Onde wɛ ekɔ la sso di’ɔsɛlɛngɛ?
1. ‘Monga la sso di’ɔsɛlɛngɛ’ kɛdikɛdi na?
1 Kɛnɛ kɛna washo aso kekɔ la shɛngiya lo etsha aso. Mɛtɛ ka dikambo sɔ mɛnamaka oma lo ɛtɛkɛta waki Yeso w’ɔnɛ: “Okone naka su diaye dieko ololo, dimba diaye tshe diayulula too la usasi”! (Mat. 6:22) Naka sso diaso diekɔ ‘ɔsɛlɛngɛ’ lo yoho ya lo nyuma, kete diɔ mbikama paka lo oyango ɔtɔi wa nsala lolango laki Nzambi. Sho mbetshaka Diolelo lo dihole dia ntondo ndo hatetawɔ di’awui wa l’emunyi kana awui akina wakoka mbidja wekamu l’olimu aso w’esambishelo tekola yimba.
2. Kakɔna kakoka ndanya ɛnɛlɔ kaso, ndo kakɔna kakoka tokimanyiya?
2 Ohomba wa ndjasɛdingola: Ɛnɛlɔ kaso kokaka sɛngiyama oma lo piblisite yendaso yatɛnya diangɔ diele la so ohomba kana sɛngiyama oma lo diangɔ diele l’anto akina. La ntondo ka nsala dikambo dimɔtshi kana ka nsomba ɛngɔ kɛmɔtshi kayotɔsɛka wenya, falanga kana wolo wa demba, ayonga dimɛna dia sho ‘mbɛdika la ntondo’ lo ndjambola ɔnɛ: ‘Onde nsala dui nɛ kana nsomba ɛngɔ kɛnɛ ayohamia kana ayodja olimu wakambɛmi Jehowa lo wâle?’ (Luka 14:28; Fil. 1:9-11) Ekɔ nto dimɛna dia sho ndjasɛdingolaka mbala la mbala woho wakokaso nyometɛ lɔsɛnɔ laso ɔsɛlɛngɛ dia sho ndeka ndjasha l’olimu w’esambishelo.—2 Kor. 13:5; Ef. 5:10.
3. Wetshelo akɔna wakondjaso oma le kadiyɛso kakasale etshikitanu dia mbetɛ lɔsɛnɔ lande ɔsɛlɛngɛ?
3 Etena kakatatɛ kadiyɛso kɛmɔtshi nkamba oko ombatshi mboka wa pondjo, nde akatetemala nkamba olimu wa l’emunyi wakawɔsɛka wenya tshɛ lo dihole dia nkamba olimu wawɔsɛ wenya yema tshitshɛ wakakoke mbokimanyiya dia nde ndjakotshɛka ehomba ande. L’ekomelo, nde akayotaka ɔnɛ: “Onto hakoke kambɛ ewandji ehende olimu. Dimi pombaka minya yimba lo nsaki yami ko ndjakotshɛka paka ehomba ami. Lakayɛna dia lomombo la l’emunyi mbetaka loowe.” Awui waki la nde wakokimanyiya dia nde nsala etshikitanu dia mbetɛ lɔsɛnɔ lande ɔsɛlɛngɛ ndo nde akatshikitanya olimu. Dui sɔ diakokimanyiya dia nde ntetemala nkamba oko ombatshi mboka.
4. Lande na keso l’ohomba wa wanyandja wa mbetɛ sso diaso ɔsɛlɛngɛ?
4 Woho wambosukana ekomelo amboleka tɛnya ohomba wa ntetemala monga la sso di’ɔsɛlɛngɛ. Lushi tshɛ leta ndekaka tosukanya l’ekomelo ka dikongɛ nɛ di’akambo ndo l’etatelo k’andja w’oyoyo waki Nzambi. (1 Kor. 7:29, 31) Lo ndjasha tshɛ l’olimu w’esambishelo, sho kokaka ndjashimbɛ ndo nshimbɛ wanɛ watohokamɛ.—1 Tim. 4:16.