Kalasa k’Olowanyelo w’Ekambi—Soko dia Woke Diambodihwama dia Tsha Olimu
1 Oma lo tshimbo y’omvutshi Jeremiya, Jehowa akate ate: “Dimi layukitsha alami [wa wodja ami] dia mbalamaka. Vo wayaleshaka; hawuyuka woma kuyanga mundama la sasi. Nduku otoi awo ayushisho.” (Jer. 23:4) Olimu w’olamelo ɔsɔ wekɔ lo kotshama ɛlɔ kɛnɛ l’atei w’anto wa lo wedja tshɛ. Dui sɔ diekɔ lo salema oma le dikumanyi nunu akumi dia lo tshumanelo. Ndo nto, olui a woke w’ɛlɔngɔlɔngɔ wele oko lɔpɔpɔ la la kɛsɛkɛsɛ wakayâkimɔ la lolango lawɔ l’olimu waki Jehowa. (Osam. 110:3) Anangɛso asɔ wele la ndjakitshakitsha wekɔ mɛtɛ tshondo y’ɔtshɔkɔ le tshumanelo di’ekambi waki Nzambi! Oko watatetemala olimu w’otshumanyelo wa lo nyuma, tekɔ l’ohomba w’efula w’apami wele l’akoka ndo wetawɔ ndjâkimɔ dia kambɛ anangɛwɔ l’akadiyɛwɔ.
2 Kalasa k’Olowanyelo w’Ekambi ekɔ yɛdikɔ ya dimɛna yakɔsama dia mbetsha dikumanyi ndo ekambi w’olimu w’enyemba dikambo di’ɛkɛndɛ w’efula watafulanɛ. Olekanyi ambeki 22000 w’oma lo wedja oko 140 wakalongola wetshelo lo kalasa 999 yambɔtɔma tatɛ lam’akatɔngɔ kalasa kɛsɔ lo 1987. Le anangɛso asɔ, kalasa kɛsɔ kakayala ‘soko dia woke diambodihwama dia tsha olimu.’—1 Kor. 16:9.
3 Oyango wa Kalasa Kɛsɔ: Oyango wa Kalasa k’Olowanyelo w’Ekambi ele wa ndowanya ndo kimanyiya apami wakoka dia vɔ ndjɛmba ɛkɛndɛ lo dihole tshɛ diakokawɔ ndjonga l’ohomba awɔ l’atei w’ɔlɔngɔswamelo. Kalasa kɛsɔ pamiaka akoka awɔ dia vɔ mbisha ɛnyɛlɔ l’olimu w’esambishelo, l’olimu wa nama ɛkɔkɔ ndo wa mbetsha l’atei w’etshumanelo. L’ɔkɔngɔ wa vɔ mana kalasa kakɔ, ambeki amɔtshi tomamaka dia tokamba oko ambatshi mboka wa lânde kana oko emendji w’eteta lo wedja awɔ kana lo wedja ekina. Akina tomamaka dia tokamba kâmɛ la tshumanelo dia lo ngelo yawɔ kana lo bɛtshi dia nkɛtɛ dienda filialɛ kawɔ lɛnɛ ele ohomba efula.
4 L’edja ka mingu enanɛi yaviya kalasa kɛsɔ, ambeki tatɛka wekelo wa Bible wa tshɔtɔpɔngɛ. Vɔ sɛdingolaka la yambalo tshɛ wetshelo wotshikitanyi wa lo Bible ndo ɛkɛndɛ wotshikitanyi wendana l’olamelo w’ɛkɔkɔ mbidja ndo atɔndɔ wendana la woho wa kandola ekakatanu wa lo lɔsɛnɔ l’Okristo. Vɔ mbekaka nto, kɛnɛ kata Afundelo l’awui wendana l’ɛlɔmbwɛlɔ, la dombo ndo awui wendana l’ɔlɔngɔswamelo. Vɔ nongolaka wetshelo wa lânde wendana la woho wa tɛkɛta lo sɛkɛ ndo vɔ nongolaka ekimanyielo l’onto ndo l’onto dia pama esadi lo nyuma.
5 Kɛnɛ Kalɔmbama di’Onto Mbɔtɔ lo Kalasa Kɛsɔ: Diakɔ mɛtɛ diele, kɛnɛ kalɔmbama di’onto mbɔtɔ lo kalasa kɛsɔ kekɔ lâdiko. Wanɛ walodia adɛmandɛ otsha lo kalasa kɛsɔ pombaka monga wanɛ wambokamba oko dikumanyi kana ekambi w’olimu ɛnɔnyi ehende aha la memadia. Vɔ tshɛ pombaka monga enyemba ndo l’ɛnɔnyi l’asa 23 polo 50. Vɔ pombaka mbeya mbadia, funda ndo tɛkɛta dimɛna ɔtɛkɛta walɔmbwama kalasa, ndo monga l’alemba w’amɛna, koko aha wayotoyanga osakelo kana mbo ya ndɛ ya lânde. Ɔsɔnwɛlɔ wa ntondo mbishamaka le wanɛ wele ambatshi mboka wa pondjo.
