Esambishelo ka l’Olui Mbelaka Ɔngɛnɔngɛnɔ

¹ Lam’akandatome ambeki 70 dia tosambisha, Yeso akawaetsha kɛnɛ kakawahombe mbuta, akatome ahende ahende, ndo akawaewoya mbilo kakawahombe tosambisha. Dui sɔ diakawasha ɔngɛnɔngɛnɔ. (Luka 10:​1-17) Popo ndo ɛlɔ kɛnɛ, esambishelo ka l’olui keketshaka ekambi wa Nzambi dia ndjasha l’olimu w’esambishelo ndo mbakimanyiyaka dia mbeya kongɛ olimu akɔ.

² Dikumanyi Mbishaka Ɛnyɛlɔ: Dikumanyi wekɔ l’ɔkɛndɛ w’ohomba efula wa kimanyiya apandjudi tshɛ dia sambishaka mbala la mbala. Omendji w’olimu salaka la wolo dia kongɛka nsanganya y’otsha l’olimu w’esambishelo l’atei wa lomingu. Omendji tshɛ wa wekelo wa dibuku ekɔ l’ɔkɛndɛ wa kongɛ olimu w’esambishelo l’olui ande, djekoleko l’ekomelo ka lomingu. Mbala efula, lam’asangana etshumanelo k’otondo lo losanganya l’otsha l’olimu w’esambishelo, oko ɛnyɛlɔ l’ɔkɔngɔ wa Wekelo wa Tshoto y’Etangelo, omendji tshɛ wa wekelo wa dibuku la dia mbidja yimba l’ehomba w’anto wa l’olui ande.

³ “Akambu Tshe Watshami la Dimena ndo [Aha l’Ofutanu]”: Ɔnɛ lɔsɔnami dia nɔmbɔla losanganya l’otsha l’olimu w’esambishelo la dia mimɛ la wonya ndo likomiya lo minitɛ 10 kana 15. Ndeka dimɛna nde nɔngɔsɔla esambishelo ka l’elui ndo kahanya mbilo (naka emendji wa wekelo wa dibuku bu, oko wakatɛnyi la ntondo) la ntondo ka komiya la dɔmbɛlɔ. Kɛsɔ kimanyiyaka di’aha apandjudi totshumana elui elui lo mbilo, nɛ dia dui sɔ koka shisha nɛmɔ di’olimu aso. Dui sɔ mbɔtɔnɛka nto la dako diaki Paulo diata ɔnɛ: “Keli akambu tshe watshami la dimena ndu [aha l’ofukutanu].” (1 Kor. 14:40) Anto tshɛ wɔtɔ lo nsanganya shɔ la dia mbisha lonya dia yɔ nɔmbwamaka dimɛna lo komaka la wonya, lo kamba dimɛna l’ɔnɛ lalɔmbɔla ndo lo tshɔka otsha lo mbilo kakawawasha dia sambisha kam’ashila okahanyelo w’anto.

⁴ Esambishelo ka l’Olui Tokakatanyaka Kâmɛ: Ɔlɔngɔswɛlɔ w’esambishelo ka l’olui toshaka diaaso dia dimɛna efula dia mbeya anto akina wa l’etshumanelo. Kânga mbele kema kɔlɔ dia tôkanyi l’onto ɔmɔtshi la ntondo dia sambisha la nde, tayokondja ɛlɔlɔ efula nto naka sho mbɔtɔka lo nsanganya y’otsha l’olimu w’esambishelo aha la tokanyi l’onto ɔmɔtshi la ntondo. Vɔ koka tɔlɔmba dia sambisha l’onto ɔmɔtshi lahateye dimɛna, kɛsɔ ayotokimanyiya dia ‘nyomoleka taloya’ ngandji kaso.​—⁠2 Kor. 6:​11-13.

⁵ Esambishelo ka l’olui tokeketshaka ndo tokakatanyaka kâmɛ oko weso “ekambi kame la wo lu akambu wa mete.” (3 Joa. 8) Nyɛsɔ toyasha efula l’esambishelo kɛsɔ!