Omba
Mbɔtwɛlɔ ya Kamba Layɔ l’Olimu w’Esambishelo
Woho wa kamba la dikatshi di’okotsha nɛ
Efula ka mbɔtwɛlɔ yayela nyɛ mbɔsama oma lo numɛlɔ y’edjedja y’Olimu Aso wa Diolelo. Hemba kamba la nyɛ yalangayɛ l’olimu w’esambishelo, kele enda etombelo wayoyokondja. Omba dikatshi di’okotsha nɛ ndo kokake sso lɔkɔ lam’ayalɔngɔsɔlayɛ otsha l’esambishelo.
Wɛ koka memula nsaki k’onto esadi eto oya l’Ɔtɛkɛta wa Nzambi naka wɛ mbewoya losango layɛ lo tshena pe. Onyiya wombola ɔmɔtshi wa shikaa, oma lâsɔ ko wɛ mbadia okadimwelo wa lo tshena pe washa Afundelo. Wɛ mbeyaka pemba la mbɔtwɛlɔ nyɛ:
“Lam’akanyiyayɛ dikambo dia nshi yayaye, onde wɛ ekɔ l’elongamelo kana bu? [Tshikande akadimole.] Bible akatatshi dikambo di’efukutanu wɛnaso nshi nyɛ ndo etombelo wayonga l’akambo akɔ.”—2 Tim. 3:1, 2, 5; Tuk. 2:21, 22.
“Anto ndjakiyanyaka efula nshi nyɛ dikambo dia yonge ya demba. Onde wɛ mbeyaka dia Nzambi ndakaka dia nde ayokandola ekakatanu tshɛ wendana la yonge ya demba lo pondjo?” —Is. 33:24; Eny. 21:3, 4.
“Onde wɛ mbeyaka dia Bible mbutaka dia lo nshi yayaye ayonga paka lowandji ɔtɔi loto mbayolɛ andja w’otondo?”—Dany. 2:44; Mat. 6:9, 10.
“Oko le yɛ, ngande wayonga lɔsɛnɔ lam’ayolɛ Yeso Kristo nkɛtɛ k’otondo?”—Osam. 72:7, 8.
“Wekɔ lo kanɛ anto efula kɔlɔ l’ɔtɛ w’ɔtɛmwɛlɔ awɔ, wa lokoho lawɔ, ndo wekɔ lo mɛngiya wamato. Oko le yɛ, Nzambi akanyiyande lo dikambo sɔ?”—Etsha 10:34, 35.
“Sho mbeyaka dia Yeso Kristo akasale ahindo efula lo nshi yande. Otoyokoka mbɔlɔmba dia nde sala dihindo dikina nto, diakɔna diohoyɔlɔmba dia nde sala na?”—Osam. 72:12-14, 16.
“Anto efula wambohekɔ dia mbokaka nkumu yendana l’ekakatanu wele l’anto. Vɔ nangaka anto mbatɛ woho wakokawɔ kandola ekakatanu akɔ. Ko lende akokaso tana ekandwelo ka mɛtɛ l’ekakatanu aso na?”—2 Tim. 3:16, 17.
“Onde wɛ koka mbutɛmi Diolelo dialɔmbayɛ lo dɔmbɛlɔ dia Nkumadiɔndjɔ (kana dia Shɛso)?”—Eny. 11:15.
Woho wa Tatɛ Sawo
Wembola wa l’ɛse ɛnɛ wɔsami oma l’ɛtɛ w’awui wa lo dibuku Comment raisonner, mɛnyaka lɛkɛ la lo dibuku latanema okadimwelo:
Onde anto w’ɔlɔlɔ tshɛ tshɔka l’olongo? (61)
Onde di’onto monga l’ɔngɛnɔngɛnɔ wa mɛtɛ paka nde kotshwe l’olongo? (62)
Onde ekɔ ɛkɔkɔ ɛmɔtshi w’eshika wa monga la mbetawɔ le Nzambi? (106)
Onde mɛtɛ Nzambi ndjakiyanyaka lo kɛnɛ katokomɛ sho anto? (107)
Onde Nzambi ekɔ onto la mɛtɛ? (108)
Lande na ekɔ ohomba mbeya ndo kamba la lokombo la Nzambi? (200)
Onde Yeso Kristo ekɔ mɛtɛ Nzambi? (205)
Kakɔna kakoka kimanyiya dia ndowanya diwala? (229)
Lande na kambofulanɛ akambo wa kɔlɔ na? (237)
Akɔna alɔmbɔla andja ɔnɛ—Onde Nzambi kana Satana? (250)
Lande na katshundaso esombe ndo kavɔso na? (253)
Ngande wonga anto etena kavɔwɔ? (255)
Onde Nzambi mbetawɔka ɛtɛmwɛlɔ tshɛ? (310)
Ngande wakoka onto mbeya ɔtɛmwɛlɔ wa mɛtɛ?(316)
Kakɔna kayosala Diolelo diaki Nzambi na? (336)
Onde Satana ekɔ la shɛngiya ya wolo l’andja ɔnɛ?(368)
Lande na katshika Nzambi asui na?(375)
Lɔsɛnɔ l’onto lekɔ l’oyango akɔna?(434)
Woho wa Mbisha Anto Biukubuku Katɔlɔmba
“Aha la tâmu wɛ mbetawɔka di’anto efula wekɔ la mbetawɔ le Nzambi. Wanɛ tshɛ wele la mbetawɔ le Nzambi mbetawɔka dia nde mbalɔmbaka dikambo dimɔtshi. Kɛnɛ kahetawɔ anto dia mbeya ele, Kakɔna katɔlɔmba Nzambi?” Oma lâsɔ ko wɛ mbɛnya biukubuku Katɔlɔmba, ndo ndjifola lo wekelo 1, ndo nyu kɛtshanya wekelo akɔ.
