Nzambi”
1 Lam’aki Ase Isariyɛlɛ suke la mbɔtɔ lo Nkɛtɛ ya Daka, Mɔsɛ akâlɔmbɛ dia vɔ mbɔsa alako wa Nzambi la nɛmɔ. Nde akawatɛ ate: “Dikambu ne kema dikambu dia tshitshe le nyu, dio diekɔ lumu lanyu.” (Euh. 32:45-47) Onde sho kema la lowando le Jehowa lɛna dia nsɛnɔ yaso yekɔ oshinga wolo ndo latetemala tɔlɔmbɔla lo tshimbo ya Dui diande di’ohomba efula? Omalɔkɔ, tokonge l’asolo walomɔlomɔ Losanganya la Distrikɛ la nshi shato lele l’ɔtɛ a dui ɔnɛ: “Ɔtɛkɛta wa Prɔfɛsiya Waki Nzambi” ndo kɛnɛ kambotombɛ Jehowa.
2 Ɔnɔnyi ɔnɛ, nsanganya ya distrikɛ yayosalema l’esomba 59 wa lo République démocratique du Congo. Lɔ layosalema lo Falase, lo Kiluba, lo Lingala, lo Monokutuba, l’Ɔtɛtɛla, lo Swwahili, lo Tshiluba, la l’Uruund. La Kinshasa, losanganya lɔsɔ layosalema ndo l’Ɔtɛkɛta w’akanga a mpoke.
3 Aha la tamu, wɛ amboshilaka ndjalɔngɔsɔla dia mbɔtɔ lo nshi yakɔ shato ya losanganya nɛ dia wɛ mbetawɔka dia Jehowa mambokelɛ. Eya dia nde mɛnaka weolo wadja onto l’onto ndo yimba ya ndjahombia yɛnya ekambi ande dia mbɔtɔ lo nsanganya shɔ nde hawaohɛ. (Heb. 6:10) Lo mongaka lushi tshɛ lo losanganya oma k’osambu wa mbɔtwɛlɔ polo lo dɔmbɛlɔ dia ndjihelo, sho mɛnyaka Jehowa woho wɔsaso ɔtɛkɛta ande la nɛmɔ. (Euh. 4:10) Sho mɛnyaka nto lowando laso l’olimu wa wolo wakakambe anangɛso walɔngɔsɔla nsanganya ya weke.
4 Nɔngɔsɔla dia nunu di’ekambi wa Nzambi sangana lo dihole la dihole dia losanganya nɔmbaka dia vɔ takonge ndo ndjalɔngɔsɔla dimɛna. Sho tshutshuyamaka dia kamba dihɛka lo dihɛka di’‘akambo tshɛ mbeta dimɛna ndo aha l’ofutanu,’ lo mbeya ɔnɛ nsanganya shɔ yakalɔngɔswama la ngandji tshɛ. (1 Kor. 14:40) Awui la waewoyelo wayela anɛ wayokokimanyiya dia wɛ ndjalɔngɔsɔla dimɛna dia ndjɔlɛ mma dia lo nyuma ndo ndjonga kâmɛ l’Akristo w’asekayɛ.
La Ntondo ka Losanganya
5 Onde wanɛ weka la yɛ Bible ndo anto akina wayasha wekɔ l’ohomba w’ekimanyielo dia vɔ ndjalɔngɔsɔla woho wa vɔ mbɔtɔ lo losanganya? Kɛnɛ kayowoka ndo kayowɛna lam’ayowonga lo losanganya mbeyaka mbatshutshuya dia koma atɛmɔdi wa Jehowa. (1 Kor. 14:25) Dikumanyi la dia ndjasha le onto tshɛ lele l’ohomba w’ekimanyielo lo kɛnɛ kendana la pango kana woho wa koma lo losanganya, djekoleko ase etshumanelo wanɛ waya esombe, ko menda kana ehomba awɔ wambokotshama.—Ngal. 6:10.
