Lamaka Sso Diayɛ Ɔsɛlɛngɛ
1. Kakɔna kalembetshiya monga la sso dia ɔsɛlɛngɛ, ndo lande na kele dikambo sɔ ohomba?
1 Lo Dako diande dia l’Okongo, Yeso akakotola yambalo y’anto lo shɛngiya ya wolo yakoka monga la sso dia didjidji lo lɔsɛnɔ laso l’otondo. Nde akate ate: “Okone naka su diaye dieko [“ɔsɛlɛngɛ,” NW], dimba diaye tshe diayulula too la usasi. Keli naka su diaye dieko kolo, dimba diaye tshe diayulula too la udjima.” (Mat. 6:22, 23) Sso di’ɔsɛlɛngɛ ele nɛ diayasha paka lo oyango ɔtɔi, mbut’ate sala lolango la Nzambi aha la mbekola yimba l’ekiyanu w’anyanya wendana la mbo ya l’emunyi. (Mat. 6:19-21, 24-33) Kakɔna kayotokimanyiya dia nama sso diaso ɔsɛlɛngɛ na?
2. Kanyi yakɔna yendana la mbo ya l’emunyi yakeketsha Ɔtɛkɛta waki Nzambi?
2 Ngɛnangɛna la Kɛnɛ Kele Layɛ: Kotsha ehomba wa nkumbo yaso ekɔ ɔkɛndɛ w’oma l’Afundelo. (1 Tim. 5:8) Koko, kɛsɔ halembetshiya dia sho pombaka nyanga aha la mpekɔ diangɔ dioleki amɛna kana dieke ka tomba dikambo dia nkumbo yaso. (Tuk. 27:20; 30:8, 9) Afundelo tokeketshaka dia ngɛnangɛna la “diango dia nde ndu la diango dia ndota,” mbut’ate kɛnɛ kele ohomba lo lɔsɛnɔ. (1 Tim. 6:8; Heb. 13:5, 6) Okitanyiyelo wa dako nɛ kokaka tokimanyiya dia mbika washo aso l’oyango w’ɔlɔlɔ.
3. Kakɔna kakoka tokimanyiya dia mbewo ndjaɛndja wetsho?
3 Ekɔ dui dia lomba dia sho mbewɔ dia mbɔsa lokema l’abasa wele kema ohomba ndo ndjakimɔ l’eyango walɔmba wenya ndo yambalo efula. (1 Tim. 6:9, 10) Ngande wakokaso sala dui sɔ? Etena kakanyiyayɛ dia sala dikambo dimɔtshi, lɔmba lo kɛnɛ kendana la dikambo diakɔ ndo sɛdingola l’otema ɔtɔi kana dikambo diakɔ kokaka kodjɛ wekamu l’eyango wa lo nyuma. Ɔsa yɛdikɔ ya tetemala nama awui wa lo nyuma lo dihole dia ntondo lo lɔsɛnɔ layɛ.—Fil. 1:10; 4:6, 7.
4. Bonde kahombaso nyanga toho ta monga la lɔsɛnɔ l’ɔsɛlɛngɛ?
4 Onga la Lɔsɛnɔ l’Ɔsɛlɛngɛ: Dui dikina diayotokimanyiya di’aha kotwama la nsaki ka lomombo ele nyanga dia monga la lɔsɛnɔ l’ɔsɛlɛngɛ. Ɔnangɛso ɔmɔtshi lakɛnyi dia nkumbo kande kokaka nsɛna dimɛna aha la lokema la lomombo la l’emunyi akate ate: “Kakianɛ lambokoka sala elimu efula l’etshumanelo dia kambɛ analengo. Dimi ndjashikikɛka dia Jehowa tshɔkɔlaka ekambi ande tshɛ etena ketshawɔ ɔtɛmwɛlɔ wa mɛtɛ la ntondo k’eyango awɔ hita.” Onde wɛ kokaka kondja ɛtshɔkɔ efula lo monga la lɔsɛnɔ l’ɔsɛlɛngɛ?
5. Bonde kalɔmbamaso dia tetemala mbidja welo dia nama sso diaso ɔsɛlɛngɛ?
5 Sho nɔmbamaka dia tetemala mbidja welo dia shika tanga la ntondo ka tɔsɛngiya taki Satana, mbut’ate andja ande wele la nsaki ka lomombo la l’emunyi, ndo demba diaso diele bu kokele. L’ɔtɛ wa sho mbetawɔ dia washo aso mbekekɔ, nyɛsɔ toke washo aso l’osalelo wa lolango laki Nzambi ndo lo elongamelo kaso ka diambo ka lɔsɛnɔ la pondjo.—Tuk. 4:25; 2 Kor. 4:18.