“Lo menda lokema l’ekakatanu lɛnya nkumbo pâ nshi nyɛ, onde wɛ atayambolaka wate, naa sheke y’ɔngɛnɔngɛnɔ wa lo nkumbo?” Oma l’ɔkɔngɔ w’okadimwelo, ko wɛ mbolembetshiya ɔnɛ Nzambi ekɔ lo mɛnya sheke y’oshika y’ɔngɛnɔngɛnɔ wa lo nkumbo lo Bible. Adia Isaya 48:17. L’ɔkɔngɔ ko wɛ mbifola biukubuku Katɔlɔmba lo wekelo 8 ko wɛ mbɛnya avɛsa amɔtshi woshawɔ lɔkɔ washa ose nkumbo tshɛ alako w’eshika. Adia wembola wele l’etatelo ka wekelo. Mbolande kana nde nangaka mbadia ekadimwelo wa wembola akɔ.
“Biukubuku nyɛ nembetshiyaka wetshelo w’ohomba efula wele lo Bible. Lo lɛkɛ tshɛ la dikatshi, wɛ ayotana okadimwelo lo wembola watshindja anto yimba aya nkama y’ɛnɔnyi. Ɛnyɛlɔ: Sangwelo diakɔna diele la Nzambi lo dikambo dia nkɛtɛ?” Fola lo wekelo 5, ndo adia wembola wele l’etatelo. Mbolande wombola waleka kotola yambalo yande, ko wɛ mbadia odingɔ (kana edingɔ) wɔtɔnɛ la wombola akɔ kâmɛ ndo avɛsa wasungana. Lembetshiyande ɔnɛ nde kokaka tana ekadimwelo ekina esadi eto woho wotanyinyu wa ntondo ɔnɛ. Lɔmbande dia wɛ ndjowenda nto dia nyu ndjɔsɛdingola dimbola dikina.
“Akanyiyayɛ lo dikambo di’awui tshɛ wa ngala wasalema la wa kalasa? Onde vɔ ndja oma lo woho wele ambutshi hawohokola anawɔ dimɛna? Kana mbeyaka monga dikambo dikina, ɛnyɛlɔ oko shɛngiya y’oma le Diabolo?” Tshikande akadimole. Naka nde ambokadimola ɔnɛ ɔsɔ ekɔ shɛngiya ya Diabolo ko wɛ mbadia Enyelo 12:9, 12. Tɛkɛta di’olimu wakamba Diabolo dia tshutshuya awui w’ofukutanu wa l’andja ɔnɛ. Oma lâsɔ ko wɛ mbifola biukubuku Katɔlɔmba lo wekelo 4, ko wɛ mimbola onto akɔ dia kana nde amboyambolaka dia mbeya oma lɛnɛ akaye Diabolo. Nyadia ndo nyɔkɛtshanya edingɔ ehende wa ntondo. Ko naka onto ambokadimola ate awui wa ngala tombaka la kalasa nɛ dia “ambutshi hawohokola anawɔ dimɛna,” kete adia 2 Timote 3:1-3 ndo ɛnya akambo amɔtshi watshutshuya awui wa ngala asɔ. Oma lâsɔ, ko wɛ mbifola biukubuku Katɔlɔmba lo wekelo 8, ko nyu mbadia odingɔ 5, ko nyu tetemala la kɛtshanya.