6 Onde wɛ ambɔsa tɛdikɔ t’ekomelo lo dikambo di’ohangelo ayɛ? Naka wɛ ekɔ la kanyi yatotshikala l’anangɛso lo nshi ya losanganya, onde wɛ ambolodjaka fɔrmilɛrɛ kalɔmbawɔ luudu? Onde wɛ akafunde ndo lofulo l’ana wayotshɔ layɛ, naka wekɔ? Sekeletɛlɛ la dia toma adɛmandɛ wambetawɔma oma le Kɔmite k’Olimu otsha lo dihole diayosalema losanganya. Ekɔ ohomba di’anangɛso wanɛ wayolongola anto têyi la ntondo woho wa vɔ nongola angɛndangɛna awɔ.—1 Kor. 14:40.
7 Lam’ele Departɛma di’Esakelo wa Wanyandja mendaka paka akambo wa shashimuya, sho nyɔlɔmbaka dia nyu ndja l’aspirinɛ, diangɔ dia sola kana mbifɛ mpota, ekanga wa hemɔ ya dowe, ekanga wa l’otema, ndo diangɔ dikina dia ngasɔ oya l’assemblée naka wɛ mɛnaka dia ohomba adiɔ ayonga. Naka wɛ kana lakɛ ɔmɔtshi la ngandji ekɔ la hemɔ wolo, ɛnyɛlɔ oko: pâ ka l’asolo, diabɛtɛ, kana tɔkɔka la shɔkɛ, kete koye l’ekanga wahombama. Ɔsa di’oko wɛ ekɔ lakɛ kana lo vakashi. Ayonga dui dia lomba naka ase nkumbo kana angɛnyi wêya pâ kele lande mongaka wonya tshɛ suke l’onto ɔsɔ, nɛ dia vɔ mbayoleka mbeya woho wa mbokimanyiya wonya wa dikambo.
8 Sho mbeyaka kondja waaso wa sambisha lo tshakitudi lam’ayataye oya lo losanganya kana watatakalola otsha la ngelo. Onde wɛ ayonga suke dia sambisha anto akina? Ndo sho ndo ana kokaka mbisha anto wahomana la so traktɛ. Tayokondja waaso wa kahɛ anto wɛnya saki periodikɛ, tobukubuku l’ekanda ekina. Toyalɔngɔsɔlɛ dia sambishaka lo tshakitudi anto wele ondo, hawokoka nsambishama lo toho tokotosambishaka. Naka tayɔlɔta kitadi lam’ayataye oya lo losanganya kana lam’ayatakalola oya la ngelo, kete wɛ mbeyaka kondja waaso efula wa sambisha.
Wonya wa Losanganya
9 Nkuke ya lo dihole diayosalema losanganya yayodihɔka lushi tshɛ l’eshidi 8h00. Nkumbo kayɛ keto kana wanɛ wakaye layɛ mutuka ɔtɔi mbakokayɛ mombɛ ahole. Wayombɛ anangɛso l’akadiyɛso waya esombe esongo w’amɛna, kâmɛ ndo akanga wa dikɔmɔ la wanɛ wele lo kɔsa y’etshimbi. Sho nangaka mbaɛnya woho walɛmiyaso ndo wawaokaso ngandji. Lushi tshɛ, kam’ashila losanganya, enda kana wɛ hohe ndoko ɛngɔ.
