Totombole Jehowa lo sambishaka lo tshakitudi
1 Ɛmɛnyi wa Jehowa wa kɔlamelo nyangaka waaso wa mbôtombola lushi la lushi. (Osam. 96:2, 3; Heb. 13:15) Yoho mɔtshi yakokaso sala dikambo sɔ ele lo sambishaka lo tshakitudi. Efula k’atɛmɔdi wa Jehowa ɛlɔ kɛnɛ wekɔ l’ɔngɛnɔngɛnɔ lo woho wakâsambisha onto ɔmɔtshi losango la Diolelo lo tshakitudi.
2 Sambisha onto ɔmɔtshi lo tshakitudi mbishaka mbala efula anto akina diaaso dia vɔ mboka losango la Diolelo. Ɛnyɛlɔ, sawo diakasawola Yeso la womoto ɔmɔtshi l’ose Samariya l’ɛtɛkɔ k’ashi ka Jakɔbɔ, diakakimanyiya dia kutola yambalo y’anto efula lo lokumu l’ɔlɔlɔ. (Joa. 4:6-30, 39-42) Kânga mbaki Paulo la Silasi lo lokanu la Filipi, vɔ wakasambisha olami wa lokanu, ndo oma l’esambishelo kɛsɔ, nkumbo kande k’otondo waketawɔ akambo wa mɛtɛ.—Etsha 16:25-34.
3 Waaso wa Sambisha lo Tshakitudi: Naa waaso wele laso wa sambisha lo tshakitudi? Anto amɔtshi salaka dikambo sɔ etena katawasombe diangɔ, etena kewɔ lo mutuka, kana etena kewɔ lo konga dia mɛnana la dɔkɔtɛlɛ lo lupitadi. As’olimu kana ambeki amɔtshi sambishaka lo tshakitudi wonya wa diomuyelo. Lo kitsha tsho mukanda aso ɔmɔtshi walembetshiya Bible lo dihole diɛnama mbeyaka tshutshuya anto akina dia mboka wembola wendana la mbetawɔ yaso.—1 Pet. 3:15.
4 Woho wa Tatɛ Sambisha lo Tshakitudi: Kiɛndakɛnda mɔtshi ya yimato y’ɔsɔnyi yaki l’ɛnɔnyi esambele akoke wata lo losanganya di’ekɔ ohomba onto tshɛ sambisha. Ɔnkɔnɛ, lam’akandatshu la nyango dia tosomba diangɔ, nde akadje tobukubuku tohende lo tapa diande. Etena kakatasombaka nyango diangɔ, yana ya yimato shɔ akasha womoto ɔmɔtshi biukubuku, ko womoto akɔ akayilongola l’ɔngɛnɔngɛnɔ efula. Lam’akawawombola ngande wakandakondja dihonga dia sambisha womoto ɔsɔ, kiɛndakɛnda ya yimato y’ɔsɔnyi shɔ akakadimola ate: “Dimi lakɔshi yɛdikɔ ya mbosambisha! Ndo lakasale dikambo sɔ.”
5 Dia sambisha lo tshakitudi, sho tshɛ pombaka monga la yimba yele oko nyɛ yaki la kiɛndakɛnda ya yimato shɔ. Kakɔna kayotokimanyiya dia monga la yimba ya woho ɔsɔ? Sho pombaka nɔmba Nzambi dia nde tosha dihonga dia tɛkɛta. (1 Tes. 2:2) Sho pombaka nɔngɔsɔla wombola kana dikambo dimɔtshi diakutola yambalo diayotokimanyiya dia mbɔtshiya sawo. Oma lâsɔ ko sho monga la mbetawɔ dia Jehowa ayɔtshɔkɔla welo wadjaso.—Luka 12:11, 12.
6 Sambisha anto wahomanaso lawɔ lushi la lushi lo tshakitudi tombolaka Jehowa ndo toshaka ɔngɛnɔngɛnɔ. Dikambo sɔ mbeyaka kimanyiya onto dia nde mbɔtɔ lo mboka k’otsha lo lɔsɛnɔ la pondjo.