Tɔlɔmbɔlɛ wekelo wa Bible watahame
Etenyi 7: Salaka dɔmbɛlɔ lo wonya wa wekelo
1. a) Lande na kende dimɛna tatɛ ndo kumiya wekelo wa Bible la dɔmbɛlɔ? b) Ngande wakokaso tatɛ nɔmbaka lo wekelo wa Bible?
1 Dia ambeki wa Bible pama lo nyuma, tekɔ la ohomba wa ɛtshɔkɔ waki Jehowa. (1 Kor. 3:6) Diɔ diakɔ diele, ekɔ dimɛna tatɛ ndo kumiya wekelo wa Bible la dɔmbɛlɔ. Tena efula, sho koka sala dui sɔ oma ko wekelo wa ntondo la onto layasha efula lo awui w’ɔtɛmwɛlɔ. Le ambeki akina, sho koka menda etena kakɔna kakoka monga ɔlɔlɔ tatɛ sala dɔmbɛlɔ. Wɛ koka kamba la Osambu 25:4, 5 ndo 1 Joani 5:14 dia kimanyiya ombeki dia shihodia lande na kahombaso salaka dɔmbɛlɔ ndo kamba nto la Joani 15:16 dia mɛnya ohomba wa nɔmbaka Jehowa lo tshimbo ya Yeso Kristo.
2. Onto akɔna lahomba sala dɔmbɛlɔ naka ɔnangɛso ɔmɔtshi lambobatizama kana lahatabatizama ambotshindɛ kadiyɛso kambobatizama dia teka l’onto Bible?
2 Onto akɔna ahomba sala dɔmbɛlɔ lo wekelo wa Bible? Naka ɔnangɛso ɔmɔtshi lambobatizama ambotshindɛ kadiyɛso kɛmɔtshi kambobatizama lo wekelo, kete ɔnangɛso ɔsɔ mbahomba sala dɔmbɛlɔ kânga mbakoka kadiyɛso nɔmbɔla wekelo lo komba ɔtɛ. (1 Kor. 11:5, 10) Lo wedi okina, naka ɔnangɛso lahatabatizama ambotshindɛ kadiyɛso kambobatizama lo wekelo, kete kadiyɛso mbahomba sala dɔmbɛlɔ. Lo etena kɛsɔ, kadiyɛso pombaka komba ɔtɛ etena kasalande dɔmbɛlɔ kana kalɔmbɔlande wekelo wa Bible.
3. Naa awui w’ohomba wakokaso mbidja lo alɔmbɛlɔ aso lo wekelo wa Bible?
3 Awui wakokayɛ mbidja lo dɔmbɛlɔ: Alɔmbɛlɔ wasalema lo wekelo wa Bible pombaka monga l’awui wa shikaa koko aha awui w’ɛtshɔlɔlɔ. Lâdiko dia nyanga ekimanyielo kaki Nzambi lo wekelo ndo wa mbosha losaka l’ɔtɛ w’akambo wa mɛtɛ wamboteka, ekɔ dimɛna mbisha Jehowa lotombo oko wende Kiɔkɔ ya wetshelo. (Is. 54:13) Sho koka nto mbidja tɔtɛkɛta tɛnya nsaki kaso k’oma k’ɛse otema lo dikambo dia ombeki ndo lowando laso otsha le ɔlɔngɔswamelo wakamba la Jehowa. (1 Tes. 1:2, 3; 2:7, 8) Nɔmba Jehowa dia nde tshɔkɔla welo wadja ombeki dia kamba la kɛnɛ kekande koka mbokimanyiya dia nde mɛna ohomba wa monga ‘otshi wa dui.’—Jak. 1:22.
4. Naa ɛlɔlɔ ekina wakondjaso lo tatɛ ndo lo kumiya wekelo wa Bible la dɔmbɛlɔ?
4 Sho nongolaka ɛtshɔkɔ efula lo salaka dɔmbɛlɔ lo wekelo wa Bible. Dui sɔ telaka ɛtshɔkɔ waki Nzambi. (Luka 11:13) Diɔ tɔtɔmiyaka ohomba wa mbeka Ɔtɛkɛta wa Nzambi. Etena kahokamɛ ombeki alɔmbɛlɔ aso, nde mbekaka woho wa nɔmba. (Luka 6:40) Ndo nto, alɔmbɛlɔ w’oma k’ɛse otema woludi la ngandji kokaso Nzambi ndo la lowando lele laso l’ɔtɛ wa waonga ande woleki tshɛ koka kimanyiya ombeki dia monga la diɔtɔnganelo dia dimɛna la Jehowa.