Endaka Dimɛna Woho Wakambayɛ la Wenya Ayɛ

1. Okakatanu akɔna wele l’anto wa l’ahole tshɛ ɛlɔ kɛnɛ?

¹ L’etena kɛnɛ kaya diangɔ efula diakimanyiya dia lotumu salema esadi esadi ndo aha l’onto sowa efula, anto efula mɛnaka dia wekɔ l’akambo efula wa sala koko vɔ bu la wenya efula wa mbâsala. Onde wɛ mɛnaka di’ekɔ wolo monga l’ekongelo k’ɔlɔlɔ k’akambo wa lo nyuma? Onde wɛ kombolaka monga la wenya efula wa sambishaka? Ngande wakokaso kamba la wenya aso lo yoho yoleki dimɛna?​—⁠Osam. 90:12; Fil. 1:​9-11.

2, 3. Ekakatanu akɔna wambela awui wa tshulatshula, ndo ngande wakoka onto l’onto l’atei aso ndjasɛdingola lo dikambo sɔ?

² Eya Awui Wakɔsɛ Wenya Wɔsɔsa: Sho tshɛ pombaka sɛndingolaka mbala la mbala woho wakambaso la wenya aso. Bible tokeketshaka ɔnɛ: “Nyewo ololo uku [akɛndakɛndanyu] aha uku dinginya, keli uku akanga a [t]imba. Nyuyatshungweli etena, ne dia nshi nye yeko kolo.” (Ef. 5:​15, 16) Tɔsɛdingole ekakatanu waya oma l’ohamelo wa tshulatshula diendana la wewoyanelo wa sango. Kânga mbakokaso kamba dimɛna l’ɔrdinatɛrɛ ndo la diangɔ dikina, diangɔ sɔ koka ndjokoma djonga le so naka hatendji dimɛna woho wakambaso la wenya aso.​—⁠1 Kor. 7:​29, 31.

³ Onto tshɛ l’atei aso pombaka ndjambola ɔnɛ: ‘Onde dimi mbetshaka wenya lushi tshɛ dia mbadia kana kadimola awui w’anyanya walongolami l’Ɛtɛrnɛtɛ? Onde dimi ndjashaka mbala la mbala dia sawola l’anto lo telefɔnɛ kana lo fundanɛka la wɔ awui w’anyanya? (1 Tim. 5:13) Onde dimi mbetshaka wenya efula l’Ɛtɛrnɛtɛ aha l’oyango wa shikaa, kana la ntondo ka televisiɔ lo tatshikitanyaka waa emisiɔ? Onde tɔkɛnyɔ ta l’ɔrdinatɛrɛ tambotatɛ mbɔsɛmi wenya wahombami mbetsha lo wekelo ami w’Ɔtɛkɛta wa Nzambi?’ Ndjasha l’akambo wa ngasɔ koka ndjolanya lonyuma laso.​—⁠Tuk. 12:⁠11.

4. Etshikitanu akɔna wakasale ɔlɔngɔlɔngɔ ɔmɔtshi, ndo lande na?

⁴ Kamba Dimɛna la Wenya: Awui wa tshulatshula tɔsɛka wenya ndo yambalo. Ɔlɔngɔlɔngɔ ɔmɔtshi lakayasha tshɛ lo tɔkɛnyɔ ta l’ɔrdinatɛrɛ aketawɔ ate: “Mbala efula etena kakamakɛnyaka tɔkɛnyɔ ta l’ɔrdinatɛrɛ la ntondo ka ntshɔ l’esambishelo kana lo losanganya lɔmɔtshi l’Akristo, lakikɔ l’okakatanu wa wolo dia mbidja yambalo. Mbala tshɛ lakakanyiyaka woho wayomotoleka kɛnya dimɛna lam’ayomokalola la ngelo. Dimi kondjashaka nto lo wekelo w’onto ndamɛ ndo lo wadielo wa Bible. Ɔngɛnɔngɛnɔ ami wa kambɛ Nzambi wakatatɛ la kitakita.” Lam’akandeye ɔnɛ nde pombaka sala etshikitanu, nde akanya awui tshɛ wendana la tɔkɛnyɔ waki l’ɔrdinatɛrɛ ande. Nde mbetawɔka ate: “Sala dikambo sɔ komonga dikambo dia wɔdu. Lakayoyashaka lo tɔkɛnyɔ woho wakimi kokanyiyaka. Koko dimi laki l’ɔngɛnɔngɛnɔ w’efula l’otshumba wakamadje nɛ dia lakeyaka dia lakasale dui sɔ dikambo dia wahɔ ami hita.”​—⁠Mat. 5:​29, 30.

5. Ngande wakokaso ndjatshungolɛka etena ka sala akambo wa lo nyuma, ndo wahɔ akɔna wayotokondja lo sala dui sɔ?

⁵ Mbeyaka monga ohomba mbɔsa tɛdikɔ ta ngasɔ naka ekɔ awui amɔtshi wahombayɛ sala etshikitanu. Onde wɛ kokaka ndjatshungolɛka minitɛ 30 lushi tshɛ oma l’elimu ɛmɔtshi wele bu ohomba? Mbadiaka Bible minitɛ 30 lo lushi ayokimanyiya dia shidiya kiada l’ɔkɔngɔ w’ɔnɔnyi ɔtɔi. Kɛsɔ ayokela mɛtɛ wahɔ efula wa lo nyuma! (Osam. 19:​7-11; 119:​97-100) Yatshungolɛka etena dia mbadiaka Bible, dia nɔngɔsɔlaka nsanganya, ndo dia sambishaka. (1 Kor. 15:58) Salaka ngasɔ ayokokimanyiya dia mbeya awui wakɔsɛ wenya wɔsɔsa ndo dia wɛ ‘nshihodia lolango la Jehowa.’​—⁠Ef. 5:⁠17.