10 Onde wɛ ayobatizama lo losanganya la distrikɛ? L’etenyi ka Lushi la Samalo la pindju, wayolamɛ wanɛ wayolongola batismu esongo. Wanɛ walongɔna wayokɛnya dihole diakɔ. Naka kokaka, ndjasɛ lo dihole diakɔ la ntondo ka losangaya tatɛ. Yaka la Bible kayɛ, dibuku di’esambu, esiyamɛ la dihɔndɔ dia dimɛna dia ndjɔtɔ ladiɔ l’ashi. L’etena kɛsɔ k’ohomba, kema dimɛna ndɔta ahɔndɔ wa tomondo kana wa mwɛ ndo epila wele la wa sɔlga kana efundelo wa kɔlɔ lɔkɔ. Dikumanyi nɛ diavusola wembola wa lo biukubuku Atshina a Wekelo wa lo Bible vɔ la wanɛ wayobatizama la dia ndjashikikɛ ɔnɛ vɔ tshɛ wamboshihodia awui asɔ. Lam’ele batismu ekɔ djembetelo ya ndjakimɔ k’onto ndamɛ le Jehowa Nzambi, lâsɔ kema ɔlɔlɔ dia wa kandinda ya batismu kimanɛ wonya wabatizamawɔ.
11 Nyu kokaka kamba l’appareils wa fɔtɔ la dihomɔ dikina diɔsa awui lo losanganya. Koko, pombaka sɔna dihole dia kitsha appareils akɔ di’aha takanya kana shimba anto dia vɔ mɛna dimɛna. Dihomɔ sɔ hadiohombe kɔhama lo kiɔkɔ y’atɔtɔ kana lo ekongelo ka sɔnɔrizasiɔ ka lo losanganya.
12 Di’aha nyanga ɛkɔhɔtanya ndo di’aha shisha wenya aso, la Société akatɔlɔmbɛ dia shamɛ mbelaka diangɔ dia ndɛ lo losanganya lushi tshɛ. Anangɛso efula wakayele dako sɔ ko wakɛnyi dia lo wonya wa diomuyelo dia midi, vɔ wokoka mbidjasɛ la nkumbo yawɔ ko ndɛ yangɔ yakawela. Efula wakate dia kakianɛ vɔ waya la diaaso dia sembola yema y’ekolo wonya wa diomuyelo ndo mbetsha wenya ɛmɔtshi l’anangɛwɔ l’akadiyɛwɔ. Dikambo sɔ nɔmbaka di’onto l’onto talɔngɔsɔlaki yangɔ ya ndɛ la ya nɔ ndo didja lo kisaka ka tshitshɛ kana l’ɛngɔ kokoki mbɔtɔ l’ɛse ka kɔsa kana k’okala awɔ. Sho nɔmbaka di’onto tshɛ ndjela dako sɔ. Lo nsanganya nyɛ yêke kambeta, ɛnɔmbɔdi w’ahole wasalaso losanganya la wa tɔjɛra ta lo waa rɛstora wosukanyi la dihole diasalaso losanganya wakɛnyi di’anangɛso l’akadiyɛso wakatombatombaka dia tosomba diangɔ dia ndɛ l’ahole asɔ. Amɔtshi l’atei w’anto asɔ wɔlɔmba dia kana vɔ kokaka dihola wa rɛstora dikambo dia wanɛ waya lo losanganya. Koko, naka sho mbetawɔ dikambo sɔ, kete ndo wanɛ wele bu Ɛmɛnyi wa Jehowa wayɔsɔhana la so la yanyi. Ndo nto, naka sho mbetawɔ ngasɔ, kete shambu ya mbɔtɔka l’ɛnɔngɔ w’etale etale atosomba diangɔ dia ndɛ ayokalola nto, ko tete le dui sɔ mbêla ofukutanu ndo mbashidiya nɛmɔ dia nsanganya yaso. Diakɔ dialɔmbaso onto tshɛ dia nde mbela yangɔ yande ya ndɛ la ya nɔ lushi tshɛ la losanganya. Ndo anto wayasha waya la nyu mbahomba ntsha ngasɔ. Aha ndja l’elangi kana tɔvɛrɛ takoka mbolɛ ndo dinɔnɔ dia wolo lo dihole dia losanganya.
