Sho tekɔ Ɛmɛnyi wa Jehowa wonya tshɛ
1. Wetshelo akɔna wakokaso nkondja oma l’ɔkɔndɔ wendana la woho wakasambisha Yeso womoto l’ose Samariya l’ɛtɛkɔ k’ashi?
1 L’ɔkɔngɔ wa nde nkɛndakɛnda l’edja ka wenya a tango efula, Yeso akalɛmbɛ ndo aki la mposa k’ashi. Etena kakatshu ambeki ande dia tosomba mbo ya ndɛ, nde akadjasɛ suke la ɛtɛkɔ k’ashi kɛmɔtshi kaki l’andja w’osomba wa Samariya dia momuya. Yeso kotshɔ la Samariya dia tosambisha, koko nde akete la Samariya etena kakandatatshɔka otsha la Ngalileya dia totetemala l’olimu ande lɛkɔ. Koko nde akakambe la diaaso sɔ dia nsambisha womoto lakataholaka ashi. (Joa 4:5-14) Lande na? Ndoko lushi lakatshike Yeso dia ndjala “omenyi wa kolamelu la mete.” (Eny. 3:14) Sho mbokoyaka Yeso lo mongaka Ɛmɛnyi wa Jehowa wonya tshɛ.—1 Pet. 2:21.
2. Ngande wakokaso ndjalɔngɔsɔla dia nsambisha lo tshakitudi?
2 Toyalɔngɔsɔlɛ: Sho koka ndjalɔngɔsɔla dia nsambisha lo tshakitudi lo tshɔka l’ekanda aso ɛmɔtshi. Apandjudi efula kimɛka traktɛ l’anya ndo vɔ ndjishaka wanɛ wasondja lo waa makashinyi, wanɛ wakamba lo ahole wasondjawɔ esasɛ ndo anto akina wahomana la wɔ lushi l’otondo. (Und. 11:6) Kadiyɛso kɛmɔtshi kôkondaka nkɛndɔ mbala la mbala salaka la wolo nshi tshɛ dia mongaka la Bible ka tshitshɛ ndo la dibuku Bible etshatɔ lo tshapatapa yande ndo nde tohembaka dia nsawola la wanɛ wodjashi suke la nde.
3. Ngande wakokaso ntatshiya sawo?
3 Woho wa ntatshiya sawo: Etena kasambishaso lo tshakitudi, hatohombe mbɔtshiya ɔtɛ a dui wɔsami oma lo divɛsa dimɔtshi oma k’etatelo ka sawo. Yeso kotatshiya sawo diande la womoto l’ose Samariya laki l’ɛtɛkɔ k’ashi lo mbotɛ mbala kakɔ ɔtɔi dia nde ekɔ Mɛsiya. Nde akawɔlɔmbɛ tsho ashi wa nnɔ dia nkotola yambalo yande. (Joa 4:7-9) Kadiyɛso kɛmɔtshi akashihodia dia nkamba la yoho yâmɛ y’esambishelo shɔ mbokimanyiyaka dia ntatshiya sawo etena kawombolawɔ dia kana nde akangɛnangɛna fɛtɛ kɛmɔtshi. Lo dihole dia nde mbuta ɔnɛ nde kosala fɛtɛ kɛsɔ l’ɔtɛ wende Ɔmɛnyi wa Jehowa, nde mbutaka ate: “Dimɛ mbakasɔnɛ diaha salaka fɛtɛ.” Onto ɔsɔ lokowokaka ambola mbala la mbala mbombolaka lande na kahandasale fɛtɛ kɛsɔ, ndo kadiyɛso kambaka la diaaso sɔ dia mbosambisha.
4. Lande na kele ɛtɛkɛta wele lo Mateu 28:18-20 munandaka etema aso?
4 Kânga mbakashidiya Yeso olimu ande wa la nkɛtɛ l’ohetoheto tshɛ, nde ekɔ lo ntetemala ndjasha l’olimu w’esambishelo wakambema oko wakandôkambaka. (Mat. 28:18-20) Ɔnkɔnɛ, oko Yeso lele Ɛnyɛlɔ kaso, sho lawɔ tekɔ Ɛmɛnyi wele suke dia nsala wotelo wa lo sɛkɛ wa mbetawɔ kaso wonya akɔna tshɛ.—Heb. 10:23.