Ekongelo ka losanganya la lânde la lushi ɔtɔi layaye

Sso ekɔ ɛngɔ ka diambo efula. (Osam. 139:14) Koko, diɔ kokaka mbikama paka lo ɛngɔ ɔtɔi lo etena tshɛ. Dikambo sɔ diekɔ mɛtɛ oyadi lo yoho ya mɛtɛ mɛtɛ kana ya didjidji. Dia monga la ɛnɛlɔ ka lo nyuma ka dimɛna, sho pombaka mbidja yambalo yaso lo osalelo wa lolango la Nzambi. Lo menda woho wamboleka fulanɛ awui wekola yimba wa lo andja ɔnɛ waki Satana, kokaka mɛtɛ dia losanganya la lânde l’ɔnɔnyi w’olimu 2006 monga la ɔtɛ a dui wata ɔnɛ: ‘Lamaka sso diayɛ ɔsɛlɛngɛ.’​—⁠Mat. 6:⁠22.

Kakɔna kahombaso sala dia kondja ɛtshɔkɔ oma le Jehowa? (Tuk. 10:22) Dimbola sɔ diayɔsɛdingɔma lo etenyi kata ɔnɛ: “Tolamake sso dia ɔsɛlɛngɛ ko tayokondja ɛtshɔkɔ efula.” Ɛkɔnya wayɛnya wahɔ wakokaso kondja lo kamba la atɔndɔ wa l’Afundelo. Sawo dia ntondo diayosha ɔtɛkɛtshi w’ɔngɛndangɛnda diayonga la ɔtɛ a dui ɔnɛ: “Tolamake sso dia ɔsɛlɛngɛ lo andja ɔnɛ wa kɔlɔ,” diayotewola oma lo akambo wakoka tela ekakatanu lo nsɛnɔ yaso yema yema ko ndjolanya lonyuma laso. Tayeka nto kɛnɛ kalembetshiya sɔna “leke l’ololo.”​—⁠Luka 10:⁠42.

Ngande wakoka ambutshi ndo anto akina kimanyiya ɛlɔngɔlɔngɔ la esekaseka dia vɔ mbesa eyango wa lo nyuma? Tenyi diata ɔnɛ: “Ambutshi wasembola mpito yawɔ” ndo “Ɛlɔngɔlɔngɔ la esekaseka wayadjɛ eyango wa lo nyuma” diayonga ndo la awui wayota ambutshi ndo ɛlɔngɔlɔngɔ la esekaseka lo dimbola sɔ di’ohomba efula. (Osam. 127:⁠4) Sawo di’ekomelo diaki ɔtɛkɛtshi w’ɔngɛndangɛnda diayɔsɛdingola woho wakokaso kɛndakɛnda la okongamelo wa Jehowa l’onto ndo l’onto, oko nkumbo, ndo oko etshumanelo.

Oyadi teke ka mbeya akambo wa mɛtɛ kana tambokambɛ Jehowa ɛnɔnyi efula, ekɔ ohomba sho ‘namaka sso diaso ɔsɛlɛngɛ.’ Losanganya la lânde layotokimanyiya dia sho sala dui sɔ.