Ohomba w’Efula Wele la Lomba l’oma le Nzambi
1 Anto amɔtshi mbɔsaka di’Ɛmɛnyi wa Jehowa la dia mbidja welo awɔ paka dia kimanyiya anto dia kitshakitsha ekakatanu walɔshana lawɔ ɛlɔ kɛnɛ. Anto asɔ hawɛnyi ohomba w’efula wele l’olimu aso wa wetshelo wa Bible. Ekɔ oko wakafunde Paulo ate: “Ne dia diui dia utamba [w’asui] dieli dikambu di’enginya le wane wakashisho, keli le su, shu wane wakashimbamela, dio dieko wulu a [Nzambi].” (1 Kor. 1:18) Lo mɛtɛ, sho mbeyaka di’olimu w’Okristo ekɔ olimu woleki ohomba wakambema nshi nyɛ la nkɛtɛ.
2 Lɔsɛnɔ la Dimɛna Kakianɛ: Welo wadja anto dia kandola ekakatanu wamonga paka l’etombelo wa yema tshitshɛ. Ɛlɛmbɛ washimba awui wa ngala hawotondoya dia shidiya ofulanelo w’awui wa ngala. Toseke ta wɔladi ndo asɔlayi watomawɔ dia todja wɔladi hashidiya ata. Tɛdikɔ tɔsama di’anto sɛna dimɛna hatoshidiya wola. (Osam. 146:3, 4; Jer. 8:9) Losango la Diolelo lo wedi alɔ kimanyiyaka anto dia tshikitanya nsɛnɔ yawɔ lo mbakimanyiya dia vɔ ndɔta lonto l’oyoyo letawɔma le Nzambi. (Romo 12:2; Kol. 3:9, 10) Lo sala ngasɔ, vɔ wekɔ oma ko kakianɛ la yoho ya lɔsɛnɔ la dimɛna.—1 Tim. 4:8.
3 Nshi Yayaye ya Dimɛna: Lâdiko dia tokimanyiya dia sho ndɔshana l’ekakatanu wahomana laso ɛlɔ kɛnɛ, lomba l’oma le Nzambi tokimanyiyaka nto dia sho nɔngɔsɔla dimɛna nshi yayaye. (Osam. 119:105) Lɔ tokimanyiyaka di’aha mbidja welo w’anyanya dia nyanga woho wa nɔngɔsɔla dikongɛ nɛ di’akambo. (Und. 1:15; Romo 8:20) Tekɔ l’ɔngɛnɔngɛnɔ lo woho wahatetsha nsɛnɔ yaso lo tayangaka diangɔ di’anyanya! Lo dihole dia sala ngasɔ, sho mbidjaka welo aso tshɛ lo daka diaki Jehowa diendana l’“ulungu w’uyuyu la nkete y’uyuyu” lɛnɛ ayonga akambo w’ɔlɔlɔ. Lam’ayoya lushi l’elombwelo laki Jehowa, ayɛnama hwe dia wanɛ wakayaɛkɛ lo lomba l’oma le Nzambi wakasale ɔsɔnwɛlɔ wa dimɛna.—2 Pet. 3:10-13; Osam. 37:34.
4 Kânga mbele lomba l’oma le Nzambi mbeyaka la mɛnama oko ɛngɔ kele bu ohomba le wanɛ wayasha tshɛ lo ‘lomba la dikongɛ nɛ di’akambo,’ lɔ mɛtɛ lekɔ ɛngɔ ka dimɛna efula kahombaso nyanga. (1 Kor. 1:21; 2:6-8) Ɔnkɔnɛ, tekɔ lo tetemala la sambisha lo nkɛtɛ k’otondo losango l’oma le Nzambi ɔnɛ lele ‘ndamɛ kele kanga lomba.’—Romo 16:27.