Tosha Jehowa losaka l’ɔtɛ wa ngandji kande ka lɔsɛngɔ
Eohwelo ka nyɔi kaki Kristo kayosalema lo Ngɔndɔ ka sato 24
1. Ngande wakatɛnya Jehowa ngandji kande ka lɔsɛngɔ?
1 Omembi w’esambo akafunde ate: “Dimi lambukumbula dia antu ntumbula [Jehowa], ne dia ngandji kandi ka [“lɔsɛngɔ,” NW], ndu ne dia elimu andi wa mamba le antu!” (Osam. 107:8) Ngandji ka lɔsɛngɔ kaki Nzambi bu tsho kɛtshi kana ɔlɔlɔ wɛnyande ekambi ande. Dikambo sɔ mɛnyama hwe lo ɛtɛkɛta wa lotombo wakasambiyama wata ɔnɛ: “Ngandji kaye ka [“lɔsɛngɔ,” NW] akansukela, we [Jehowa].” (Osam. 94:18) Ɔsɔ mɛtɛ ekɔ ngandji ka lɔsɛngɔ ka lânde kakɛnya Jehowa lo tosha Ɔnande ɛtɔi lakandote dia wahɔ aso!—1 Joa. 4:9, 10.
2. Ngande wakokaso mɛnya lowando laso le Jehowa?
2 Oko wambosukana Eohwelo ka nyɔi kaki Kristo, ngande wakokaso mbisha ‘Nzambi kele la ngandji ka lɔsɛngɔ’ losaka? (Osam. 59:17) Ɔmɔmɔ la l’atei aso ayɔngɛnangɛna ndjaombɛka etena dia kana yimba lo nshi ya komelo ya lɔsɛnɔ laki Yeso lanɛ la nkɛtɛ. (Osam. 143:5) Ayonga nto ohomba ndjela ekongelo ka lânde ka wadielo wa Bible wa Eohwelo, oko wɛnyamitɔ lo biukubuku Tɔsɛdingolake Afundelo lushi la lushi —2005 ndo naka kokaka, sala wadielo okina la eyangelo lo tshapita 112-116 ya dibuku Onto loleki woke ndo lo ekanda ekina walembetshiya Bible. Kana yimba lo avɛsa wayoyadia ndo yasha tshɛ lɔkɔ. (1 Tim. 4:15) Wekelo w’Ɔtɛkɛta a Nzambi la dɔmbɛlɔ hakeketsha tsho otema aso koko mɛnyaka ndo ngandji kokaso Jehowa.—Mat. 22:37.
3, 4. a) Ngande wakokaso mbokoya dionga diaki anangɛso wa lo wodja wa Liberia? b) Onto akɔna ayoyelɛ lo Eohwelo?
3 Totshutshuya akina dia vɔ mbisha Nzambi losaka: Ɔnɔnyi wetshi, anto 16760607 wakɔtɔ lo Eohwelo lo andja w’otondo. Lo ngelo kɛmɔtshi ka lo wodja wa Liberia, anangɛso wakafundɛ owandji wa ngelo mukanda dia mbêwoya dia vɔ nangaka ndjosala Dambo dia dikɔlɔ dia Nkumadiɔndjɔ lo ngelo kande. Owandji akɔ aketawɔ dia anangɛso kamba la sɛkɛ dia ponde dia lo ngelo kakɔ dia dikambo sɔ ndo akatome anto dia mbewoya lo ngelo k’otondo dia mbelɛ anto dia vɔ ndja lo Eohwelo. Kânga mbele paka apandjudi atanu ato mbaki lo ngelo kɛsɔ, anto 636 wakɔtɔ lo Eohwelo!
4 Woho akɔ wâmɛ mbele, sho ngɛnangɛnaka kimanyiya anto efula dia sangana kâmɛ la so lo Eohwelo. Lande na kahayasale listɛ la anto wayoyelɛ na? Kamba la leeta latanema lo lɛkɛ la komelo la lo Réveillez-vous ! wa Ngɔndɔ ka sato 8 ndo la lo Tshoto y’Etangelo ya Ngɔndɔ ka sato 15 dia mbelɛ anto. Wɛ koka kamba nto la akatshi wa leeta wa Eohwelo. Funda wonya ndo dihole diayosalema Eohwelo lo kiatshikiatshi mɔtshi, ndo sha onto tshɛ leleyɛ. Etena kayasukana Ngɔndɔ ka sato 24, ntshɔka nto dia towaohola ndo towaewoya tɛdikɔ tshɛ tambɔsama.
5. Ngande wakokaso keketsha ambeki wa Bible dia vɔ mbɔtɔ lo Eohwelo?
5 Ngande wakokaso kimanyiya ambeki wa Bible wele watɔtɔka lo nsanganya yaso dia vɔ kondja wahɔ oma lo dikambo sɔ? Lo wekelo tshɛ, ɔsa minitɛ ngana dia mbakimanyiya dia vɔ shihodia ohomba wa dambo sɔ. Akambo w’ohomba efula mbeyaka tanema lo Tshoto y’Etangelo ya Ngɔndɔ ka sato 15, 2004, lɛkɛ 3-7 lo Falase, ndo lo dibuku Comment raisonner, lɛkɛ 241-245.
6. Lande na kele ekɔ ohomba nongola angɛndangɛnda etena ka Eohwelo?
6 Tolongole angɛndangɛnda: Etena ka Eohwelo, sawola la angɛndangɛnda ndo longolawɔ. (Romo 12:13) Lɔngɔsɔla dia mbidjasɛ kâmɛ la wanɛ wakayelɛ ndo yashikikɛ dia wekɔ la Bible ndo la buku di’esambo. Lo yoho ya lânde, sho mbayɔsa yɛdikɔ ya nongola la wangasanu tshɛ anangɛso la akadiyɛso wambɔla lo nyuma wosadi la wolo tshɛ dia mbɔtɔ lo Eohwelo. Woho wayotoyakiyanya la ngandji tshɛ dikambo diawɔ ayowakimanyiya dia vɔ nyomotatɛ ndjaka nto lo etshumanelo mbala la mbala. (Luka 15:3-7) Lo diaaso di’ekila sɔ, nyɛsɔ tosale tshɛ kakokaso sala dia keketsha anto akina dia vɔ sangana la so dia mbisha Jehowa losaka l’ɔtɛ wa ‘ngandji kande ka lɔsɛngɔ ka mamba.’—Osam. 31:21.