Nsanganya y’otsha l’olimu w’esambishelo

1. Lande na kayakiyanyaso lo kɛnɛ kendana la kamba olimu w’esambishelo lo yoho yokongɛmi?

¹ Yeso akatshike ɛnyɛlɔ k’ɔlɔlɔ ka kamba olimu w’esambishelo lo yoho yokongɛmi dimɛna. Woho akɔ wâmɛ mbele ɛlɔ kɛnɛ, wanɛ walɔmbɔla olimu w’esambishelo wasalema l’andja w’otondo wekɔ la nsaki k’efula k’olimu ɔsɔ kambema lo yoho yakɔ yâmɛ. Lo yoho yɔtɔnɛ la dikambo sɔ, tshumanelo dia l’andja w’otondo kambaka la nsanganya y’otsha l’olimu w’esambishelo oko yoho mɔtshi ya kongɛ elui w’apandjudi wa Diolelo dikambo di’esambishelo.—Mat. 24:45-47; 25:21; Luka 10:1-7.

2. Kakɔna kahomba salemaka lo nsanganya y’otsha l’olimu w’esambishelo?

² Yɛdikɔ ya dimɛna: Nsanganya y’otsha l’olimu w’esambishelo nɔngɔswamaka dia mbisha wanɛ wayanga sambisha ekeketshelo, alako w’eshika ndo ɛlɔmbwɛlɔ kendana la woho wahomba kambema olimu ɔsɔ. Nyu mbeyaka kɛtshanya divɛsa dia lushi la lushi lo tshena pe naka diɔ mbɔtɔnɛka l’olimu w’esambishelo. Tena dimɔtshi, nyu kokaka kamba la waohwelo wele lo Olimu aso wa Diolelo, dibuku Comment raisonner kana dibuku Kalasa k’olimu dia nɔngɔsɔla wanɛ tshɛ wakaye lo losanganya dia sambisha lushi lɔsɔ. Nyu mbeyaka nto sala wɛnyɛlɔ wa lo tshena pe wendana la ekanda wakahɛso anto. La ntondo ka komiya la dɔmbɛlɔ, onto tshɛ pombaka mbeya onto layosambisha la nde ndo ɛtshi ka nkɛtɛ kayowosambisha. Yema tshitshɛ l’ɔkɔngɔ wa losanganya lɔsɔ lahahombe ndekana minitɛ 15, apandjudi tshɛ pombaka ntshɔ mbala kakɔ ɔtɔi l’ɛtshi kawɔ ka nkɛtɛ.

3. Ele l’ɔkɛndɛ wa kongɛ nsanganya y’otsha l’olimu w’esambishelo?

³ Ngande wakongɛmayɔ? Omendji w’olimu mbele l’ɔkɛndɛ wa kongɛ nsanganya y’otsha l’olimu w’esambishelo. Emendji w’elui kana ɛhɛna awɔ mbele l’ɔkɛndɛ wa nɔngɔsɔla nsanganya y’otsha l’olimu w’esambishelo l’elui awɔ lo wikɛndɛ. Emendji ɛmɔtshi kana ekambi wakimanyiya kokaka nɔngɔsɔla nsanganya y’otsha l’olimu w’esambishelo l’atei wa lomingu. Emendji w’elui kambaka kâmɛ la omendji w’olimu dia vɔ monga la bɛtshi dia nkɛtɛ diakoka di’elui awɔ sambishaka lo luudu la luudu lo wikɛndɛ. L’atei wa lomingu, omendji w’olimu ayokimanyiya wanɛ wahomba nɔmbɔla nsanganya y’otsha l’olimu w’esambishelo l’elui awɔ.

4-6. a) Oyango akɔna wele la nsanganya y’otsha l’olimu w’esambishelo lo kɛnɛ kendana la ɛtshi ka nkɛtɛ k’etshumanelo? b) Awui akɔna wakoka sɛdingɔma dia shikikɛ ohomba wa nsanganya y’otsha l’olimu w’esambishelo?

