Nsanganya y’otsha l’esambishelo yakotsha oyango ayɔ

1. Oyango akɔna wele la nsanganya y’otsha l’esambishelo?

¹ Lo diaaso dimɔtshi, Yeso akasangana la ambeki ande 70 la ntondo ka vɔ ntshɔ dia tosambisha. (Luka 10:1-11) Nde akaakeketsha lo mbaohola ɔnɛ hawotonga vɔamɛ, koko wayɔlɔmbwama oma le Jehowa “Owandji wa dinela.” Nde akawasha nto alako wakawakimanyiya dia nkamba olimu akɔ ndo nde akaakahanya “ahende ahende.” Ɛlɔ kɛnɛ, nsanganya yasalaso ntondo ka ntshɔ l’esambishelo salemaka l’oyango akɔ waamɛ, wa tokeketsha, tokimanyiya ndo tokahanya.

2. Minitɛ ngana yahomba losanganya l’otsha l’esambishelo salema?

² Nshi nyɛ, losanganya l’otsha l’esambishelo lekɔ lo salema l’edja ka minitɛ 10 kana 15, mbidja ndo nkahanya anto, mbisha anto bɛtshi dia nkɛtɛ ndo nsala dɔmbɛlɔ. Kakianɛ, dui sɔ diambotshikitana. Ntatɛ oma lo Ngɔndɔ ka nɛi, losanganya l’otsha l’esambishelo layosalemaka minitɛ tshanu kana esambele. Koko, naka anto waki oma lo losanganya lokina la l’etshumanelo, kete losanganya lɔsɔ pombaka susama, nɛ dia vɔ wakakondjisha wahɔ oma l’ɔkɛtshanyelo w’avɛsa amɔtshi wa lo Bible. Nsala losanganya l’otsha l’esambishelo lo hiembola ayokimanyiya anto tshɛ dia vɔ nsambisha efula. Laadiko dia laasɔ, naka ambatshi mboka kana apandjudi amɔtshi wakatate nsambisha la ntondo ka losanganya l’otsha l’esambishelo, hatonga dui dia kɔlɔ le wɔ dia tokemɛ olimu awɔ lo minitɛ ngana tsho.

3. Ngande wakoka nsanganya y’otsha l’esambishelo nɔngɔswama l’oyango w’apandjudi tshɛ nkondja wahɔ?

³ Nsanganya y’otsha l’esambishelo pombaka nɔngɔswama dia yɔ nkimanyiya apandjudi lo yɛdikɔ y’efula. Lo tshumanelo efula, ekɔ ohomba nsala nsanganya y’otsha l’esambishelo l’elui wotshikitanyi lo dihole dia sanganaka dihole ɔtɔi. Lo nsala ngasɔ, hatonga dui dia wolo dia apandjudi ntshɔ lo losanganya l’otsha l’esambishelo ndo ondo ntshɔ lo bɛtshi diawɔ dia nkɛtɛ. Apandjudi koka kahanyema esadi eto ndo mbeyaka monga dui dia wɔdu le emendji w’elui dia ndjasha le anto wa l’elui awɔ. Olui wa dikumanyi koka nsɛdingola awui wele l’etshumanelo ndo menda kɛnɛ kakokawɔ nsala. La ntondo ka nkomiya losanganya la dɔmbɛlɔ dia lo tshena pe, opandjudi tshɛ pombaka mbeya dihole ndo onto layotomba la nde l’esambishelo.

