Jehowa Kimanyiyaka Wanɛ Wayaɛkɛ le Nde
1 Anto efula mɛnaka dia falanga, lowandji ndo akoka wele l’onto ekɔ akambo w’ohomba dia monga l’ɔngɛnɔngɛnɔ. (Esam. 12:4; 33:16, 17; 49:6) Koko, wanɛ woka Jehowa wɔma ndo wayaɛkɛ le nde, wekɔ l’eshikikelo kasha Bible dia “ndi keli ekimanyelu kawo la engawo kawo.” (Osam. 115:11) Nyɛsɔ tɔsɛdingole akambo ahende weso l’ohomba wa mɛnya wɛkamu aso le Jehowa.
2 Oko Weso Ekambi w’Akristo: Sho pombaka ndjaɛkɛ le Nzambi kaso etena tshɛ kashaso wetshelo l’etshumanelo kana l’olimu w’esambishelo. Tɔsɛdingole ɛnyɛlɔ kaki Yeso. Kânga mbakinde Ɔnaki Nzambi, nde kondjaɛkɛ lo lomba lande kana lo akoka ande hita, koko nde akayaɛkɛ tshɛ le She lele l’Olongo. (Joa. 12:49; 14:10) Tekɔ mɛtɛ l’ohomba wa sala woho akɔ wâmɛ! (Tuk. 3:5-7) Paka oma lo wolo waki Jehowa mbakoka welo wadjaso mbotombola kana monga la wahɔ le anto akina.—Osam. 127:1, 2.
3 Sho mɛnyaka dia sho ndjaɛkɛka le Jehowa lo nɔmba ɛlɔmbwɛlɔ ndo ekimanyielo ka nyuma kande k’ekila. (Osam. 105:4; Luka 11:13) Ndo nto, sho mɛnyaka dia sho ndjaɛkɛka le Nzambi lo sala dia wetshelo aso tombaka paka oma lo Bible, mbut’ate oma l’Ɔtɛkɛta ande. Losango latɔ lekɔ la wolo wa munanda etema w’anto ndo tshikitanya nsɛnɔ yawɔ. (Heb. 4:12) Jehowa ekɔ lo tombwama etena ‘kakambaso olimu lo ndjaɛkɛ lo wolo watosha Nzambi.’—1 Pet. 4:11.
4 Lam’alɔshanaso l’Ekakatanu: Lam’alɔshanaso l’ekakatanu ndo la tɔsɛngiya tɔmɔtshi, tekɔ l’ohomba wa nyanga ekimanyielo le Jehowa. (Osam. 46:1) Ɛnyɛlɔ, owandji aso w’olimu mbeyaka mboka wolo tosha dikimɔ dia sho tɔtɔ lo losanganya kana sho mbeyaka monga l’okakatanu ɔmɔtshi wa wolo lo nkumbo kaso. Sho mɛnyaka dia sho ndjaɛkɛka le Jehowa lo mbɔlɔmbaka ndo lo kambaka l’ɛlɔmbwɛlɔ katoshande oma l’ekimanyielo k’Ɔtɛkɛta ndo k’ɔlɔngɔswamelo ande. (Esam. 62:8; 119:143, 173) Lo sala ngasɔ, ekambi waki Jehowa mɛnaka ekimanyielo kande lo nsɛnɔ yawɔ.—Esam. 37:5; 118:13, 16.
5 Jehowa ndamɛ toshikikɛka ɔnɛ: “Untu latekamaka [Jehowa] eli la otshoko; la [ɔnɛ lele Jehowa mb]eli elungamelu kandi.” (Jer. 17:7) Nyɛsɔ tɛnyake dia sho ndjaɛkɛka le nde lo kɛnɛ tshɛ kasalaso!—Osam. 146:5.