Olimu Washa Ekeketshelo
1 Losango la lo Bible keketshaka wanɛ tshɛ walietawɔ ndo wakamba lalɔ lo nsɛnɔ yawɔ. (Osam. 19:7, 8) Lɔ mbakimanyiyaka dia ndjatshungola oma lo wetshelo wa kashi nd’oma lo ditshelo dia wâle ndo lɔ mbashaka elongamelo ka shikaa kendana la nshi yayaye. Koko, aha paka wanɛ wetawɔ lukumu l’ɔlɔlɔ ato mbakondja ɛlɔlɔ oma lɔkɔ. Wanɛ wasambisha awui wa mɛtɛ wa lo Bible washa ekeketshelo keketshamaka ndo vɔ lawɔ.—Tuk. 11:25.
2 Nde Akakeketshama oma l’Olimu w’Esambishelo: Yeso akate dia wanɛ wetawɔ mɛmba lɔkɔhɔ la koma ambeki ande, mbidja ndo olimu w’esambishelo la wa mbetɛ anto ambeki, ‘wayokondja ekeketshelo dia anima awɔ.’ (Mat. 11:29) Nde ndamɛ akɛnyi dia sambisha anto akina mbelaka ekeketshelo. Olimu ɔsɔ waki oko mbo ya ndɛ le nde. (Joa. 4:34) Lam’akandatome ambeki 70 dia tosambisha, vɔ wakangɛnangɛna lam’akawɛnyi woho wakatshɔkɔla Jehowa welo awɔ.—Luka 10:17.
3 Woho akɔ wâmɛ mbele ɛlɔ kɛnɛ Akristo efula wekɔ lo keketshama lo woho wayashawɔ l’olimu w’esambishelo. Kadiyɛso kɛmɔtshi akate ate: “Olimu w’esambishelo ekɔ ekeketshelo nɛ dia vɔ mbishakami ɛlɔmbwɛlɔ ndo oyango lo lɔsɛnɔ. Ekakatanu ami ndo ekiyanu wa lushi la lushi mbetaka lo dihole dia hende wonya wemi l’esambishelo.” Kadiyɛso kekina kele l’ohetoheto akate ate: “Olimu w’esambishelo . . . mboholakami lushi la lushi dia Jehowa ekɔ onto la mɛtɛ ndo dui sɔ mbishakami ki ndo ɔngɛnɔngɛnɔ wahamakoke kondja oma lo yoho kina.” Ande diɛsɛ diele laso dia monga “ekambi kame la [Nzambi]” lee!—1 Kor. 3:9.
4 Lɔkɔhɔ la Kristo Lekɔ Osadi: Kânga mbalɔmbawɔ Akristo dia ‘ndjaketembola la wolo tshɛ,’ Yeso hâlɔmbɛ dia mbisha kɛnɛ kahawakoke mbisha. (Luka 13:24) Ɔnkɔnɛ, nde tɔlɔmbaka la ngandji tshɛ dia ‘mɛmba kâmɛ la nde lɔkɔhɔ lande.’ (Mat. 11:29) Wanɛ wahomba ndɔshana l’ekakatanu wa wolo kokaka monga l’eshikikelo ɔnɛ olimu wakambɛwɔ Jehowa l’anima awɔ tshɛ, kânga mbewɔ l’elelo, mbɔngɛnyangɛnyaka.—Mako 14:6-8; Kol. 3:23.
5 Ekɔ mɛtɛ ekeketshelo dia kambɛ Nzambi kɔsa la nɛmɔ kɛnɛ tshɛ kakokaso sala lo dikambo dia lokombo lande! (Heb. 6:10) Nyɛsɔ tosalake la wolo dia mboshaka nshi tshɛ kɛnɛ koleki ɔlɔlɔ.