4. Lande na kahahombe nsanganya y’otsha l’esambishelo mbɔsama oko nsanganya kina yileka ohomba?

⁴ Lɔ lekɔ ohomba oko nsanganya kina ya l’etshumanelo: Lam’ele nsanganya y’otsha l’esambishelo salemaka lo wahɔ wa wanɛ watatshu l’esambishelo, ondo aha etshumanelo k’otondo mbayɔtɔ. Koko, dui sɔ hɛnya dia yɔ pombaka mbɔsama oko dui di’anyanya kana oko nsanganya kina ya l’etshumanelo yileka ohomba. Oko wediɔ lo dikambo dia nsanganya yaso tshɛ, nsanganya y’otsha l’esambishelo yekɔ yɛdikɔ y’oma le Jehowa yatokimanyiya dia tshutshuyana lo ngandji ndo l’elimu w’ɔlɔlɔ. (Hɛb. 10:24, 25) Diakɔ diele, ɔnɔmbɔdi pombaka lilɔngɔsɔla dimɛna l’oyango wa ɔkɛtshanyelo ɔsɔ ntombola Jehowa ndo anto nkondja wahɔ oma lɔkɔ. Naka kokaka, kete apandjudi wayotshɔ l’esambishelo pombaka nsala la wolo dia mbɔtɔ lo losanganya lɔsɔ.

Nsanganya y’otsha l’esambishelo hahombe mbɔsama oko dui di’anyanya kana oko nsanganya kina ya l’etshumanelo yileka ohomba

5. a) Ɔkɛndɛ akɔna wele l’omendji w’olimu lo okongelo wa nsanganya y’otsha l’esambishelo? b) Etena kakɔna kakoka kadiyɛso nɔmbɔla losanganya l’otsha l’esambishelo?

⁵ Woho wahomba ɔnɔmbɔdi ndjalɔngɔsɔla: Dia onto nɔngɔsɔla ɔkɛndɛ wa tosha lo losanganya dimɛna, ekɔ ohomba nde mbolongola la ntondo. Kɛsɔ mbahomba salema ndo lo dikambo dia losanganya l’otsha l’esambishelo. Etena kasangana elui w’esambishelo l’ahole wotshikitanyi, emendji w’elui kana ɛhɛna awɔ mbele l’ɔkɛndɛ wa nɔmbɔla nsanganya l’elui awɔ. Koko, naka etshumanelo k’otondo kayosangana lo losanganya l’otsha l’esambishelo, kete omendji w’olimu ayɔsɔna onto ɔmɔtshi dia nɔmbɔla losanganya lakɔ. Emendji w’olimu ɛmɔtshi mbishaka ɛnɔmbɔdi tshɛ ekongelo ndo panɛka kɛmɔtshi lo dibaya dia waewoyelo. Omendji w’olimu pombaka monga l’ekanelo k’ɔlɔlɔ etena kasɔnande ɛnɔmbɔdi, lo mbohɔ dia dimɛna dia nsanganya shɔ nemanɛka la wetshelo ndo la dikoka dia nkongɛ akambo diele la wanɛ walɔmbɔla. Naka ndooko ekumanyi, okambi wakimanyiya kana ɔnangɛso okina lambobatizama lele l’akoka dia nɔmbɔla nshi mɔtshi, kete omendji w’olimu koka nsɔna kadiyɛso kambobatizama kele l’akoka dia nɔmbɔla losanganya lɔsɔ.—Enda sawo diele l’ɔtɛ a dui ɔnɛ: ““Etena kahomba kadiyɛso nɔmbɔla.”

6. Lande na kahomba ɔnɛ lele l’ɔkɛndɛ wa nɔmbɔla nɔngɔsɔla dimɛna?

⁶ Etena kalongolaso ɔkɛndɛ lo Kalasa k’olimu wa teokrasi, kana lo Losanganya l’olimu, sho mbɔsaka ɔkɛndɛ ɔsɔ la nɛmɔ ndo mbɔlɔngɔsɔlaka dimɛna. Anto atɔi ato mbakongɛ paka etena kowotatshu lo losanganya ko ndjotatɛ nkanyiya kɛnɛ kayowotota. Onto lalongola ɔkɛndɛ wa nɔmbɔla losanganya l’otsha l’esambishelo hahombe nsala ngasɔ. Lam’ele minitɛ yahomba losanganya l’otsha l’esambishelo salema yambosusama, ekɔ ohomba lilɔngɔsɔla dimɛna dia lɔ monga dimɛna ndo nshila la wonya. Ɔlɔngɔnswɛlɔ wa dimɛna mendanaka ndo la teyi la ntondo ɛtshi ka nkɛtɛ ka nsambisha.