13 Onde wɛ hakoke ndjakimɔka lushi tshɛ dia kimanyiya wanɛ wɔmba ahole oma l’ɔkɔngɔ wa losanganya kana kamba lo departɛma dikina? Naka wɛ kokaka mbisha lonya, kete tshɔka lo Departɛma dia Wanɛ Wayakimɔ la Lolango lo dihole dia losanganya. Ana wele l’ɛse k’ɛnɔnyi 16 walanga tosha lonya wayokamba kâmɛ l’ombutshi ɔmɔtshi kana opalanga okina. Lo mɛtɛ, onto tshɛ kokaka mbisha lonya dia mbidja pudipudi lo dihole dia losanganya lo tɔngɔna kiatshi tshɛ yayondɛna kana ɛngɔ ka mindo ko kidja lo pubɛlɛ.
14 Takalongola alako w’amɛna efula lo dikambo di’ɔlɔtɔ aso ndo l’ɔlɛngɛlɔ aso wa divo oya lo nsanganya yaso. Oko ɛnyɛlɔ: alako w’eshika wele l’akatshi w’okotsha w’Olimu Aso wa Diolelo, lo bɛnyɛlɔ la fɔtɔ yele l’ekanda aso ndo oma l’alako watosha Jehowa l’ekimanyielo ka Bible. (Romo 12:2; 1 Tim. 2:9, 10) Anto têyaka dimɛna ndo mbeyaka bonde kambototshumana l’osomba awɔ. Ɔnkɔnɛ, l’ɔlɔtɔ aso la woho wɔlɛngiso divo diaso ekɔ esambishelo ka woke. Ekambi wa Jehowa efula mbishaka ɛnyɛlɔ k’ɔlɔlɔ lo dikambo sɔ. Koko mbala mɔtshi, sho mɛnaka di’anto amɔtshi waya lo nsanganya yaso ndɔtaka ndo ndjalɛngaka oko ase andja ɔnɛ. Wonya walɔtaso ahɔndɔ wasanga demba, anto toyambolaka dia kana sho mɛtɛ tekɔ anto wele la lonyuma l’ɔlɔlɔ oko wayataso. Ɔlɔtɔ wahatshambandeko, wa pudipudi, ndo wa kɔmba mbaleka ngɛnyangɛnya washo. Omalɔkɔ, ewandji wa nkumbo la dia menda ɔlɔlɔ woho walɔta ase nkumbo yawɔ. Ngasɔ mbahombaso mongaka l’oseka dihole tshɛ dieso, aha paka lo dihole dia losanganya to. Naka tayɔlɔtaka kitadi kaso la ntondo ndo l’ɔkɔngɔ wa losanganya, kete tayoyafɔnya l’ekambi wa pudipudi waki Jehowa.—Enda lo Mako 8:38.
15 Sɔlɔmɔna, Nkumekanga ka lomba akate ate: ‘akambo w’enginya watokelekamaka l’otema w’ɔna’ ndo ɔnɛ ‘ɔna l’enginya atotshaka nyango sɔnyi.’ (Tuk. 22:15; 29:15) Lo wonya wa losanganya, Ɛmɛnyi wa Jehowa w’akɛnda waki konamemaka wakafukutanyaka anangɛso l’akadiyɛso wanɛ wakatshaka tshɛ dia ndjela wetshelo wakashamaka. Lo nsanganya y’ɔnɔnyi wetshi, ana amɔtshi wakɛnda wakadjasɛ l’ahole wa la diko ko kɛnyaka la diangɔ dimɔtshi diatondja esase l’atei w’ampokami. Esase watomba oma lo diangɔ sɔ wekɔ wolo efula ndo kokaka nanya washo w’anto kânga oma l’etale. Mbokɛmaka hwe di’an’asɔ kokondja wahɔ oma l’ekongelo kɛsɔ ka lo nyuma kakalɔngɔswama ndo lo dikambo diawɔ. Lam’ele Jehowa ayoyokoya l’ambutshi lo kɛnɛ kendana la lɔkɛwɔ l’anawɔ, papa kana mama koka ndjashikikɛ ɔnɛ ana wekɔ la lɔkɛwɔ l’ɔlɔlɔ ndo wekɔ lo mpokamɛ wetshelo wa Jehowa paka naka nde mbidjasɛ kâmɛ la wɔ. Anami wayelɛ anto tshɛ wafukutanya ndo mbalɔmba di’aha vɔ ntsha ngasɔ nto, lo mbaohola la loshilambo tshɛ dia vɔ ndjela losanganya dimɛna.
