Ekadimwelo lo wembola anyu

◼ Naa yoho yoleki dimɛna ya kimɔ weshasha lo wahɔ w’anangɛso wa lo wedja ekina wele lo dihombo?

Tena efula, sho mbokaka nsango yendana la anangɛso wa lo wedja ekina wele la ehomba wa lo emunyi l’ɔtɛ wa ɛhɛnyɔhɛnyɔ, mpokoso kana l’ɔtɛ w’ekakatanu ekina. Anangɛso amɔtshi wakatshutshuyama dia toma falanga mbala kakɔ ɔtɔi otsha lo biro ya filialɛ ya lo wedja akɔ ndo wakalɔmbɛ dia falanga yotomiwɔ kimanyiya onto ɔmɔtshi, etshumanelo kɛmɔtshi kana dia sukɛ olimu ɔmɔtshi wa wokelo.​—⁠2 Kor. 8:​1-4

Kânga mbele ndjakiyanya ka la ngandji ka ngasɔ otsha le asekaso ambetawudi mandɔmaka, mbala efula ehomba woleki wɛnɛ wakanyiya ɔnɛ lakimɔ woshasha mongaka. Tena dimɔtshi, ko wambokimanyiyaka ɔnɛ lakandalange kimanyiya. Lo mɛtɛ, sho kokaka ndjashikikɛ dia etena katomama weshasha lo biro ka filialɛ dia olimu wa l’andja w’otondo, dia wokelo wa Mbalasa ya Diolelo kana dia kimanyiya anto akina, falanga yatomama shɔ ayokambema oko wɛnyisha ɔnɛ lokimwe woshasha akɔ.

Anangɛso wa lo filialɛ tshɛ wambetshamaka dimɛna dia kotsha esadi eto ehomba wakoka monga. Lo weho akɔ tshɛ, biro ka filialɛ mbewoyaka Olui-walɔmbɔla woho wele dikambo. Naka ekimanyielo kekina kekɔ ohomba, kete Olui-walɔmbɔla mbeyaka la nɔmba filialɛ yosukanyi la wodja akɔ dia kimanyiya kana mbalasa ka l’andja w’otondo kalɔmbɔla olimu mbeyaka la toma falanga mbala kakɔ ɔtɔi.​—⁠2 Kor. 8:​14, 15.

Ɔnkɔnɛ, weshasha tshɛ wakimɔma dia olimu wa l’andja w’otondo, dia olimu wa wokelo lo wedja ekina kana dia kimanyiya wanɛ wambohomɔ mpokoso pombaka tomama lo biro ka filialɛ ka lo wodja wadjasɛyɛ, oyadi lo tshimbo ya etshumanelo kana mbala kakɔ ɔtɔi. Lo yoho shɔ, ‘ɔhɔmbɔ wa kɔlamelo ndo wa kɛsɔ,’ lo ekimanyielo ka tɛdikɔ tɔsama oma le Olui-walɔmbɔla, kotshaka ehomba w’anango wa l’andja w’otondo aha la ofukutanu.​—⁠Mat. 24:​45-47; 1 Kor. 14:​33, 40.