Tosambisha anto efula
1. Kakɔna kakasale Akristo wa ntondo dia sambisha anto efula lokumu l’ɔlɔlɔ?
1 Ambeki waki Yeso wa ntondo wakayange la wolo tshɛ dia dianganya losango la Diolelo. Vɔ wakakambe la dihomɔ di’ɛlɔlɔ dia sambisha anto efula lokumu l’ɔlɔlɔ. Akristo wakafunde Bible wakafunde efundelo awɔ wakasambiyama lo Grɛkɛ ka anto tshɛ, kakatɛkɛtamaka lo wedja efula waki l’ɛse ka diolelo dia Rɔma. Ndo nto, ondo esambisha waki la ohetoheto wa lo ntambe ka hende ndo ka sato T.D. mbakatatɛ kamba la codex, ehomɔ kakaleke wɔdu kamba latɔ lo oyangelo wa waa rɛferansɛ oleki wɛɔmbɔ.
2, 3. a) Ngande wakotshama Isaya 60:16 nshi nyɛ? b) Ngande wakambaso la tshulatshula dia ntɔla ɔtɛmwɛlɔ wa pudipudi otsha la ntondo?
2 Okambelo wa la tshulatshula: Lo tshimbo ya ɔprɔfɛta Isaya, Jehowa akate ate: ‘Wɛ ayɔlɔma awɛlɛ wa wedja.’ (Is. 60:16) Lo ekotshamelo ka nshi nyɛ ka prɔfɛsiya kɛsɔ, ekambi waki Jehowa kambaka la diangɔ dia nɛmɔ di’ase wedja dia ntɔla olimu wa esambishelo otsha la ntondo. Ɛnyɛlɔ, lo 1914, ɛnɔnyi efula la ntondo ka filmɛ ndjokoma okanda watondja falanga efula, Ambeki wa Bible wakatatɛ mɛnya “Fɔtɔ-Dramɛ ka Etongelo.” Miliyɔ y’anto wakasambishama dimɛna oma lo ekimanyielo ka filmɛ kɛsɔ ka wenya enanɛi, kaki la waa fɔtɔ, esato w’alangi ndo la awui wokɛma.
3 Ɛlɔ kɛnɛ, ekambi waki Nzambi kambaka la mashinyi wafunda ekanda esadi esadi ndo wekɔ la dihomɔ efula diendana la ɔrdinatɛrɛ dia tondja Bible ndo ekanda walembetshiya Bible lo nkama ya ɛtɛkɛta. Dihomɔ dia wɛmbɛlɔ wa esadi esadi mɛmbaka ekanda walembetshiya Bible polo lo ahole wa tale wa la nkɛtɛ dikambo dia anto wa lo wedja 235. Lo ekimanyielo ka nyuma kande, Jehowa keketshaka ekambi ande dia kamba la tshulatshula sɔ lo yoho ya dimɛna dia nyomoleka kimanyiya anto efula dia vɔ mbeya akambo wa mɛtɛ wele lo Bible ɛlɔ kɛnɛ oleki lo tena dikina tshɛ dia lo ɔkɔndɔ wa anto.
4. Naa etshikitanu wambosala anto amɔtshi lo nsɛnɔ yawɔ dia ndeka sambisha anto efula lokumu l’ɔlɔlɔ?
4 Etshikitanu wasala onto l’onto: Atɛmɔdi wa mɛtɛ wakatshutshuyama nto dia onto l’onto sala etshikitanu ɛmɔtshi dia sambisha anto efula lokumu l’ɔlɔlɔ. Efula l’atei awɔ wakayanyɛ diangatangata dia ndeka ndjasha lo olimu w’esambishelo. Amɔtshi wakatshu dia tokamba lɛnɛ ele ohomba efula wa apandjudi wa Diolelo. Akina wakahamia olimu awɔ lo mbeka ɔtɛkɛta ɔmɔtshi w’angɛndangɛnda.
5, 6. Kakɔna kakoka salema dia sambisha anto efula lo ɛtshi kaso ka nkɛtɛ?
5 Sho kokaka nto sambisha anto efula lokumu l’ɔlɔlɔ lo sambisha etena kele anto lawakawɔ ndo lo ahole wakokawɔ tanema. Naka anto hawoleke tanema lawakawɔ la yanyi lo ɛtshi kanyu ka nkɛtɛ, onde wɛ koka tshikitanya yema ya ekongelo kayɛ dia sambishaka lo wenya w’akɔlɔ? Onde ekɔ ahole amɔtshi w’anto tshɛ wakokayɛ sambisha? Onde wɛ ambohembaka sambisha lo telefɔnɛ ndo kamba lo ɛtshi ka nkɛtɛ k’amundji w’okanda? Onde wɛ nyangaka waaso wa sambisha lo tshakitudi?
6 Tekɔ mɛtɛ la diɛsɛ dia woke dia mbisha lonya lo esambishelo ka woke kendana la lokombo la Jehowa ndo la Diolelo diande! Nyɛsɔ, totetemale sambisha anto efula akambo wa mɛtɛ washa lɔsɛnɔ w’oma lo Ɔtɛkɛta wa Nzambi.—Mat. 28:19, 20.