“Onde wɛ fɔnyaka di’ekɔ ɔlɔlɔ sho nongamɛ di’Otungi tosha ewo kele laso ohomba dia sho kenga nkumbo kele la lɔsɛnɔ l’ɔngɛnɔngɛnɔ?” L’ɔkɔngɔ w’okadimwelo, ɛnyande biukubuku Katɔlɔmba. Fola lo wekelo 8 ko wɛ nembetshiya dia wekelo ɔnɛ wekɔ l’atɔndɔ w’oma lo Bible wendana l’ose nkumbo tshɛ. Lɔmbande dia wɛ mbɛnya woho wa kamba la biukubuku yakɔ kamɛ la Bible dia kondja wahɔ woleki.
“Lam’ele sho pombaka tondoya ekakatanu efula wahomana laso nshi nyɛ, onde wɛ fɔnyaka dia dɔmbɛlɔ mbeyaka tokimanyiya mɛtɛ? [Tshikande akadimole.] Anto efula mbutaka dia dɔmbɛlɔ mbashaka wolo wa l’etei k’otema. [Adia Filipi 4:6, 7.] Koko, kânga mbediɔ ngasɔ onto mbeyaka fɔnya di’alɔmbɛlɔ ande hawotokɛma. [Fola biukubuku Katɔlɔmba lo wekelo wa 7.] Biukubuku nyɛ nembetshiyaka ngande wakoka dɔmbɛlɔ monga ekimanyielo k’efula le so.”
“Tekɔ lo tasawola l’asukanyi dia mbeya bonde kaya ɛtɛmwɛlɔ efula wotshikitanyi ɛlɔ kɛnɛ l’andja w’otondo, koko tekɔ paka la Bible ɔtɔi. Oko le yɛ bonde kambofulanɛ ɛtɛmwɛlɔ nganɛ? [Tshikande akadimole. Fola biukubuku Katɔlɔmba lo wekelo 13, ndo adia wembola wele l’etatelo.] Wɛ ayokondja ekadimwelo w’ɔlɔlɔ lo mbadia wekelo ɔnɛ.”
L’ɔkɔngɔ wa mbisha onto Tshoto y’Etangelo la Réveillez-vous !, mbolande kana wɛ koka mbadiɛ odingɔ ɔmɔtshi wa mondo. Naka nde ambetawɔ, fola biukubuku Katɔlɔmba lo wekelo wa 5. Ka epole ɔsɛkɛ lo wembola wele l’etatelo ka wekelo, ndo lɔmbande dia nde pokamɛ okadimwelo lam’adiayɛ odingɔ wa mbɔtwɛlɔ. L’ɔkɔngɔ wa wɛ mbadia odingɔ, oka wombola ndo lɔmbande dia kadimola. Shande biukubuku, ndo naka nde amboyetawɔ, nyokane lande lushi la nyu ndjokadimola lo wembola ehende wotshikadi.
Etena kakalolayɛ dia tenda onto lakayasha Tshoto y’Etangelo la Réveillez-vous !, wɛ koka mbuta ɔnɛ:
“Mbala ketshi kakimi lanɛ, lakangɛnangɛna kotshikɛ Tshoto y’Etangelo mɔtshi. Ondo wɛ akɛnyi di’ɔtɛ a dui wa jurunalɛ nyɛ mbutaka ɔnɛ: Tshoto y’Etangelo Mbewoyaka Diolelo Diaki Jehowa. Ɛlɔ, layolanga kolembetshiya ele Diolelo sɔ ndo akokadiɔ nembetshiya le yɛ ndo le nkumbo kayɛ.” Oma lâsɔ ko wɛ mbifola biukubuku Katɔlɔmba lo wekelo 6, ko wɛ mbadia ndo nyu kɛtshanya l’onto lo ndjela diaaso diele lande.
“Lam’akamaye dia ndjokenda atete edja, lakakotshikɛ kɔpi mɔtshi ya Tshoto y’Etangelo la Réveillez-vous ! Tojurunalɛ tɔnɛ kimanyiyaka anto dia vɔ nyomoleka nɛmiya Bible ndo ɛlɔmbwɛlɔ kendana la lɔkɛwɔ kashatɔ. Lam’ele dimi mbeyaka dia ekɔ ohomba dia onto tshɛ mpotɔ Ɔtɛkɛta wa Nzambi, ɛlɔ dimi lamboya nto dia ndjokɛnya kɛnɛ kakoka kokimanyiya dia sala dikambo sɔ.” Ɛnyande biukubuku Katɔlɔmba kana dibuku Ewo ndo lɔmbande kana nde koka nanga mbeka Bible layɛ.