6 Anto asɔ wayakimɔ la lolango pombaka mbetawɔ dia tokamba l’ahole wewɔ l’ohomba awɔ. Kɛsɔ nɔmbaka dia vɔ monga la dionga diele oko nɛ diaki l’omvutshi Isaya, lakayakimɔ ndâmɛ dia kamba olimu wa lânde, lo mbuta ate: “Dim’one, untumi.” (Is. 6:8) Nde akakɛnɛmɔla nto dionga dia ndjakitshakitsha lo lɔsɛnɔ lande l’otondo. Wanɛ wayakimɔ la lolango dia mbɔtɔ lo Kalasa k’Olowanyelo w’Ekambi pombaka tshutshuyama la ngandji otsha le anangɛwɔ l’akadiyɛwɔ ndo kombola mbâkambɛ lo dihole dia monga la mposa ka nyanga lokumu kana dihole dia lâdiko. L’ɔkɔngɔ wa vɔ nongola wetshelo wa dimɛna wa ngasɔ, sho nongamɛka dia wanɛ wambomana kalasa kɛsɔ kamba la kɛnɛ kakaweke lo wahɔ w’anto akina.—Luka 12:48.
7 Wahɔ Waya oma lo Kalasa Kɛsɔ: Lo mingu enanɛi yaviya wetshelo wa tshɔtɔpɔngɛ ɔsɔ, ambeki “[“ndeshamaka,” NW] la aui wa mbetawo, ndu wa dietshelu di’ololo.” (1 Tim. 4:6) Kɛsɔ mbalɔngɔsɔlaka dia vɔ tokimanyiya ndo tokeketsha anto akina lo tshumanelo tshɛ diâtomawɔ kana l’olimu w’otshimbedi. L’ahole efula wakatomama ambeki wakashidiya lo Kalasa k’Olowanyelo w’Ekambi, olimu w’esambishelo wakahame, olimu w’ombatshi mboka wakakeketshama, djekoleko le ɛlɔngɔlɔngɔ l’esekaseka ndo vɔ wakaleke mbidja yimba le eyoyo waya l’atei w’ekambi waki Nzambi l’onto ndo l’onto.
8 Onde wɛ ekɔ ekumanyi kana okambi w’olimu w’onyemba wele l’ɛnɔnyi l’asa 23 la 50? Lande na kahayakane yimba dia mbɔtɔ lo Kalasa k’Olowanyelo w’Ekambi? Onde wɛ ekɔ ɔlɔngɔlɔngɔ wamboyadjɛ eyango wa lo nshi yayaye l’olimu wa Jehowa? Lande na kahayonge la lɔsɛnɔ l’ɔsɛlɛngɛ ndo lele bu l’akambo wekola yimba woho wa wɛ ndjɔtɔ lo ‘soko dia woke diambodihwama dia tsha olimu’? Kɛsɔ koka kela ɔngɛnɔngɛnɔ ndo ɔlɔ w’efula. Lo mɛtɛ, Kalasa k’Olowanyelo w’Ekambi ekɔ tshondo y’ɔtshɔkɔ aha paka le wanɛ wɔtɔ ato koko ndo le tshumanelo tshɛ di’ekambi waki Nzambi dia l’andja w’otondo.
[Kiombo ya lo lɛkɛ 3]
Woho Wakawakondja Wahɔ oma l’Olowanyelo Ɔsɔ
“Wetshelo ɔsɔ wakahamia olimu ami ndo akoka ami wa nama ɛkɔkɔ la lomba, lo kamba l’Afundelo.”
“Kalasa kɛsɔ akambisha wɛkamu efula dia dimi kotsha ɛkɛndɛ w’efula wele lami l’atei w’etshumanelo.”
“Kalasa kɛsɔ akatshikitanya suke la dikambo tshɛ dia lo lɔsɛnɔ lami, mbidja ndo kɛnɛ kakanyiyami lo dikambo dia tɛdikɔ taki Nzambi ndo ɔlɔngɔswamelo ande.”
“Wetshelo wakamalongola akakimanyiya dia dimi mbeya ohomba wa mbetawɔ tokamba lɛnɛ ele ohomba.”