Vɔ Wakasale Lolango La Jehowa
Filipɔ Ambobatiza Ɔlɔhɛ w’Ose Etiyɔpiya
OSE Etiyɔpiya ɔmɔtshi akatetshaka wenya ande oko kanga lomba lam’akandatatshɔka lo pusupusu kande. Nde akatadiaka la dui dia wolo—etshelo kaki l’amɛngɔdi efula wa l’eleko ka ntondo. Pami kɛsɔ aki ɔlɔhɛ “l’okongo a Kandake, khum’ekanga ka umuntu k’asi Etiyopiya.”a Nde “kaki ulami a diango diandi tshe”—nde mɛtɛ aki okambi wakendaka awui w’okundji wa wodja. Ɔlɔhɛ ɔsɔ akatadiaka Dui dia Nzambi dia nde kondja ewo.—Etsha 8:27, 28.
Filipɔ, osambisha wa lokumu l’ɔlɔlɔ, aki suke la nde. Ondjelo ɔmɔtshi akɔ̂lɔmbɔla otsha lo dihole sɔ, ko nyuma akawotɛ ate: ‘Sukana kele nda pusupusu kengo.’ (Etsha 8:26, 29) Lo timba taso, sho kokaka mɛna Filipɔ ayambola ate: ‘Pami kakɔ kɛnɛ ênde? Atandâdia? Lande na kambowotoma otsha le nde?’
Lam’akatalawɔka Filipɔ dia munda pusupusu kakɔ, nde akoke Ose Etiyɔpiya akɔ âdia ɛtɛkɛta ɛnɛ: “Ndi akalombwama utsha lu dihuli diatuwudiakaka nyama uku okoko; uku ona okoko ambolembohala la ntundu k’uhimbudi a diosa. Okone ndi kunfula unyo andi. Uma l’ekitshakitshamelu kandi, wakanya elumbwelu kandi. Akona [ayɔkɔndɔla akambo wa lɔlɔnga lande l’ɔm’ɔmɔ, NW]? Ne dia wakôkosola lumu uma la kete.”—Etsha 8:32, 33.
Kam’akandoke ɔsɔku, Filipɔ akeye divɛsa diakandâdiaka. Ɔsɔ aki etenyi k’okanda w’Isaya. (Isaya 53:7, 8) Ose Etiyɔpiya ɔsɔ akambe kɛnɛ kakandâdiaka. Filipɔ akamɛ sawola la nde lam’akandawombola ate: ‘Onde wɛ mɛtɛ mbokaka kɛnɛ kâdiɛ kɛsɔ?’ Ose Etiyɔpiya akakadimola ate: ‘Okonde wayomokoka mboka naka onto ɔmɔtshi hanɔmbɔdi?’ Ko nde akalɔmbɛ Filipɔ dia ndjodjasɛ suke la nde lo pusupusu.—Etsha 8:30, 31.
‘Ashimba Dimi Batizama?’
Ose Etiyɔpiya akatɛ Filipɔ ate: ‘Lam’alangayɛ, ohombutɛ, omvutshi diaki na sɔ diatande? Dikambo diande ndamɛ kana di’onto okina?’ (Etsha 8:34) Okandokando waki l’Ose Etiyɔpiya ɔsɔ komonga dikambo dia diambo nɛ dia l’edja k’efula, anto kombeyaka “okoko” la “ukambi” wa lo pɔlɔfɛsi k’Isaya. (Isaya 53:11) Dui sɔ mɛtɛ diakayomanema fundo lam’akayosambisha Filipɔ Ose Etiyɔpiya ɔsɔ ‘lokumu l’ɔlɔlɔ lo dikambo dia Yeso’! L’ɔkɔngɔ wa tshanda mɔtshi, Ose Etiyɔpiya ɔsɔ akate ate: “Enda, tuku ashi ane! Kakona kanshimba dimi [batizama]?” Ɔnkɔnɛ, Filipɔ akôbatiza aha la tshimbatshimba.—Etsha 8:35-38.
Onde ɔsɔ aki dui di’esadi esadi? Kema! Ose Etiyɔpiya ɔsɔ aki ombetawudi w’ose wodja wakayɔtɔ l’ɔtɛmwɛlɔ w’Ase Juda.b Ɔnkɔnɛ, lâsɔ ko nde ambotayalaka ɔtɛmɔdi wa Jehowa, nde aki l’ewo k’Afundelo, nde akeyaka ndo pɔlɔfɛsi y’endana la Mɛsiya. Koko, ewo kande komonga kokele. Etena kɛsɔ kakandayeyaka awui asɔ w’ohomba efula lo dikambo di’ɔkɛndɛ wa Yeso Kristo, Ose Etiyɔpiya ɔsɔ akayoshihodia kɛnɛ kakɔ̂lɔmbaka Nzambi ndo nde aki suke suke dia kitanyiya dui diakɔ. Nde mɛtɛ akasunganaka batizama.—Mateu 28:18-20; 1 Petero 3:21.