7. Naa awui amɔtshi wakoka ɔnɔmbɔdi nkamba la wɔ l’ɔkɛtshanyelo

⁷ Awui wa nkɛtshanya: Lam’ele awui wa lo dihole la dihole ntshikitana, ɔhɔmbɔ wa kɔlamelo hasha ekongelo k’awui wahomba kɛtshanyema lo nsanganya tshɛ y’otsha l’esambishelo. Kiombo yele l’ɔtɛ a dui ɔnɛ: “Lo losanganya l’otsha l’esambishelo, nyu koka nsɛdingola awui anɛ” mɛnyaka awui amɔtshi wakokanyu nkɛtshanya. Mbala tshɛ, losanganya lɔsɔ salemaka oko ɔkɛtshanyelo. Lo diaaso dimɔtshi, nyu koka nsala wɛnyɛlɔ wakalɔngɔswama dimɛna kana mɛnya vidɛo mɔtshi yɔtɔnɛ la dui sɔ y’oma lo jw.org. Etena kayalɔngɔsɔlande dikambo dia losanganya l’otsha l’esambishelo, ɔnɔmbɔdi pombaka nkana yimba lo awui wayokeketsha ndo wayokimanyiya apandjudi wayotshɔ tosambisha lushi lakɔ.

Etena kalɔngɔsɔla ɔnɔmbɔdi losanganya l’otsha l’esambishelo, nde pombaka nsɔna akambo wayokeketsha ndo wayokimanyiya wanɛ wayotshɔ l’esambishelo lushi lakɔ

8. Awui akɔna woleki ohomba wakoka kɛtshanyema lo nsanganya y’otsha l’esambishelo nshi ya samalo ndo ya bingu?

⁸ Ɛnyɛlɔ, lo nshi ya samalo, apandjudi efula mbishaka anto Tshoto y’Etangelo la Réveillez-vous ! Anto efula wasambisha nshi ya samalo hawoleke nsambisha l’atei wa lomingu, diakɔ diele vɔ koka mbohɛ mbɔtwɛlɔ yakakambe la wɔ lo Ɔtɛmwɛlɔ wa lo nkumbo wa la dikɔlɔ. Diakɔ diele, ekɔ ohomba dia ɔnɔmbɔdi mbohola ɛnyɛlɔ kɛmɔtshi ka mbɔtwɛlɔ kele lo lɛkɛ l’ekomelo la Olimu aso wa Diolelo. Toho tokina ele, nkɛtshanya woho wa mbɔtɔnganyiya losango lɔmɔtshi la l’ɛtshi kanyu ka nkɛtɛ, dui dimɔtshi diambosalema kana awui wendana la nshi ya fɛtɛ la mbɔtwɛlɔ ka woho wa mbisha periodikɛ kana wa ntshika dui dimɔtshi dia ndjosala wendelo w’oyoyo naka anto nongola periodikɛ. Naka anto amɔtshi wele lo losanganya l’otsha l’esambishelo wambokambaka la periodikɛ yakahɛso anto, ɔnɔmbɔdi koka mbalɔmba dia mbuta lo tshena pe awui amɔtshi wakeketsha wakahomana la wɔ. Lo nshi ya mingu, ɔnɔmbɔdi koka nsɔna dia nsala woho akɔ waamɛ la ekanda washaso anto lo ngɔndɔ kakɔ. Ekanda wekaso l’anto wele oko, Lokumu l’ɔlɔlɔ, Hokamɛ Nzambi ndo dibuku Bible etshatɔ, koka kahanyema lushi tshɛ, diakɔ diele ɔnɔmbɔdi koka nsɛdingola lo tshena pe woho wa mbisha anto okanda ɔmɔtshi l’atei awɔ.

9. Awui akɔna wakoka kɛtshanyema lo wikɛndɛ etena kasalema esambishelo ka laande?

⁹ Naka ase etshumanelo wayosala esambishelo ka laande lo wikɛndɛ, kete ɔnɔmbɔdi koka nkɛtshanya l’apandjudi woho wa mbisha anto periodikɛ yeke katomba etena kaamɛ la dikatshi dia leeta kana traktɛ kana nde koka mbuta kɛnɛ kakoka salema naka onto ambɛnya nsaki. Yoho kina ele, apandjudi koka mbuta awui w’amɛna wakahomana la wɔ wɛnya ohomba w’esambishelo ka laande.

10, 11. Lande na kele dia losanganya l’otsha l’esambishelo salema dimɛna ekɔ ohomba dia apandjudi ndjalɔngɔsɔla?

¹⁰ Woho wahomba apandjudi ndjalɔngɔsɔla: Apandjudi vɔ lawɔ koka mbisha lonya dia losanganya l’otsha l’esambishelo mbeta dimɛna. Lo ndjalɔngɔsɔla la ntondo dikambo di’esambishelo, ondo wonya w’ɔtɛmwɛlɔ wa lo nkumbo, vɔ koka monga la dui dimɔtshi dia totɛ apandjudi akina. Ɔlɔngɔswɛlɔ w’ɔlɔlɔ mendanaka ndo la mbɔsa periodikɛ ndo ekanda ekina la ntondo ka ndja lo losanganya l’otsha l’esambishelo di’anto tshɛ ntshɔ la wonya lo ɛtshi kawɔ ka nkɛtɛ aha la ntshimbatshimba tshanana.

¹¹ Ekɔ ohomba nto nkoma minitɛ ngana la ntondo ka losanganya l’otsha l’esambishelo ntatɛ. Lo mɛtɛ, sho salaka la wolo dia nkoma la wonya lo nsanganya tshɛ ya l’etshumanelo. Koko, naka onto ndjokoma lo losanganya l’otsha l’esambishelo l’ɔkɔngɔ, kete ekɔ tshondo y’ofukutanu. Lo ngande? Ɔnangɛso lalɔmbɔla mbidjaka yimba l’awui amɔtshi la ntondo ka nkahanya apandjudi. Naka ekɔ paka apandjudi yema tshitshɛ, nde koka mbatoma vɔ tshɛ l’ɛtshi ka nkɛtɛ kahataleke sambishama. Naka anto amɔtshi waya lo losanganya l’otsha l’esambishelo wekɔ la bɛtshi dia nkɛtɛ di’etale, nde koka mbatondja la wanɛ wele la mitutu kana mituka. Naka ɛtshi ka nkɛtɛ kɛmɔtshi kekɔ waale, nde koka ntoma anangɛso lɛkɔ kana nkongɛ dia vɔ tasambishaka suke l’akadiyɛso. Nde koka ntoma apandjudi wele la dikɔmɔ lo toshinga ta bamubamu kana tele bu la mvudu y’etajɛ efula. Nde koka ntondja apandjudi w’eyoyo l’apandjudi wa tomanamana. Koko mbala efula, naka apandjudi amɔtshi wamboyokoma l’ɔkɔngɔ, kokaka ntshikitanya wanɛ wakakahanyemi dia mbasha onto lakoka. Lo mɛtɛ, lo tena dimɔtshi sho koka monga l’ɔkɔkɔ w’oshika wa ndjokoma l’ɔkɔngɔ. Koko, naka taya la mbekelo ka komaka l’ɔkɔngɔ, sho koka ndjambola dia kana ekɔ l’ɔtɛ wahatɔshi nsanganya y’otsha l’esambishelo la nɛmɔ ko kana l’ɔtɛ wahatakongɛ akambo aso dimɛna la ntondo.