⁴ Lende ndo etena kakɔna kahomba nsanganya shɔ salema? Lo dihole di’etshumanelo k’otondo sanganaka dihole diâmɛ, ayoleka dimɛna nsanganya shɔ salemaka l’ahole wotshikitanyi, tena efula lo mvudu y’anangɛso yele lo bɛtshi dia nkɛtɛ diahomba ase etshumanelo sambisha. Nyu kokaka nto kamba la Mbalasa ka Diolelo. Tshumanelo efula kambaka la Mbalasa ya Diolelo dia sala losanganya l’otsha l’olimu w’esambishelo yema tshitshɛ l’ɔkɔngɔ wa Sawo dia lo sɛkɛ ndo Wekelo wa Tshoto y’Etangelo. Pombaka sala la wolo dia mbewɔ dia sala losanganya etale kamboleka l’ɛtshi ka nkɛtɛ. Ɔnkɔnɛ, kokaka sɛdingolaka mbala la mbala dia ndjashikikɛ dia kana dihole diasalema nsanganya y’otsha l’olimu w’esambishelo diekɔ dimɛna di’anto sambisha l’ɛtshi kakɔ ka nkɛtɛ.

⁵ Woho wokengami ɛtshi ka nkɛtɛ mbahomba shikikɛ wonya woleki dimɛna wa nsanganya shɔ salemaka ndo mbala yahomba nsanganya shɔ salemaka lo lomingu. Ambola wayela anɛ mbeyaka mbakimanyiya dia shikikɛ lende ndo etena kakɔna koleki dimɛna sala nsanganya y’otsha l’olimu w’esambishelo.

⁶ Ɛtshi ka nkɛtɛ kakɔna kahomba ndeka mbidjama yimba? Wonya akɔna woleki dimɛna sambisha lo luudu la luudu? Onde la dikɔlɔ mbahombama kongɛ esambishelo ka lo luudu la luudu kana waendelo w’eyoyo? Awui tshɛ wendana l’olimu w’esambishelo pombaka panema lo dibaya dia waewoyelo. Apandudi wa Diolelo tshɛ kombolaka kindjakindja ɛtshi kawɔ ka nkɛtɛ lo yɛdikɔ yakokaso sho lawɔ mbuta oko wakate ɔpɔstɔlɔ Paulo ɔnɛ: ‘Dimi laya bu l’ɛtshi ka nkɛtɛ kahatasambishama.’—Romo 15:23.

7. Ɔkɛndɛ akɔna wele la ɔnɛ lalɔmbɔla losanganya l’otsha l’olimu w’esambishelo l’olui?

⁷ Ɔlɔmbwɛlɔ wa nsanganya y’otsha l’olimu w’esambishelo: Onto lele l’ɔkɛndɛ wa nɔmbɔla nsanganya y’otsha l’olimu w’esambishelo mɛnyaka dilɛmiɛlɔ di’efula diele la nde lo yɛdikɔ ya teokrasi shɔ lo ndjilɔngɔsɔlaka dimɛna. Nsanganya shɔ pombaka tatɛka la wonya, mongaka la wetshelo w’oshika ndo salemaka lo tshena pe, l’asa minitɛ 10 la 15. Ɔnɔmbɔdi pombaka teyi ɛtshi ka nkɛtɛ kayosambishama la ntondo ka losanganya tatɛ. Kânga mbele bu ohomba konga wanɛ wakoma l’ɔkɔngɔ wa losanganya l’otsha l’olimu w’esambishelo komɛ, ayonga dimɛna mbatshikɛ dui dia vɔ mbeya lɛnɛ ahombawɔ tosambisha. Anto tshɛ pombaka ntshɔ mbala kakɔ ɔtɔi l’ɛtshi kawɔ ka nkɛtɛ kam’ashila losanganya. Aha la tâmu, losanganya l’otsha l’olimu w’esambishelo lokongɛmi dimɛna ndo lele la wetshelo w’oshika layosha anto tshɛ woye alako w’amɛna wa kamba la wɔ l’esambishelo lushi lɔsɔ.—Tuk. 11:14.

