Tonge la Diɔtɔnganelo la Jehowa
1. Kakɔna kakayɛnaka kadiyɛso kɛmɔtshi lo kɛnɛ kendana l’elimu ande wa lo nyuma wa mbala la mbala?
1 Kadiyɛsɔ kɛmɔtshi k’Okristo akate ate: “Aya oko ɛnɔnyi 20 wemi l’atei w’akambo wa mɛtɛ, watshɔmi paka lo nsanganya ndo l’olimu w’esambishelo.” Koko, nde akakotsha nto ate: “Dimi lambɛna dia kânga mbele akambo asɔ wekɔ ohomba, vɔ vɔamɛ ato hawokoke sukɛmi etena katatɛ ekakatanu. . . . Lambɛna kakianɛ dia dimi pombaka tshikitanya kanyi yami ndo tatɛ ndjela ekongelo k’oshika ka wekelo dia dimi mbeya Jehowa dimɛna, mbôka ngandji ndo ngɛnangɛna la kɛnɛ kakatosha Ɔnande.”
2. Lande na kele ekɔ ohomba monga la diɔtɔnganelo la Jehowa?
2 Di’onto ndamɛ monga la diɔtɔnganelo di’oshika la Jehowa nɔmbaka mbidja welo. Kɛsɔ halɔmbɛ tsho dia ndjelaka ekongelo kɛmɔtshi k’olimu w’Okristo. Naka sho tshika di’aha monga la diɔtɔnganelo la Jehowa mbala la mbala lo dɔmbɛlɔ, kete l’edjedja ka wonya nde koka ndjokoma le so oko ɔngɛnyi ɔmɔtshi wa ngango wahatasawola lande. (Eny. 2:4) Nyɛsɔ tɔsɛdingole nganɛ wakoka tokimanyiya wekelo wa Bible w’onto ndamɛ ndo dɔmbɛlɔ dia monga la diɔtɔnganelo la Jehowa.—Osam. 25:14.
3. Ngande wahombaso salaka wekelo aso w’onto ndamɛ lo yoho yatokimanyiya dia ndjasukanya la Nzambi?
3 Dɔmbɛlɔ ndo Okanelo a Yimba ekɔ Ohomba: Wekelo w’onto ndamɛ walesha otema hakomɛ tsho lo mbekɛ eshidi l’ɛse k’awui w’ohomba wa lo wekelo kana nyanga avɛsa woshilami. Vɔ nɔmbaka dia kanyiya lo kɛnɛ kɛnya awui wekaso lo dikambo dia mboka, ɛlɛmbɛ, ndo lonto la Jehowa. (Etum. 33:13) Lam’ashihodiaso awui wa lo nyuma nsaki yaso munandemaka ndo dikambo sɔ totshutshuyaka dia kanaka yimba lo kɛnɛ kendana la nsɛnɔ yaso hita. (Osam. 119:35, 111) Wekelo w’onto ndamɛ pombaka salema l’oyango wa ndjasukanya le Jehowa. (Jak. 4:8) Wekelo w’oshika nɔmbaka wonya ndo dihole dia dimɛna ndo dia salaka wekelo ɔsɔ mbala la mbala pombaka ndjaekiya. (Dan. 6:10) Kânga naka lɔsɛnɔ layɛ ndola l’akambo efula, onde we ndjatshungolɛka etena lushi la lushi dia kanaka yimba lo waonga wa diambo waki Jehowa?—Esam. 119:147, 148; 143:5.
4. Ngande watokimanyiya dɔmbɛlɔ la ntondo ka sho tatɛ wekelo w’onto ndamɛ dia monga la diɔtɔnganelo la Jehowa?
4 Dɔmbɛlɔ di’oma k’ɛse otema ekɔ dikambo di’ohomba efula lo wekelo w’onto ndamɛ wa dimɛna. Di’akambo wa mɛtɛ wa lo Bible munanda etema aso ndo totshutshuya dia “[kambɛ, Nzambi] la mbongenyangenya la kenemo la woma,” sho tekɔ l’ohomba wa nyuma k’ekila kaki Nzambi. (Heb. 12:28) Ɔnkɔnɛ, sho pombaka tatɛka wekelo tshɛ la dɔmbɛlɔ dia nɔmba Jehowa nyuma kande. (Mat. 5:3) Lam’asɛdingolaso Afundelo ndo wakambaso la dihomɔ dia wekelo diasha ɔlɔngɔswamelo wa Jehowa, sho diholɛka Jehowa otema aso. (Osam. 62:8) Sala wekelo lo yoho shɔ ekɔ tshelo mɔtshi y’ɔtɛmwɛlɔ yɛnyaso ndjakimɔ kaso le Jehowa ndo yakeketsha omamemelo aso le nde.—Jude 20, 21.
5. Bonde kele ekɔ ohomba le so dia kanaka yimba l’Ɔtɛkɛta wa Nzambi lushi tshɛ?
5 Oko wokodiongaka lo diokanelo tshɛ, diokanelo diasaso la Jehowa pombaka keketshamaka mbala la mbala woho wa diɔ tshikala nge lo lɔsɛnɔ laso l’otondo. Ɔnkɔnɛ, nyɛsɔ tosombake etena lushi la lushi dia ndjasukanya la Nzambi, teya ɔnɛ nde lawɔ, ayoyasukanya leso.—Osam. 1:2, 3; Ef. 5:15, 16.