12. Naka mbala tshɛ wɛ mbokanaka l’onto lahomba nsambisha la yɛ, ahombayɛ nsala?

¹² Apandjudi wasangana dia ntshɔ l’esambishelo koka mbokana la ntondo ka nsanganya ntatɛ kana vɔ nkonga di’ɔnɔmbɔdi mbasha onto la nsambisha la wɔ. Onde wɛ ‘ayohamia ngandji’ kaya lo nsambisha l’apandjudi wotshikitanyi naka mbala tshɛ wɛ tokanaki l’onto ɔmɔtshi kana l’angɛnyi ayɛ wa ma ma dia nyu nsambisha? (2 Kɔr. 6:11-13) Onde wɛ hakoke nkongɛ lo tena dimɔtshi dia nsambisha l’opandjudi w’oyoyo dia mbokimanyiya dia mpamia akoka ande wa mbetsha? (1 Kɔr. 10:24; 1 Tim. 4:13, 15) Katohokamɛke la yambalo tshɛ alako watoshawɔ, mbidja ndo ɛlɔmbwɛlɔ kendana la dihole diahombaso ntatɛ nsambisha. Etena kashila losanganya, totshikitanyake onto lakawakosha ndo nyotshu l’ɛtshi ka nkɛtɛ kakawanyotomi aha la ntshimbatshimba.

13. Naa wahɔ wayotokondja lo losanganya l’otsha l’esambishelo, naka anto tshɛ wendana la dui sɔ ndjasha l’otema ɔtɔi ndo nkotsha ɔkɛndɛ awɔ?

¹³ L’ɔkɔngɔ wa vɔ nsambisha, ambeki 70 wakakahanya Yeso dia nsambisha, “wakakalola l’ɔngɛnɔngɛnɔ.” (Luka 10:17) Aha la taamu, losanganya lakasale Yeso nde l’ambeki ande ntondo ka vɔ ntshɔ dia tosambisha akaakimanyiya dia monga l’etombelo w’amɛna. Ɛlɔ kɛnɛ, losanganya l’otsha l’esambishelo koka monga la wahɔ akɔ wamɛ. Naka anto tshɛ wendana la dui sɔ ndjasha l’otema ɔtɔi ndo nkotsha ɔkɛndɛ awɔ, kete losanganya l’otsha l’esambishelo layokeketsha, layokimanyiya ndo tayokahanyema dia nkotsha ɔkɛndɛ aso wa monga “ɔmɛnyi le anto wa lo wedja tshɛ.”—Mat. 24:14.

Etena kahomba kadiyɛso nɔmbɔla

Kadiyɛso pombaka nkanga kitambala ndo mbidjasɛ etena kalɔmbɔlande losanganya l’otsha l’esambishelo. Awui wayondɔsɔna dia nsala ɔkɛtshanyelo pombaka monga woho waamɛ la wanɛ wotosala ɔnangɛso. Nde pombaka mbewɔ dia mɛnya oko nde osha ampokami alako, koko nde mbayɔlɔmbɔla ɔkɛtshanyelo. Naka nde ambɔlɔmba kadiyɛso kekina kambobatizamaka dia nsala dɔmbɛlɔ, kete kadiyɛso kɛsɔ pombaka nkanga kitambala. Naka ɔnangɛso lambobatizamaka amboyokoma lo losanganya lɔsɔ l’ɔkɔngɔ wa lɔ ntatɛ, kete kadiyɛsɔ pombaka mbɔlɔmba dia nde nshidiya losanganya. Omendji w’olimu pombaka tasha alako wendana l’awui wahaleke salema asɔ la ntondo l’oyango wa nkitshakitsha ekakatanu. Ɛnyɛlɔ, ɔna dikɛna lahatakotsha ɛnɔnyi dikumi, koko ekɔ ɔnangɛso lambobatizamaka koka monga laawɔ lushi lakalongola kadiyɛso ɔkɛndɛ wa nɔmbɔla, nɛ dia dikumanyi mbeyaka dia nde atonge l’akoka wa nɔmbɔla losanganya lɔsɔ. Lo tena dia ngasɔ, omendji w’olimu koka mbutɛ anto wendana la dui sɔ dia kadiyɛso kakalongola ɔkɛndɛ mbahomba nɔmbɔla losanganya, koko ɔnangɛso akɔ mbahomba nsala dɔmbɛlɔ naka dikumanyi mɛnaka dia nde ekɔ l’akoka. Kana mbeyaka monga ko ɔnangɛso ɔmɔtshi laya opalanga ekɔ lo losanganya lɔsɔ, koko nde akashimbama diaha nɔmbɔla losanganya kana nsala dɔmbɛlɔ la ntondo k’etshumanelo l’ɔtɛ w’ɛkɔkɔ weya dikumanyi. Aha la mbishola awui wa sheke, dikumanyi pombaka mbewoya akadiyɛso wakalongola ɔkɛndɛ dia vɔ kokaka nɔmbɔla ndo nsala dɔmbɛlɔ oyadi ɔnangɛso ɔsɔ ekɔ lo losanganya lakɔ. Dikumanyi koka nto mbewoya ɔnangɛso akɔ nshi yakawakongɛ dia akadiyɛso nɔmbɔla nsanganya y’otsha l’esambishelo.

