‘Tosale akambo tshɛ dia wahɔ wa lokumu l’ɔlɔlɔ’

1. Kakɔna katokombolaka osambisha wa Diolelo dia salɛ anto akina, ndo lande na?

¹ Ɔpɔstɔlɔ Paulo akeyaka dia nde aki l’ɔkɛndɛ wa sambisha anto akina lokumu l’ɔlɔlɔ. (1 Kor. 9:16, 19, 23) Woho akɔ wâmɛ mbele, woho wayakiyanyaso lo kɛnɛ kendana la wahɔ wa pondjo w’anto akina totshutshuyaka dia sho mbidja welo wa lânde dia mbasambisha lokumu l’ɔlɔlɔ.

2. Etshikitanu akɔna wakombolaso sala etena kasambishaso, ndo lande na?

² Tosambisha lo dihole ndo lo etena kakoka anto tanema: Omundji wa nse wa manamana mbidjaka ɛtɛi ande aha lo dihole ndo lo etena kele dimɛna le nde, koko lo dihole ndo lo etena kakokande munda nse. Sho lawɔ, oko weso “amundji w’antu,” mbeyaka monga ohomba dia sho sala etshikitanu ɛmɔtshi dia tana anto wa lo ɛtshi kaso ka nkɛtɛ ko monga l’ɔngɛnɔngɛnɔ w’efula l’olimu wa lânde wa tshumanya “wehu tshe [wa nse].” (Mat. 4:19; 13:47) Onde sho kokaka sambisha la dikɔlɔ dia tana anto lawakawɔ kana tomba la pindju ka pɛ dia sambisha lo toshinga? Oyango waki la Paulo aki wa ‘sambisha lokumu l’ɔlɔlɔ dimɛna dimɛna’ ndo nde akakambe la waaso w’amɛna waki la nde dia sala dikambo sɔ.—Etsha 17:17; 20:20, 24.

3, 4. Lo toho takɔna takokaso sala etshikitanu etena keso l’esambishelo, ndo etombelo akɔna wakoka ndja oma lo dui sɔ?

³ Tɔtɔnganyiya mbɔtwɛlɔ kaso la ehomba w’anto: Mbala efula amundji wa nse tshikitanyaka toho takamba la wɔ dia munda woho ɔmɔtshi wa nse. Ngande wakokaso sambisha lokumu l’ɔlɔlɔ la Diolelo lo yoho yayɔngɛnyangɛnya anto wa l’ɛtshi kaso ka nkɛtɛ? Sho pombaka mbidjaka yimba lo nsaki y’ampokami aso etena kakɛtshanyaso la wɔ dui dimɔtshi diakiyanya anto tshɛ, ko oma lâsɔ sho mpokamɛ la yambalo tshɛ ekadimwelo wayowosha lo dui diakɔ. (Jak. 1:19) Sho mbeyaka mboka dimbola diatshutshuya onto dia mbisha kanyi yande dia mbôkonya dia nde sawola la so. (Tuk. 20:5) Lo ntsha ngasɔ mbayotokoka sambisha anto lokumu l’ɔlɔlɔ lo yoho yananda nsɛnɔ yawɔ. Paulo akakome ‘akambo tshɛ le weho w’anto tshɛ.’ (1 Kor. 9:22) Tshikitanya mbɔtwɛlɔ yaso dia kimanyiya ampokami tshɛ ekɔ ohomba efula dia sho munanda etema w’anto.

⁴ Ande ɔngɛnɔngɛnɔ wele la so dia sambisha anto akina “kumu y’ololo” lee! (Is. 52:7) Nyɛsɔ ‘tosalake akambo tshɛ dia wahɔ wa lokumu l’ɔlɔlɔ’ dia sho sambisha anto efula lo ndjela akoka aso.—1 Kor. 9:23.