Tokimanyiya anto akina dia vɔ kondja wahɔ oma lo tshungo
Eohwelo ka nyɔi ka Kristo kayosalema Ngɔndɔ ka nɛi 12
1. Naa yoho mɔtshi yɛnya ekambi waki Nzambi lowando lele lawɔ lo tshungo?
1 Lo 2 Koreto 9:15, Bible mbutaka ɔnɛ: “Lusaka le [Nzambi], ne dia ushasha andi waheyana mvuta.” Ɛtɛkɛta ɛsɔ mɛnyaka hwe woho wayaokaso lo dikambo dia kɛtshi ndo ngandji ka mamba kakɛnya Nzambi ekambi ande lo tshimbo y’Ɔnande, Yeso Kristo. Lowando lɔsɔ layɛnama lo yoho ya lânde lam’ayotosangana kâmɛ dia sala Eohwelo ka nyɔi ka Kristo lo Ngɔndɔ ka nɛi 12.
2. Waa na wasangana la Ɛmɛnyi wa Jehowa lo Eohwelo, ndo kakɔna kahombawɔ sala dia vɔ kondja wahɔ oma lo tshungo?
2 Ɔnɔnyi tshɛ, suke la anto miliyɔ dikumi sanganaka la Ɛmɛnyi wa Jehowa lo Eohwelo. Lo sala dikambo sɔ, vɔ mɛnyaka lo yɛdikɔ mɔtshi lowando lele lawɔ lo olambo wa Kristo. Koko, dia vɔ kondja wahɔ oma lo tshungo, vɔ pombaka monga la mbetawɔ lɔkɔ. (Joa. 3:16, 36) Ko woho akɔna wakokaso mbakimanyiya dia vɔ monga la mbetawɔ kakɔ? Lo nshi ya Eohwelo nyɛ, sho kokaka mbakeketsha dia vɔ salaka wekelo w’onto ndamɛ ndo mbɔtɔka lo nsanganya ya lo etshumanelo. Tende tokanyi tayela tɔnɛ.
3. Woho akɔna wakokaso tatɛ wekelo wa Bible la anto welɛso lo Eohwelo?
3 Wekelo wa Bible: Lam’etayɛ wanɛ wɛnya nsaki oya lo Eohwelo, lande na kahayɔshi yɛdikɔ ya tatɛ mbeka la wɔ Bible lo dibuku Bible etshatɔ? Lɔmba onto dia wɛ mbôlembetshiya woho wasalema Eohwelo lo mbifola lo lɛkɛ 206-208, ko nyu sɛdingola ɔtɛ a dui wata ate: “Dambo dia dikɔlɔ dia Nkumadiɔndjɔ tombolaka Nzambi.” Nyu kokaka sɛdingola sawo sɔ lo wendelo ɔtɔi kana ehende, mbala mɔtshi oko wekelo wa Bible wa lo tshena pe. L’ɔkɔngɔ wa nyu shidiya wekelo ɔsɔ, ondo nde ayolanga dia nyu sɛdingola tshapita 5 yata ɔnɛ: “Tshungo ekɔ woshasha waki Nzambi woleki woke.” Kam’ashikikɛnyu ekongelo ka wekelo wa Bible, ko nyu ndjokawola dia mbeka totshapita tɔnɛi t’etatelo ta dibuku diakɔ.
4. Waa na wakokaso tatɛ mbeka la wɔ Bible lo nshi ya Eohwelo nyɛ?
4 Waa na wakokaso tatɛ mbeka la wɔ Bible lo yoho shɔ? Mbeyaka ndjala asekaso wa l’olimu, wa la kalasa, kana wanɛ watolangaka asawo wa ngasɔ. Anangɛso kokaka ndjasha le waomi wa akadiyɛso wele bu ambetawudi wele lo etshumanelo kawɔ. Ndo tatohɛke ewotɔ aso wanɛ wele bu Ɛmɛnyi wa Jehowa. Lâdiko dia lâsɔ, ayonga ohomba sho mbidja welo wa lânde dia mbelɛ wanɛ wakayaka nshi mɔtshi lo nsanganya lo Eohwelo. (Luka 15:3-7) Tosale tshɛ dia kimanyiya anto asɔ tshɛ dia vɔ kondja wahɔ oma lo tshungo.
5. Woho akɔna wakokaso keketsha ambeki wa Bible ndo anto akina wɛnya nsaki dia vɔ mbɔtɔka lo nsanganya ya lo etshumanelo?
5 Nsanganya ya lo etshumanelo: Eohwelo ekɔ losanganya la ntondo lɔtɔ ambeki wa Bible efula ndo anto akina wɛnya nsaki. Lâsɔ, ngande wakokaso mbakimanyiya dia vɔ mbɔtɔka lo nsanganya nkina ya lo etshumanelo ndo kondjaka wahɔ oma lɔkɔ? Olimu aso wa Diolelo wa Ngɔndɔ ka nɛi 2005, lɛkɛ 8, mbishaka alako wayela anɛ: “Ewoyawɔ ɔtɛ wa sawo dia lo sɛkɛ diayoshama mbala kayaye. Ɛnyawɔ awui wayotɔsɛdingola lo Wekelo wa Tshoto y’Etangelo ndo lo Wekelo wa dibuku wa l’etshumanelo. Kɔndɔla woho wasalema Kalasa k’olimu wa teokrasi ndo Losanganya l’olimu. Etena keyɛ la ɔkɛndɛ lo kalasa, ondo wɛ kokaka mbohola kâmɛ la wɔ. Ewoyawɔ awui w’ohomba wakatami lo nsanganya. Kamba la esato wele lo ekanda aso dia mbaɛnya kɛnɛ katosalemaka lo nsanganya. Etawɔ dia vɔ mbɔtɔ lɔkɔ oma ko wekelo wa ntondo.”
6. Naa toho tohende takokaso kimanyiya anto wele l’etema w’ɛlɔlɔ dia vɔ kondja wahɔ oma lo tshungo?
6 Lam’atetemala anto wele l’etema w’ɛlɔlɔ mbeka Bible ndo mbɔtɔ lo nsanganya ya lo etshumanelo, tena efula vɔ pamaka esadi eto lo nyuma. Nyɛsɔ tokimanyiya anto akina dia vɔ kondja wahɔ oma lo tɛdikɔ ta lo nyuma tɔnɛ, ndo dia vɔ kondja wahɔ oma lo woshasha woleki woke waki Nzambi, mbuta ate, tshungo.