Lo losanganya l’otsha l’esambishelo, nyu koka nsɛdingola awui anɛ:

Ɛnyɛlɔ kɛmɔtshi ka mbɔtwɛlɔ kele lo Olimu aso wa Diolelo.
Vidɛo mɔtshi yendana l’esambishelo y’oma lo jw.org.
Dui dimɔtshi diendana la mbɔtwɛlɔ ka dimɛna, ɛnyɛlɔ ɛtɛkɛta wa mbɔtwɛlɔ, ntshika dui dimɔtshi dia ndjosala wendelo w’oyoyo kana mbuta dia woshasha wa la lolango etena ketawɔ onto dia mbɔsa okanda.
Divɛsa dimɔtshi diakeketsha kana diasha wetshelo diendana l’esambishelo.
Dui dimɔtshi diakahomana l’opandjudi l’esambishelo kana diakatondjama l’ekanda aso.
Awui amɔtshi w’oma lo sawo dimɔtshi dia lo Olimu aso wa Diolelo.
Awui w’oma l’etenyi kɛmɔtshi ka Losanganya l’olimu keke kasalema.
Awui wendana l’esambishelo w’oma lo Tshoto y’Etangelo mɔtshi.
Awui wendana l’esambishelo w’oma lo ekanda aso, ɛnyɛlɔ dibuku Kalasa k’olimu ndo ‘Yaka, ondjele.’
Dui dimɔtshi di’oma lo jw.org diakoka nkamba la so l’esambishelo.
Dui dimɔtshi di’oma lo Bible ka Ekadimwelo k’andja w’oyoyo kambovuswama lo Angɛlɛ diakoka nkamba la so l’esambishelo.
Woho wa ntatɛ sawo l’onto ɔmɔtshi lakoka tohomana la so l’ɛtshi kaso ka nkɛtɛ, ɛnyɛlɔ onto lahetawɔ dia Nzambi ekɔ, letawɔ wetshelo w’ohilwelo, ose Hindu kana ose Buda.
Woho wa mbekola wekamu ɔmɔtshi wakoka ompokami totodjɛ.
Woho wa nkimanyiya onto latasambisha la yɛ dia ndeka nkondja etombelo w’ɛlɔlɔ l’esambishelo ka luudu la luudu.
Woho wa nsawola l’onto latɛkɛta ɔtɛkɛta okina.
Woho wa nsala toho tɔmɔtshi t’esambishelo, ɛnyɛlɔ esambishelo ka nyanga anto, esambishelo ka lo telefɔnɛ, esambishelo ka lo sɛkɛ, waendelo w’eyoyo kana nyanga anto wa mbeka la wɔ Bible.
Waohwelo amɔtshi wendana la ekokelo, ndjaɔtɔnganyiya l’akambo, loshilambo, mɛna akambo la sso di’ɔlɔlɔ kana awui akina wa ngasɔ.