Tɔkɛnɛmɔlɛ Yimba y’Ombatshi Mboka
1. Ngande wakokayɛ nembetshiya yimba y’ombatshi mboka?
1 Oyadi vɔ kokaka kamba oko ambatshi mboka wony’ɔnɛ kana bu, apandjudi tshɛ wa Diolelo kokaka kɛnɛmɔla yimba y’ombatshi mboka. Apandjudi tshɛ kombolaka mɛtɛ kitanyiya didjango diata dia sambisha ndo mbetɛ anto ambeki. (Mat. 28:19, 20; Etsha 18:5) Vɔ ndjakiyanyaka dikambo di’anto ndo ndjahombiaka akambo akina dia kamba olimu awɔ. (Mat. 9:36; Etsha 20:24) Ekambi waki Jehowa mbetawɔka sala kɛnɛ tshɛ kele ohomba dia kimanyiya anto akina woho wa vɔ mbeka akambo wa mɛtɛ. (1 Kor. 9:19-23) Nyɛsɔ tɔsɛdingole ɛnyɛlɔ k’onto ɔmɔtshi lakɛnya yimba y’ombatshi mboka, onto akɔ ko osambisha Filipɛ.
2. Ngande wakoka dikumanyi la ekambi w’olimu mbokoya ohetoheto waki la Filipɛ l’esambishelo?
2 Esambishelo ndo Wetshelo: Filipɛ aki l’ɛkɛndɛ w’ohomba efula l’etshumanelo ka lo ntambe ka ntondo. (Etsha 6:1-6) Koko, ntondotondo nde aki osambisha wa lokumu l’ɔlɔlɔ w’ohetoheto. (Etsha 8:40) Ɔnkɔnɛ ɛlɔ kɛnɛ, kânga mbakotshawɔ ɛkɛndɛ awɔ, dikumanyi la ekambi w’olimu kokaka kɛnɛmɔla yimba y’ombatshi mboka lo monga l’ohetoheto l’esambishelo. Dui sɔ mɛtɛ diayokeketsha yimba y’etshumanelo efula!—Romo 12:11.
3. Ngande wakokaso kɛnɛmɔla yimba y’ombatshi mboka lam’adiɛnɛso l’ehemba?
3 L’ɔkɔngɔ wa nyɔi ka Stɛfano, ɛhɛnyɔhɛnyɔ wa la shashimoya wakela ekiyanu efula lo nsɛnɔ y’ambeki. Koko, Filipɛ akatetemala la sambisha, ndo nde akakimanyiya efula di’olimu w’esambishelo tatɛ kambema l’atei w’ase Samariya. (Etsha 8:1, 4-6, 12, 14-17) Sho koka mbokoya ɛnyɛlɔ kande lo tetemala la mbewoya lokumu l’ɔlɔlɔ kânga l’atei w’ehemba ndo lo sambisha anto tshɛ wahomana laso aha la shɔnɔdi.—Joa. 4:9.
4. Ɛnyɛlɔ kakɔna kakatshike Filipɛ oko wakinde ombetsha?
4 Diewo diaki la Filipɛ oko wakinde ombetsha w’Ɔtɛkɛta wa Nzambi koka mɛnama l’ɔkɔndɔ w’ekadimwelo k’otema w’ɔlɛnga w’ose Etiyɔpiya. (Etsha 8:26-38) Monga l’akoka wa kamba la Bible ndo ‘kana l’anto yimba oma l’Afundelo’ ekɔ yoho kina nto yɛnyaso yimba y’ombatshi mboka. (Etsha 17:2, 3) Oko Filipɛ, sho nyangaka dia sambisha lokumu l’ɔlɔlɔ l’ahole tshɛ wakoka anto tanema ndo lo diaaso tshɛ.
5. Kakɔna kakoka kimanyiya ambutshi w’Akristo dia vɔ keketsha yimba y’ombatshi mboka le anawɔ?
5 Lo Nkumbo ndo l’Etshumanelo: Aha la tâmu, dionga ndo ɛnyɛlɔ kaki Filipɛ aki la shɛngiya ya dimɛna efula le anande wa wamato. (Etsha 21:9) Woho akɔ wâmɛ, ambutshi w’Akristo wetsha wahɔ wa Diolelo lo dihole dia ntondo lo nsɛnɔ yawɔ keketshaka anawɔ dia vɔ tsha woho akɔ wâmɛ. Kânga mbakokande nɛmba l’ekomelo ka lomingu l’ɔtɛ w’elimu efula wokambinde, ombutshi lasambisha anto akina la waasaso tshɛ koka monga la shɛngiya yayoviya edja efula l’otema w’ɔnande.—Tuk. 22:6.
6. Ngande wakokaso kɛnɛmɔla lowando laso otsha le ambatshi mboka wa l’etshumanelo kaso?
6 Filipɛ akalongola Paulo nde la Luka, Akristo waki l’ohetoheto l’olimu waki Jehowa. (Etsha 21:8, 10) Ngande wakokaso mandola ndo sukɛ wanɛ wele l’ohetoheto ɛlɔ kɛnɛ na? Ɛnyɛlɔ sho koka sambisha kâmɛ l’ambatshi mboka la pindju kana l’ɔkɔngɔ a midi wa lushi lɔmɔtshi etena kahatumbi anto efula l’esambishelo. (Fil. 2:4) Sho koka nto mbaelɛ lawakaso dia ndjokeketshanya. Oyadi awui wele laso, nyɛsɔ sho tshɛ toyakeketsha dia kɛnɛmɔla yimba y’ombatshi mboka.