Mukanda w’oma Bɛtɛlɛ

Apandjudi wa Diolelo wa ngandji,

Tekɔ mɛtɛ l’ɔngɛnɔngɛnɔ dia mɛna ohamelo wakasalema l’ɛtshi ka nkɛtɛ ka filialɛ kaso l’ɔnɔnyi w’olimu 2007! Lo Ngɔndɔ ka ntondo, takakome yɛdikɔ yoleki ya apandjudi 138273 ndo y’ambatshi mboka wa pondjo 10765 lo Congo-Kinshasa. Lo Congo-Brazzaville takakonya yɛdikɔ yoleki ya apandjudi 5406 lo Ngɔndɔ ka nɛi 2007. Lo ngɔndɔ enanɛi ya ntondo ya lo ɔnɔnyi w’olimu 2007, wakelɛ anto 33 w’eyoyo lo Bɛtɛlɛ dia ndjotokimanyiya. Teke l’ohomba w’efula wa anto wele la akoka wayakimɔ la lolango dia ndjokamba lo adepartɛma akina, djekoleko lo departɛma dia okadimwelo.

Suke la kɔpi miliyɔ 8 ya Nkumu ya Diolelo No. 37, yele l’ɔtɛ a dui ɔnɛ: “Ekomelo ka ɛtɛmwɛlɔ wa kashi kaya suke!” yakakahanyema l’ɛtshi ka nkɛtɛ ka filialɛ kaso. Alapɔlɔ efula mɛnyaka dia l’ɔkɔngɔ wa anto nongola ndo mbadia kɔpi kɛmɔtshi, anto wakasha Ɛmɛnyi wa Jehowa losaka dikambo losango lɔsɔ lakâdihola washo. Vɔ wakɛnyi ohomba wa mbishola ɔtɛmwɛlɔ wa mɛtɛ. Efula wakatatɛ mbɔtɔ lo nsanganya ndo waketawɔ mbeka Bible.

Oyango w’okahanyelo ɔsɔ aki wa kimanyiya akanga w’etema ɛlɔlɔ dia vɔ mbeka kɛnɛ ketsha Bible mɛtɛ. (Mat. 28:​19, 20) Etena kasambishanyu, nyohɔke dia mbɔsa lokombo la onto tshɛ lɛnya nsaki ndo nyokalole dia towaenda l’oyango wa tatɛ ndo tetemala mbeka Bible la wanɛ ‘wele lo yɛdikɔ yakoka dia nongola lɔsