Tɔlɔmbɔlɛ wekelo wa Bible watahame wa lo tshena pe ndo wa lo telefɔnɛ
1. Naa oyango wele laso lam’alɔmbɔlaso wekelo wa Bible?
1 Tatɛ wekelo wa Bible ekɔ dikambo di’ɔngɛnɔngɛnɔ efula! Koko, aha naka tambotana onto lalanga mbeka Bible kete lâsɔ amboshila. Oyango wa wekelo ele dia kimanyiya onto dia nde koma ombeki w’oshika waki Kristo. (Mat. 28:19, 20) Kakɔna kakoka tokimanyiya dia kotsha oyango ɔsɔ?
2. Elɛwɔ wekelo wa Bible wa lo tshena pe ndo wa lo telefɔnɛ, ndo lande na kewɔ l’etombelo w’ɔlɔlɔ?
2 Anto wele la wesanu: Anto hawoyoleka monga la diaaso nshi nyɛ. L’ahole amɔtshi, tɔtɔi toto mbetawɔ mbɔsa wonya a tango w’otondo dia mbeka Bible mbala ka ntondo. Dia kimanyiya weho w’anto asɔ, sho keketshamaka dia tatɛ ndo nɔmbɔla wekelo wa Bible wa lo tshena pe kana wa lo telefɔnɛ. Lo etatelo, wekelo wa ngasɔ mbeyaka monga mondo ndo nɔmbaka dia sho sɛdingola avɛsa angana ato lo kamba la odingɔ ɔtɔi kana ehende w’okanda ɔmɔtshi wele oko dibuku Bible etshatɔ. Ekɔ dikambo di’ɔngɛnɔngɛnɔ nɛ dia apandjudi efula wekɔ lo nɔmbɔla wekelo wa Bible wa lo tshena pe kana wa lo telefɔnɛ!
3. Lande na kahatahombe komɛ tsho lo nɔmbɔla wekelo wa lo tshena pe?
3 Ko onde lâsɔ tayokomɛ tsho lo nɔmbɔlaka paka wekelo wa lo tshena pe? Kema. Kânga mbakambaso la shɛnɔdi diaha ndeka mbɔsa wenya lo wekelo wa ntondo, Olimu aso wa Diolelo wa Ngɔndɔ ka dikumi l’ahende 1990, lɛkɛ 8, mbutaka ɔnɛ: “Naka ekongelo ka wekelo kamboshikimala ndo ompokami mɛnyaka nsaki, kete wekelo koka ndjɔsa etena k’otale.” Dikambo sɔ diekɔ ohomba. Tɔshi ɛnyɛlɔ: Vɔ mbeyaka tatɛ mbisha ɔna lele la ndjala yangɔ ya ndɛ ya tshitshɛ l’etena kɛmɔtshi, koko dia nde keketala ndo mbola dimɛna, ombutshi ande hatowoshaka paka yangɔ ya ndɛ ya tshitshɛ tsho ngɔndɔ ko ngɔndɔ kana ɛnɔnyi ko ɛnɔnyi. Woho akɔ wâmɛ mbele, dia ombeki wa Bible koma okambi waki Nzambi wambotshunda paka mbekaka la nde dimɛna ndo mbala la mbala.—Heb. 5:13, 14.
4. Ɛlɔlɔ akɔna wakondjaso lo nɔmbɔla wekelo wa Bible wa yema otale?
4 Wekelo wa Bible wa yema otale: Ndeka dimɛna nɔmbɔla wekelo lo dihole diaha ofukutanu efula, oko lo lokombo kana lo dihole dikina dia dimɛna. Kɛsɔ ayonyokimanyiya dia wekelo mbeta dimɛna ndo dia ombeki shihodia Ɔtɛkɛta wa Nzambi dimɛna. (Mat. 13:23) Kɛsɔ ayokimanyiya ndo ombetsha dia nde mbɔtɔnganyiya wekelo la ehomba w’ombeki. Ndo nto, mbeka lo etena k’otale ayonyokimanyiya dia nyu manyamanya Ɔtɛkɛta wa Nzambi lo yoho ya dimɛna ndo yakeketsha mbetawɔ.—Romo 10:17.
5. Ngande wakokaso mbeta oma lo wekelo wa lo tshena pe otsha lo wɔnɛ wa yema otale?
5 Ngande wakokayɛ mbeta oma lo wekelo wa lo tshena pe otsha lo wɔnɛ wa yema otale? L’ɔkɔngɔ wa nyu mbeka mbala efula lo tshena pe, lande na kahayalɔmbɛ ombeki ayɛ dia nyu mbeka lo etena ka yema otale ndo lo wonya wa shikaa? Shikikɛnde yɛdikɔ ya wonya. Kana wɛ koka mombola wate: “Onde wɛ koka monga l’etena ɛlɔ dia sho mbidjasɛ ko sawola yema kambe?” Kana ɔnɛ: “Yɛdikɔ ya wonya ya ngande yalangayɛ sho mbɔsa ɛlɔ dia sho sɛdingola sawo nɛ?” Naka welo wadjayɛ tshɛ wambɔtɔ l’ashi, kete nyu pombaka tokotetemala la wekelo wa lo tshena pe. Lam’ayoyotana diaaso di’ɔlɔlɔ, ko wɛ ndjoyanga nto dia mbeta oma lo wekelo wa lo tshena pe otsha lo wɔnɛ wa yema otale.
6. La oyango akɔna wahombaso ndjasha l’esambishelo, ndo ngande wakoka alako wotoshawɔ lo sawo nɛ tokimanyiya dia kotsha oyango akɔ?
6 Lam’atatatetemala nyanga anto wakoka tohokamɛ, tatohɛke oyango aso wa tatɛ ndo tetemala nɔmbɔla wekelo wa Bible. Oyango aso ele dia kimanyiya akanga w’etema w’ɛlɔlɔ dia vɔ koma ekambi waki Jehowa wamboyakimɔ ndo wambobatizama. Jehowa atshɔkɔlɛ welo wadjaso etena kayashaso l’olimu w’esambishelo la oyango ɔsɔ.—2 Tim. 4:5.