Mishiki wa Dimɛna
1 Wembelo ndo mishiki wekɔ etenyi kɛmɔtshi k’ɔtɛmwɛlɔ wa mɛtɛ. L’Isariyɛlɛ w’edjedja, Asafu nde l’anango wakembe vate: “Nyuki [Jehowa] losaka. . . . Nyuwimbeli esambu, nyuwimbeli esambu wa nemo. Nyotekete dia akambu andi wa mamba tshe!” (1 Ek. 16:8, 9) Ɛlɔ kɛnɛ sho sanganyaka awoyi aso kâmɛ dia membɛ Jehowa lo nsanganya yaso ya l’etshumanelo ya lomingu la lomingu. (Ef. 5:19) Ɔsɔ ekɔ mɛtɛ diaaso dia dimɛna dia tombola lokombo la nde!—Osam. 69:30.
2 Olongelo wa Mélodies du Royaume, mbut’ate esambo wa Diolelo wakadjama l’eshinga, koka ndodia timba taso la tokanyi ta lo nyuma. Kadiyɛso kɛmɔtshi akate ate: “Etena kembama esambo, dimi mbohɔka ɛtɛkɛta akɔ lo yimba yami. Ɔsɔ ekɔ mɛtɛ yoho ya dimɛna ya dimi mbohɔka Jehowa etena ka ngɛnangɛnami la mishiki!”—Fil. 4:8.
3 Waaso wa Sho Ngɛnangɛna la Mishiki: Ohomelo wa Mélodies du Royaume, mbut’ate mishiki wa Diolelo la ngelo mbishaka wangasanu wela ɔngɛnɔngɛnɔ wa lo nyuma wakimanyiya dia wɔladi monga l’atei wa nkumbo. Nkumbo kɛmɔtshi akafunde ɔnɛ: “Sho mbidjaka esambo wa Diolelo mbala la mbala lakaso ndo etena keso lo mutuka ndo hatɔlɛmbɛ dia mpokamɛ mishiki wa dimɛna ɔsɔ wakadjama l’eshinga. Mbala la mbala Mélodies du Royaume, toshaka ki ka lo yimba etena keso lo nsanganya y’Akristo kana lam’atatatshu otsha lo nsanganya ya weke.” Kadiyɛso kɛmɔtshi akate ate: “Etena kahokamɛmi esambo wa Diolelo lam’asalami ntumu ya la ngelo, vɔ mbishakami ɔngɛnɔngɛnɔ efula, koyanga etena kemi lo mɔmba ahɔndɔ. Dimi pomaka mishiki ɔnɛ efula lam’okami dia yimba yami yambɔkɔmɔ. Mishiki wekɔ mɛtɛ la shɛngiya efula le onto! . . . Osambo tshɛ mbishaka ɔngɛnɔngɛnɔ.” Onde ekɔ waaso amɔtshi wakoka mishiki wa dimɛna ɔsɔ monga la wahɔ le yɛ?
4 Efula ka nkembo yembama nshi nyɛ kɛnɛmɔlaka yimba ya l’andja ɔnɛ. Ambutshi koka kimanyiya anawɔ dia vɔ mongaka la mposa ka mishiki w’ɔlɔlɔ lo kamba dimɛna la Mélodies du Royaume, mbut’ate esambo wa Diolelo wakadjama l’eshinga. Efula k’ambeki wa Bible ndo wanɛ wayasha l’akambo wa mɛtɛ wayɔngɛnangɛna vɔ lawɔ dia mbeya esambo wa lo nyuma ɛsɔ, watombola Jehowa ndo wakeketsha yimba.—Osam. 47:1, 2, 6, 7.