‘Nyoke Jehowa Ngandji, Nyu Akanga wa Kɔlamelo Tshɛ’
Eohwelo ka Nyɔi ka Yeso Kayosalema Ngɔndɔ ka Nɛi 4
1 Ambeta ɛnɔnyi efula, etena kaki wodja w’Ukraine la tshina di’ɛlɔmbwɛlɔ ka waa Communistes, ewandji wa wodja wakayelanaka l’anangɛso wa lo wodja ɔsɔ nna lo nna, djekoleko etena kakasukanaka Dambo dia Dikɔlɔ dia Nkumadiɔndjɔ, nɛ dia vɔ wakalongamɛka dia mbishola dihole diayosalema losanganya lɔsɔ. Mbala tshɛ dui sɔ diaki tshondo y’okakatanu le anangɛso nɛ di’ewandji ɛsɔ wakeyaka di’eohwelo akakokaka salema datɛ kapanda. Kakɔna kakakokaka anangɛso sala? Luudu laki kadiyɛso kɛmɔtshi laki la tshina dia nkɛtɛ lakɔtɔka elola. Lam’ele ewandji kɔfɔnyaka ɔnɛ anto koka sangana lɔkɔ, anangɛso wakakaka lɔyɛnga l’abaya lâdiko di’ashi asɔ wakakomaka polo ndo l’adwe. Kânga mbakawakunyamaka lokunyama l’ɛse k’odiko, ndoko onto lakakoke mbafukutanya etena kakawasalaka Eohwelo l’ɔngɛnɔngɛnɔ tshɛ.
2 Woho wakayashikikɛ anangɛso wa lo wodja w’Ukraine dia kitanyiya didjango dia mbohɔ nyɔi ka Yeso aki djembetelo ya diambo ya ngandji kawɔ otsha le Nzambi. (Luka 22:19; 1 Joa. 5:3) Oyadi kânga tekɔ lo diɛnɛ l’ekakatanu lo nsɛnɔ yaso, sho koka kondja ekeketshelo oma lo bɛnyɛlɔ dia ngasɔ ndo ndjashikikɛ dia tanema lo Dambo dia Dikɔlɔ dia Nkumadiɔndjɔ diayosalema Ngɔndɔ ka Nɛi 4. Lo sala ngasɔ, sho mɛnyaka dia tekɔ la nsaki kaki l’omembi w’esambo lakembe ate: ‘Nyoke Jehowa ngandji, nyu akanga wa kɔlamelo tshɛ.’—Osam. 31:23.
3 Tokimanyiya Anto Akina dia vɔ Pamia Ngandji Kawɔ Otsha le Nzambi: Ngandji kokaso Nzambi totshutshuyaka nto dia sho mbelɛ anto akina dia vɔ ndjɔsɛdingola kâmɛ la so eohwelo ka nyɔi ka Yeso. Dikatshi di’okotsha di’Olimu Aso wa Diolelo wa Ngɔndɔ ka Hende akakeketsha onto l’onto l’atei aso dia sala listɛ l’anto walangande mbelɛ oya lo Eohwelo. Onde wɛ ekɔ lo tetemala la mbelɛ onto tshɛ lele lo listɛ layɛ? Tshungola etena ka mbalembetshiya kitshimudi ya dikambo sɔ. Naka wɛ mbaohola la ngandji tshɛ lushi ndo wonya wayosalema Eohwelo ndo, naka kokaka, wɛ mbatɛ wate layoya dia ndjonyɔsa kana layonyokongɛka lo dihole diayosalema Eohwelo, kete dui sɔ mbeyaka mbakeketsha dia vɔ ndja lo losanganya lɔsɔ.
4 Lo dihole diayosalema eohwelo, sala la wolo dia nongola anto tshɛ waketawɔ leeta laso, ndo wayaoke dia wambolongwama dimɛna. Ngande wakokayɛ mbakimanyiya dia vɔ pamia ngandji kawɔ otsha le Jehowa? Onga suke dia kadimola lo wembola awɔ. Onga suke dia mbâlɔmba dia wɛ mbeka la wɔ Bible naka kokaka. Elɛwɔ dia vɔ mbɔtɔka lo nsanganya yaso ya l’etshumanelo yasalema lomingu la lomingu. Dikumanyi kawoleke mbidja yimba le Akristo wahayosambisha woye lo losanganya. Vɔ koka ndjalɔngɔsɔla dia tembola anto asɔ ndo mbakeketsha dia vɔ tatɛ nyomosambisha kâmɛ l’etshumanelo, lo kɛtshanya la wɔ awui amɔtshi wakatɛkɛtama lo sawo di’Eohwelo.—Romo 5:6-8.
5 Tofudia Ngandji Kaso Hita Otsha le Jehowa: Naka tayokana yimba lo woshasha wa tshungo, kete tayofudia ngandji kaso otsha le Jehowa ndo le Ɔnande. (2 Kor. 5:14, 15) Ɔmɛnyi ɔmɔtshi wele aya ɛnɔnyi efula wende lo mbɔtɔ lo Eohwelo akate ate: “Takakongɛka Eohwelo l’asolo wa lomɔlomɔ. Tɔ kaki ohomba efula le so ɔnɔnyi tshɛ. Dimi mbohɔka woho wakamemala lo luudu la lɔngɔsɔlawɔ edo la ntondo ka tâkundɛ ambeta ɛnɔnyi 20, lenda odo wa papa kami ka ngandji, ndo etena kɛsɔ, lakonge la lowando l’oma k’ɛse otema lo kɛnɛ kendana la tshungo. La ntondo ka nyɔi ka papa, ewo kami lo dikambo dia tshungo komonga la shɛngiya y’efula le mi. Dimi lakeyaka avɛsa watɛkɛta dikambo dia tshungo ndo woho wa mbâlembetshiya. Koko, paka lam’akamoke kandji kasha nyɔi, mbakayololaka otema ami l’ɔngɛnɔngɛnɔ lo kɛnɛ kayosala Nzambi dikambo diaso oma lo tshimbo ya yɛdikɔ shɔ y’oshinga wolo, mbut’ate tshungo.”—Joa. 5:28, 29.
6 Lam’ele datɛ dia Eohwelo k’ɔnɔnyi ɔnɛ diekɔ lo ndjasukana, yâtshungwɛ etena ka nɔngɔsɔla otema ayɛ dia dikambo sɔ. (2 Ek. 19:3) Kana lomba lo wadielo wa Bible wa lânde wa lo nshi ya Eohwelo, wele lo Tɔsɛdingolake Afundelo Lushi la Lushi—2004 ndo lo Calendrier 2004. Amɔtshi ngɛnangɛnaka dia vusola tshapita 112-116 ta lo dibuku Onto Loleki Woke lo wekelo awɔ wa nkumbo. Akina salaka eyangelo wa lâdiko lo kamba la dihomɔ dikina dia wekelo diakatondja ɔhɔmbɔ wa kɔlamelo ndo wa kɛsɔ. (Mat. 24:45-47) Sho tshɛ koka mbidja w’oshasha w’olambo wa tshungo l’alɔmbɛlɔ aso w’oma k’ɛse otema. (Osam. 50:14, 23) Omalɔkɔ, l’etena kɛnɛ k’Eohwelo, nyɛsɔ tokanake yimba dia ngandji ka Jehowa oya le so ndo toyange toho ta mɛnya ngandji kaso otsha le nde.—Mako 12:30; 1 Joa. 4:10.