16 Lam’ele sho nongolaka ndo anto k’anto lo nsanganya yaso, ekɔ ɔlɔlɔ sho nama ana la diangɔ diaso dimɛna. Anaso wekɔ woshasha w’oshinga wolo w’oma le Jehowa. Koko, sho mbeyaka dia ase andj’ɔnɛ kɛnɛmɔlaka yimba kana etsha waki Satana. Omalɔkɔ, keyake wonya tshɛ lɛnɛ ele anayɛ. Ndo nto, wɛ la dia momba appareil ayɛ wa fɔtɔ, pɔtɔmɔnyi kayɛ la diangɔ dikina di’ohomba ndo aha dikalɛ naka wɛ otonɛ. Yashikikɛ dia wɛ akadihi nkuke tshɛ ya vɔatirɛ yayɛ kana kanga dikalo diayɛ, ndo ɔnɛ wɛ akadjisha diangɔ diayɛ lo kɔfrɛ kana akadiɛmbi. Naka wɛ ntsha ngasɔ, kete onto hatona dia nanya nkuke dia tova ɛngɔ lɔkɔ.
17 Sho ngɛnangɛnaka efula lam’ɛnaso anangɛso l’akadiyɛso wɔsa nɔtɛ lo losanganya. Lo ntsha ngasɔ mbayoyasha tshɛ ndo ndjohɔka awui woleki ohomba. Lo vusolaka nɔtɛ shɔ wɛ la nkumbo kayɛ kana angɛnyi ayɛ nyayoyokanaka lomba l’awui w’ohomba wakatama l’assemblée ndo wɛ hatohɛ awui akɔ.
18 Ekambi wa Jehowa wokokimɔka weshasha wa la lokaho dia sukɛ elimu wa teokrasi. (Etum. 36:5-7; 2 Ek. 31:10; Romo 15:26, 27) Weshasha wakimɔnyu la lolango dia sukɛ olimu wakambema l’andja w’otondo ayotokimanyiya dia kaloya akuta wakatombe dia futɛ ahole wa weke dia sala nsanganya yaso.
19 Lo ndjela Amose 3:7, Jehowa mbutaka dia nde “hatutshaka nduku dikambu, tshikima ndi ambutashudi dikambu diandi dia lu usheshe le ekambi andi amvutshi.” Oko wende ‘Ombishodi wa toseke,’ Jehowa akafunde lo Bible nkama ya prɔfɛsiya yakakotshama paka woho wakayatama ndo tshɛ lo tshɛ. (Dan. 2:28, 47) Alaka amɔtshi wa diambo wakahombe kotshama. Losanganya la Distrikɛ la l’ɔnɔnyi 1999 lele l’ɔtɛ a dui ɔnɛ: “Ɔtɛkɛta wa Prɔfɛsiya Waki Nzambi,” layokeketsha mbetawɔ kayɛ l’alaka wa Nzambi. Hokamɛ la yambalo tshɛ kɛnɛ kakotɛ Jehowa. Kamba la kɛnɛ tshɛ kayoyɛna ndo kayoyoka—l’esambishelo, l’etshumanelo ndo lo lɔsɛnɔ layɛ. Tekɔ lo nɔmba Jehowa dia tshɔkɔla weolo wadjayɛ dia wɛ mbɔtɔ nshi yakɔ shato ya dambo dia lɔ̂ka sɔ dia lo nyuma!
[Caption on page 3]
[Caption on page 3]
Yalɔngɔsɔla dia monga Nshi Yakɔ Tshɛ: la Tanu, la Samalo, ndo la Lomingu!