Tɔlɔmbɔlɛ Wekelo wa Bible Watahame

Etenyi 1: Wekelo wa Bible Kɛdikɛdi Na?

¹ L’andja w’otondo, suke la miliyɔ shamalo y’ambeki wa Bible wekɔ lo nɔmbwama ngɔndɔ tshɛ oma le ekambi waki Nzambi. Lo kamba la toho ta wetshelo ta dimɛna, sho koka kimanyiya ambeki wa Bible asɔ dia vɔ pama polo lo vɔ ndjoyakimɔ ndo batizama ndo ndjonga ‘l’akoka wa mbetsha anto akina.’ (2 Tim. 2:⁠2) Onde wɛ nangaka kimanyiya ombeki ayɛ dia nde sala ohamelo wa ngasɔ? Tatɛ lo numɛlɔ kɛnɛ, Olimu Aso wa Diolelo ayotondja weho w’asawo anɛ wayolembetshiya awui w’ohomba wendana la woho wa nɔmbɔla wekelo wa Bible watahame.

² Etena ka Mbadia Onto dia Nde Aya Ombeki wa Bible: Naka wɛ kɛtshanyaka l’onto mbala la mbala awui wa lo Bible, lo ndjela toho tɔmɔtshi ta wekelo, kânga lo tshena pe, lo kamba la Bible kana okanda ɔmɔtshi wekaso l’anto Bible, kete wɛ ekɔ lo nɔmbɔla wekelo wa Bible. Ɔsɔku mbediɔ, oyadi tekɔ lo mbeka l’onto lakande kana lo telefɔnɛ. Onto ɔsɔ koka mbadiema oko ombeki wa Bible, naka tambeka la nde mbala hiende tatɛ oma l’ɔkɔngɔ wa sho mɛnya woho wekaso l’anto Bible ndo naka sho mɛnaka dia wekelo wayotetemala.

³ Biukubuku Katɔlɔmba ndo dibuku Ewo mbele ekanda wakamba laso dia mbeka l’anto efula Bible. L’ɔkɔngɔ wa sho shidiya mbeka l’onto ekanda ɛsɔ, naka tekɔ lo mɛna di’onto ekɔ lo tahame, oyadi ɔkɔkɛ, ndo naka nde ngɛnangɛnaka kɛnɛ kekande, kete lâsɔ wekelo mbeyaka tetemala lo dibuku Tɛmɔla Nzambi. Sho koka kamba la biukubuku Wɛ Kokaka Monga Ɔngɛnyi wa Nzambi! dia mbeka l’anto waki kɔmbɔtɔ kalasa efula kana wele bu l’akoka wa mbadia dimɛna.

⁴ Olimu aso wa mbeka l’anto Bible wambokimanyiya miliyɔ y’anto dia vɔ koma ambeki wa mɛtɛ waki Yeso Kristo. (Mat. 28:​19, 20) Lo kamba l’alako wayoshama l’asawo akina wayela wa woho ɔnɛ, wɛ ayokoka nɔmbɔla wekelo wa Bible watahame.