Woho Wa Ndjatshungolɛ Etena K’ɔlɔlɔ
1 Lam’ele tekɔ la lotumu efula l’olimu wa Jehowa, sho kema l’etena mɛtɛ. (1 Kor. 15:58) Sho mbeyaka ɔnɛ ekɔ ohomba efula di’onto mbekaka ndamɛ ndo lo nkumbo, mbalaka Bible lushi la lushi, nɔngɔsɔlaka nsanganya ndo mbɔtɔka lɔkɔ, kâmɛ ndo sambishaka tena la tena. Emendji salaka olimu w’anami w’ɛkɔkɔ ndo kambaka ntumu kina y’endana l’etshumanelo. Amɔtshi wekɔ l’ɛkɛndɛ wa lo nkumbo wa wetsho kana wa weho la weho. Ekɔ ohomba efula dia ɔm’ɔmɔ a l’atei aso monga lo wɛdimo ndo la ekongelo k’ɔlɔlɔ woho wa nde mbidja lo ntsha akambo tshɛ.
2 Tetsha Elimu Ɛmɔtshi la Ntondo: Sho pombaka monga la shɛnɔ ndo tshundju naka sho nangaka ‘ndjatshungolɛ etena k’ɔlɔlɔ.’ (Ef. 5:15, 16) Sho pombaka mbeya “akambo woleki ohomba” ndo mbadja la ntondo l’ɔnɔngɔ w’elimu aso woleki ohomba. (Fil. 1:10, NW) Atshukanyi amɔtshi wakɛnya woho wele luudu lawɔ la Teokrasi nganɛ: “Lɔsɛnɔ laso ndola l’akambo wa mɛtɛ . . . . Mɛtɛ kema paka yoho mɔtshi ya lɔsɛnɔ laso koko, tɔ kekɔ lɔsɛnɔ laso. Akambo akina tshɛ tshimbaka paka lawɔ.” Ekɔ ohomba efula sho mbidja ɔtɛmwɛlɔ wa Jehowa la olimu Ande lo dihole dia ntondo lo lɔsɛnɔ laso.
3 Tolembete Kɛnɛ Katɔlɛ Wenya: Lomingu lekɔ l’eshidi 168, ndo sho pombaka kamba la wenya aso la kiɔmi. Dia monga la wenya efula wa mbetsha l’elimu wa Teokrasi, sho pombaka nembetɛ akambo watɔlɛ wenya ndo minya amɔtshi. Lo ndjela ɔkɔnya ɔmɔtshi, Ose Amɛrika lele yema oko yanga mendaka televisiɔ eshidi ndekana 30 lo lomingu! Akina mbetshaka wenya efula la mbala ekanda wa l’andja ɔnɛ. Amɔtshi koka mɛna dia vɔ mbetshaka wenya amboleka lo ntsha akambo l’olui, lo tɔkɛnyɔ, lo sɛnyaka washo kana la ntondo k’ɔrdinatɛrɛ. Ondo sho pombaka sɛdingola ekongelo kaso ka wenya ka lushi la lushi dia menda woho wa kamba l’etena kaso dimɛna. Naka sho monga la lomba, kete tayosusa wenya wetshaso l’akambo wele bu ohomba efula.
4 Tônge l’Ekongelo ka Wenya k’Ɔlɔlɔ: Oyadi akambo akɔna wele la so, sho tshɛ pombaka ndjatshungolɛ etena dia kotsha eyango aso wa lo nyuma. Amɔtshi wakɛnyi dia lam’atatɛwɔ olimu kɔ̂lɔmɔ lushi tshɛ, vɔ salaka awui efula. Naka sho mbetshaka wenya efula dia koma l’olimu kana lo kongaka akina, kete sho kokaka mbɔsa diaaso sɔ dia mbala Bible, nɔngɔsɔla nsanganya kana nonga bandɛ yatotondjɛ la Société. Nkumbo kondjaka wâhɔ efula naka vɔ ndjashikikɛka wonya shikaa ndo tena dieyama dia mbeka kâmɛ. Naka ase nkumbo tshɛ nɛnya wonya wa wekelo wa lo nkumbo, kete onto l’onto ayokondja wonya efula wa nde mbeka ndamɛ.
5 Lam’atete wonya, mbahombaso nyomoleka mbeya ɔnɛ “nshi yaya ka nshila.” (1 Kor. 7:29) Lɔsɛnɔ laso nemanɛka la woho wakambaso la etena kɛsɔ k’oshinga wolo. Tayɔtshɔkwama naka sho ndjatshungolɛ etena k’ɔlɔlɔ l’oweso wa mbidja wâhɔ wa Diolelo lo dihole dia ntondo.—Mat. 6:33.