8. Lo toho takɔna takoka wanɛ wɔtɔ lo nsanganya y’otsha l’olimu w’esambishelo kamba kâmɛ la wanɛ wayilɔmbɔla?

⁸ Wɔtwɛlɔ wa nsanganya y’otsha l’olimu w’esambishelo: Ekɔ ohomba kamba kâmɛ. (Heb. 13:17) Naka kokaka, ɔnɛ lalɔmbɔla olui pombaka kimanyiya onto tshɛ lele l’ohomba w’ekimanyielo. Ekɔ ohomba efula di’apandjudi wambohokɔ akambo monga lawɔ dia kimanyiya apandjudi w’eyoyo kana wanɛ wahataleke mpokɔ akambo. Wanɛ wetawɔ sambisha l’anto wotshikitanyi kokaka sala olimu wa dimɛna efula. (Tuk. 27:17; Romo 15:1, 2) Onto tshɛ pombaka sala la wolo dia komaka la wonya. Woho walɛnyaso yɛdikɔ ya teokrasi shɔ ndo wakanɛso asekaso ambetawudi ayotokimanyiya dia sho sala etshikitanu wahombama lo dikambo sɔ.—2 Kor. 6:3, 4; Fil. 2:4.

9. Lo toho takɔna t’amɛna takoka ambatshi mboka sukɛ yɛdikɔ shɔ?

⁹ Osukɔ w’oma le ambatshi mboka: Woho wasukɛ ambatshi mboka nsanganya y’otsha l’olimu w’esambishelo ekɔ ohomba efula ndo keketshaka anto tshɛ. Ekɔ mɛtɛ dia ambatshi mboka wekɔ l’ɛkɛndɛ efula. Lâdiko dia nɔmbɔla wekelo wa Bible ndo sala waendelo w’eyoyo, lushi la lushi, mbeyaka monga ko vɔ pombaka kotsha ɛkɛndɛ awɔ lo nkumbo ndo kamba elimu wa l’emunyi. Ɔnkɔnɛ, hatohombe nongamɛ di’ambatshi mboka wayosukɛka nsanganya yakɔ tshɛ y’otsha l’esambishelo yakongɛ etshumanelo, djekoleko naka yekɔ lo salema lushi tshɛ. Koko, ayonga dimɛna efula di’ambatshi mboka sukɛka nsanganya y’otsha l’olimu w’esambishelo lomingu tshɛ. Lo yɛdikɔ mɔtshi, nsanganya y’otsha l’olimu w’esambishelo kimanyiyaka dia mbetsha ase etshumanelo ndo diewo diele l’ambatshi mboka kokaka kimanyiya anto akina efula. Woho wasambishawɔ mbala la mbala ambâkimanyiya dia vɔ monga la diewo l’olimu w’esambishelo. Vɔ kokaka kimanyiya anto akina. Woho wasambishawɔ ndo wɔtɔwɔ lo nsanganya y’otsha l’olimu w’esambishelo l’ohetoheto tshɛ mbakonyaka bɛnyɛlɔ di’anto ndjela. Ndo kɔmatɛrɛ yashawɔ lo nsanganya shɔ kimanyiyaka efula.

10. Lande na kele ekɔ dimɛna di’apandjudi tshɛ ndjasha l’otema ɔtɔi dia sukɛ yɛdikɔ shɔ?

¹⁰ Oko wakidiɔ lo dikambo dia Yeso l’ambeki ande, olimu aso wa Diolelo ndeka kambema l’esambishelo ka lo luudu la luudu. Nsanganya y’otsha l’olimu w’esambishelo yekɔ l’oyango wa sho keketshana ndo kamba olimu ɔsɔ dimɛna. Apandjudi tshɛ wa lokumu l’ɔlɔlɔ pombaka sukɛka yɛdikɔ ya teokrasi shɔ lo yɛdikɔ yakoka. (Etsha 5:42; 20:20) Nyɛsɔ toyasha sho tshɛ l’otema ɔtɔi dia sukɛ yɛdikɔ shɔ. Lo sala ngasɔ, sho koka monga l’eshikikelo dia Jehowa ayotɔtshɔkɔla efula ndo tayokoka ngɛnyangɛnya otema waki Ɔnɔmbɔdi aso Yeso Kristo etena kasambishaso lokumu l’ɔlɔlɔ la Diolelo dia Nzambi.—Mat. 25:34-40; 28:19, 20.