L’ɔkɔngɔ w’akambo asɔ, ‘nyuma ka Jehowa akatɔlɛ Filipɔ esadi esadi am’akina.’ Nde akatshu dia tokamba olimu lo dihole dikina. Ose Etiyɔpiya akɔ ‘akatetemala la lɔkɛndɔ lande, atangɛnangɛna efula.’—Etsha 8:39, 40.
Wetshelo le So
Oko weso ekambi wa Jehowa wa nshi nyɛ, tekɔ l’ɔkɛndɛ wa kimanyiya anto w’etema ɛlɔlɔ dia vɔ mbeka mɛtɛ ka lo Dui dia Nzambi. Efula wakasambisha akina lokumu l’ɔlɔlɔ lam’akiwɔ lo lɔkɛndɔ kana l’etena kekina kakiwɔ kondjalɔngɔsɔla. Etombelo wamboyala oma l’olimu w’esambishelo ka Diolelo ele, ɔnɔnyi tshɛ anto nunu nkama wekɔ lo mɛnya ndjakimɔ kawɔ le Jehowa Nzambi lo batizama.
Mɛtɛ, eyoyo hawohombe tshutshuyama dia ndawɔ lowango otsha lo batismu. Ntondotondo, vɔ pombaka kondja ewo k’oshika ka Jehowa Nzambi, la k’Ɔnande Yeso Kristo. (Joani 17:3) Oma lâsɔ, vɔ pombaka kadimola etema, minya dionga dia kɔlɔ ndo ndjakadimola woho wa vɔ ndjaɔtɔnganyiya l’ɛlɛmbɛ wa Nzambi. (Etsha 3:19) Dui sɔ mbɔsaka tena efula, djekoleko naka tokanyi la dionga dia kɔlɔ diakɔtɔ polo ndo lo weeka. Kânga mbahomba eyoyo menda kɛnɛ kalɔmbama di’onto monga ombeki wa Kristo, wayokondja ɛtshɔkɔ efula naka wamboyakimɔ le Jehowa Nzambi ndo wambɔtɔ la nde ɔngɛnyi. (Ɛdika la Luka 9:23; 14:25-33.) Wanɛ wele Ɛmɛnyi wa Jehowa nɔmbɔlaka eyoyo wa ngasɔ l’ohetoheto tshɛ oya l’ɔlɔngɔswamelo wakamba la Nzambi dia kotsha lolango lande. (Mateu 24:45-47) Oko Ose Etiyɔpiya ɔsɔ, eyoyo ɛsɔ wayɔngɛnangɛna dia mbeka kɛnɛ kâlɔmba Nzambi ndo ndjaɔtɔnganyiya latɔ.
L’ɔkɔndɔ w’otondo wa l’Etsha tshapita 8, Ose Etiyɔpiya ɔsɔ mbelamɛka ɔnɛ ‘ɔlɛnga.’ Koko, lam’ele Ɛlɛmbɛ wa Mɔsɛ kombetawɔka dia pami kakawatongola mbɔtɔ l’etshumanelo, pami kɛsɔ komonga ɔlɛnga lo mɛtɛ mɛtɛ. (Euhwelu k’Elembe 23:1) Tshɛkɛta ya lo Grɛkɛ yokadimwami ɔnɛ “olenga” kokaka nembetshiya ɔlɔhɛ a woke. Ɔnkɔnɛ, Ose Etiyɔpiya ɔsɔ aki ɔlɔhɛ l’ɔkɔngɔ wa nkumekanga ka omoto ka l’Etiyɔpiya.
[Footnotes]
a “Kandake” bu lokombo l’onto, koko ekɔ lokombo la lokumu (oko “Farayo” la “Kayisa”) lakawɔlɛka nkumi ya dikanga ya amato yakahɔnaka lo wodja w’Etiyɔpiya.
b Ambetawudi w’ase wedja kɛdikɛdi wanɛ waki komonga Ase Isariyɛlɛ ko wakayelaka Ɛlɛmbɛ wa Mɔsɛ.—Akambu w’Asi Lewi 24:22.
[Caption]
[Notɛ ka l’ɛsɛ ka dikatshi]
[Caption on page 8]
[Box on page 8]
Bonde Kakawawelɛka Ɔnɛ Ɔlɛnga?