Lam’ashayɛ onto dibuku tshɛ di’edjedja diele la ndjɛkɛ 192, wɛ koka pemba la mbɔtwɛlɔ kɛnɛ:
“Anto wekɔ lo tɛkɛta efula lo kɛnɛ kendana l’ohomba wa wekelo wa mukanda wa dimɛna. Oko le yɛ, woho akɔna wa wekelo wahomba onto ndjela dia nde monga l’ɔngɛnɔngɛnɔ woleki ndo la lɔsɛnɔ la dimɛna efula na? [Tshikande akadimole. L’ɔkɔngɔ ko wɛ mbadia Tukedi 9:10, 11.] Dibuku nɛ [ta ɔtɛ a dui wa dibuku dialangayɛ mbosha] mbika etshina lo Bible. Diɔ tɛkɛtaka dia kiɔkɔ yamɛ y’ewo kakoka konya onto lo lɔsɛnɔ la pondjo.” Sha ɛnyɛlɔ kɛmɔtshi ka shikaa kele lo dibuku diakɔ ndo keketshande dia mbodiada.
Ekanda Ekina
Wɛ koka tana mbɔtwɛlɔ yendana l’abuku ndo tobukubuku tokina lo Index des publications de la Société Watch Tower la tshina dia:
Présentations
Liste par publication
Woho wa Mbeka l’Onto Mbala Kakɔ Ɔtɔi
Dia mbeka l’onto Bible, hemba kamba la yoho mɔtshi l’atei wa tɔnɛ dia mbeka l’onto mbala kakɔ ɔtɔi:
“Onde wɛ mbeyaka dia lo minitɛ ngana tsho, wɛ koka kondja okadimwelo lo wombola ɔmɔtshi w’ohomba wa lo Bible? Oko ɛnyɛlɔ, . . . ” Oma lâsɔ, onyiya wombola ɔmɔtshi wele l’etatelo ka wekelo ɔmɔtshi wa lo biukubuku Katɔlɔmba wafɔnyayɛ wate ayokotola yambalo y’onto lasawola layɛ.
“Nte kɛnya woho wekaso l’anto Bible aha la futa falanga. Layɔsa paka minitɛ tshanu tsho dia kɛnya. Onde kokaka dimi kɛnya?” Naka nde ate eelo, ko wɛ kamba la wekelo 1 lo biukubuku Katɔlɔmba dia mɛnya woho wasalema wekelo, lo mbadia divɛsa ɔtɔi kana ahende ato woshilami. L’ɔkɔngɔ wa lâsɔ, mbolande wate: “Lushi lakɔna layoyonga la minitɛ 15 dia sho ndjɔkɛtshanya wekelo wayela na?”
“Anto efula wekɔ la Bible, koko haweye dia tɔ kekɔ l’ekadimwelo lo wembola w’ohomba wele laso sho tshɛ lo kɛnɛ kendana la nshi yaso yayaye. L’ekimanyelo ka ehomɔ kɛnɛ ka wekelo [biukubuku Katɔlɔmba kana dibuku Ewo] wɛ koka mbeya akambo w’ohomba efula wa lo Bible l’ɔkɔngɔ wa ngɔndɔ ngana tsho naka wɛ mbekaka oshidi ɔtɔi a tango lomingu tshɛ. Layɔngɛnangɛna kɛnya woho watshaso.”
“Lamboya ndjokenda dia kɔlɔmba dia mbeka Bible lakayɛ aha la wɛ futa falanga. Naka wɛ mbetawɔka, layanga kɛnya lo minitɛ ngana tsho woho wele anto wa lo wedja ndekana 200 wekɔ lo mbeka Bible lawakawɔ. Sho koka kamba l’ɔtɛ a dui ɔmɔtshi l’atei wa wɛnɛ oko etshina ka wekelo. [Ɛnya ɛtɛ w’awui wa lo dibuku Ewo.] Ɔtɛ a dui akɔna waleka kotola yambalo yayɛ?” Tshikɛ onto etena ka nde sɔna. Fola lo tshapita yɔsɔnyinde, ndo tatɛ wekelo l’odingɔ wa ntondo.
“Lekɔ lo mbetsha anto Bible aha la vɔ futami ndo l’ekekɔ l’etena ka nyomokotsha ambeki akina. Ehomɔ kɛnɛ mbakamba laso dia mbeka Bible. [Ɛnyande dibuku Ewo.] Wekelo akɔ mbiviyaka paka ngɔndɔ ngana tsho ndo mbishaka ekadimwelo lo wembola wele oko: Lande na katshika Nzambi asui? Lande na katshundaso ndo kavɔso? Ngande wonga wakiso wa ngandji wakavu? ndo ngande wakokaso sukana la Nzambi? Onde dimi koka mbɔsa wekelo ɔmɔtshi dia kɛnya woho wekaso l’anto?”
Naka wɛ ambotana mbɔtwɛlɔ kɛmɔtshi k’ɔlɔlɔ k’emula nsaki y’anto, kete lo weho tshɛ tetemala la kamba latɔ! Yanga tsho dia kiɔtɔnganyiya l’okanda washanyu anto ngɔndɔ kengo.