Sala tshɛ dia ndeka nkondja wahɔ oma lo wekelo ayɛ w’onto ndaamɛ

LANDE NA KELE DUI SƆ OHOMBA?: Wekelo w’onto ndamɛ w’Ɔtɛkɛta wa Nzambi tokimanyiyaka dia “nshihodia dimɛna wekeke, otale, wemema ndo ɔhɔngɔ” w’akambo wa mɛtɛ. (Ɛf 3:18) Vɔ tokimanyiyaka nto diaha monga l’onongo ndo aha la vadi l’andja ɔnɛ wa kɔlɔ ndo ntetemala “[nkimɛ] ɔtɛkɛta wa lɔsɛnɔ wolo.” (Flp 2:15, 16) Wekelo w’onto ndamɛ w’Ɔtɛkɛta wa Nzambi tokimanyiyaka dia nsɔna dihomɔ diele la so ohomba shoamɛ. Akokaso nsala dia nyomoleka nkondja wahɔ oma lo wenya wetshaso dia mbadia ndo mbeka Bible?

WOHO WA NSALA DUI SƆ:

• Ekɛ eshidi l’avɛsa ndo ɔsaka nɔtɛ lo Bible kayɛ ka l’anya kana ka lo telefɔnɛ, tablɛtɛ kana ka l’ɔrdinatɛrɛ

• Yaoka ambola anɛ etena katayadia Ɔtɛkɛta wa Nzambi: ‘Onto akɔna? Dui diakɔna? Etena kakɔna? Dihole diakɔna? Lande na? Woho akɔna?’

• Yanga dia mbeya awui woho wewɔ. Kamba la dihomɔ di’eyangelo diele la so ndo nsala eyangelo lo ndjela ɔtɛ a dui kana divɛsa dia lo Bible

• Kana yimba la dui diadishayɛ ndo enda woho wendanadiɔ la yɛ

• Kamba la kɛnɛ kekayɛ lo lɔsɛnɔ layɛ la lushi la lushi.​—Luk 6:47, 48

NYENDE VIDƐO YELE L’ƆTƐ A DUI ƆNƐ: “WOHO WA NTSHIKALA NGE” DIƐSƐ LA WEKELO WA DIMƐNA WA BIBLE W’ONTO NDAMƐ, NDO OMA LAASƆ, NYOKADIMOLE LO AMBOLA WAYELA ANƐ:

• Kakɔna kakate anto amɔtshi lo dikambo dia wekelo w’onto ndamɛ?

• Lande na kahombaso tatɛka la dɔmbɛlɔ etena tshɛ kasalaso wekelo w’onto ndamɛ?

• Kakɔna kakoka tokimanyiya dia ndeka nshihodia divɛsa dimɔtshi dia lo Bible?

• Tolembetelo ta ngande tahombaso mbidjaka lo Bible kaso ka wekelo?

• Lande na kele ekanelo ka yimba kekɔ ohomba efula etena kekaso Ɔtɛkɛta wa Nzambi?

• Ahombaso salaka la kɛnɛ kekaso?