Wɔtwɛlɔ wa lo Nsanganya wa Mbala la Mbala Ekɔ Dui Dioleki Ohomba
1 Nkumbo y’Akristo mbɔsaka dia wɔtwɛlɔ wa lo nsanganya mbala la mbala ekɔ dui dioleki ohomba. Koko ɛlɔ kɛnɛ, awui wa lo lɔsɛnɔ koka ndjonga tshondo y’okakatanu. Onde elimu wa la ngelo, wa l’emunyi kana adɛvɔara wa la kalasa wambotatɛ monga la shɛngiya lo wenya wakatayaombɛ dia tɛmɔlaka Jehowa? Mɛna akambo oko awaɛna Jehowa ayotokimanyiya dia mbetshaka nshi tshɛ awui woleki ohomba lo dihole dia ntondo.—1 Sam. 24:6; 26:11.
2 Lo mina kunyi lushi la Sabato pami kɛmɔtshi k’ose Isariyɛlɛ kɔmbɔsa akambo oko akawaɔsaka Jehowa. Ondo nde akate ɔnɛ ka ehomba wa nkumbo kami mbakotshami kana ɔnɛ ɔsɔ ekɔ dui dia tshitshɛ. Koko, lo ndjela dilanya diakakondja pami kɛsɔ, Jehowa akɛnya dia sala olimu okina lo wonya wakalɔngɔswama dikambo di’ɔtɛmwɛlɔ aki dui dia kɔlɔ efula.—Wal. 15:32-36.
3 Okakatanu Wahombaso Tondoya: Le anto efula ekɔ tshondo ya ta di’aha elimu wa l’emunyi mbadjɛ wekamu lo wɔtwɛlɔ wa lo nsanganya. Amɔtshi wakatondoya wekamu ɔsɔ lo tɛkɛta l’ewandji awɔ w’olimu, lo mengɔnya l’asekawɔ wakamba la wɔ wenya, lo nyanga olimu okina wakoka, kana lo ndjanyɛ diangatangata. Lo mɛtɛ, welo wa ngasɔ wadjama lo dikambo di’ɔtɛmwɛlɔ wa mɛtɛ ngɛnyangɛnyaka Nzambi.—Heb. 13:16.
4 Adɛvɔara wa la kalasa koka nto mbidja wekamu. Osekaseka ɔmɔtshi mbutaka ate: “Dimi salaka adɛvɔara ami amɔtshi la ntondo ka ntshɔ lo nsanganya ndo akina etena kakalolami la ngelo.” Naka adɛvɔara tshɛ hawoshidi la dikɔlɔ diasalema losanganya, ambutshi amɔtshi mbokiyaka embetsha dia wɔtwɛlɔ wa lo nsanganya y’Akristo ekɔ dui dioleki ohomba le nkumbo kawɔ.
5 Okambelo wa kâmɛ ndo ekongelo ka dimɛna ekɔ awui wele ohomba dia shidiya elimu wa la ngelo la wonya ndo nɔngɔswama di’aha ase nkumbo tokoma lo nsanganya l’ɔkɔngɔ. (Tuk. 20:18) Pombaka mbetsha kânga ana w’akɛnda ɔnɛ lo wonya kapanda onto la dia shidiya ndjalɔtshiya ndo monga suke dia ntshɔ lo losanganya. Oma l’ɛnyɛlɔ kawɔ, ambutshi kokaka mɛnya anawɔ ohomba wa nsanganya.—Tuk. 20:7.
6 Oko wataleke fulanɛ ekakatanu wa lo dikongɛ di’akambo nɛ, ekɔ ohomba sho mbɔtɔka mbala la mbala lo nsanganya ya l’etshumanelo. Nyɛsɔ tɛnake akambo woho wawaɛna Jehowa ndo tetsha wɔtwɛlɔ wa lo nsanganya dui dioleki ohomba le so.—Heb. 10:24, 25.