Mukanda w’oma le filialɛ

Apandjudi wa ngandji wa Diolelo:

Lo etatelo ka ɔnɔnyi w’olimu w’oyoyo, otshimbedi 1 w’oyoyo wakatema lo ɛtshi ka nkɛtɛ ka filialɛ ka Congo. Ɛtshi ka nkɛtɛ ka filialɛ kaso kaya kakianɛ la etshimbedi 137 ndo distrikɛ 12.

Olimu wa diambo wakakambema dia kongɛ nsanganya ya distrikɛ 92 ndo tenyi 7 lo ɛtshi ka nkɛtɛ k’otondo ka filialɛ. Wetshelo wakashama lo ɛtɛkɛta 11, mbidja ndo lo ɔtɛkɛta w’akanga a mpoke, wele lo ɛmɔtshi ekongelo kakasusama. Sho nyandolaka, nyu anangɛso tshɛ wakande nkɛndɔ ya tale dia mbɔtɔ lo losanganya lɔnɛ l’ohomba la lo nyuma.​—⁠Euh. 31:⁠12.

Aya oko ɔnɔnyi wambowotatɛ la wokelo wa mvudu shato y’ase Bɛtɛlɛ mbidjasɛ yele la etajɛ ehende lo lokombo la Bɛtɛlɛ la Kinshasa. Mvudu shɔ yayonga la toshambrɛ t’eyoyo tshɛtshɛ 84. Olimu wa ntondo aki wa sala fɔndasiɔ ndo odihe wa mvudu shato ya etajɛ shɔ. Dia kamba olimu ɔsɔ, kaminyɔ 1000 kana tshɛtshɛ tɔnɛ 16000 ya abanga yakɛmbama dia mbidiya fɔndasiɔ ndo dia kitanyiya odihe wa mvudu shɔ.

Kɔpanyi kɛmɔtshi ka lo wodja ka wokelo wa mvudu mbatokɛ mvudu y’eyoyo shɔ. Koko, departɛma dia wokelo dia lo Bɛtɛlɛ mbenda dimɛna dimɛna wokelo wa mvudu shɔ tshɛ. Departɛma sɔ diekɔ lo kamba dimɛna la kɔpanyi kɛsɔ. Ose olimu ɔmɔtshi la lo kɔpanyi kɛsɔ akate ate: “Tatakambaka lo dihole dia nganɛ. Anto anyu tshɛ toshaka mɔyɔ, ndo anto anyu wele la ɛkɛndɛ mbishaka ase olimu aso tshɛ mɔyɔ, dui sɔ hadiosalema lo ahole akina wakishaso mvudu.” Okina akate ate: “Nzambi ekɔ la nyu mɛtɛ nɛ dia lo etena ka wolo kakatadjaka odihe lo mvudu nyɛ, lanɛ la Kinshasa mvula kɔndɔ efula oko watoyɔlɔkaka.”

Olimu wekɔ lo tatshu dimɛna lo yoho yɔtɔnɛ la ekongelo kakashikikɛma. Lo etena kayoshila mvudu shato shɔ y’eyoyo, nkumbo ka Bɛtɛlɛ ka la Kinshasa kayonga la akoka wa nyomoleka kambɛ anangɛwɔ la akadiyɛwɔ tshɛ wa lo ɛtshi ka nkɛtɛ kendama oma le Bɛtɛlɛ ka la Kinshasa. Olimu ɔsɔ tshɛ wakambema la ohetoheto dia tɔla wahɔ wa Diolelo otsha la ntondo mandɔmaka! Woho wasukɛnyu olimu la lokaho tshɛ ekɔ lo mandɔma nto efula. (Tuk. 3:​9, 10) Tambɔlɔmba dia Jehowa tshɔkɔla welo wadjaso kâmɛ dia ‘kamba dikambo dia lowando la lotombo lande.’​—⁠Ef. 1:⁠12.

Anangɛnyu,

Biro ka filialɛ ka Congo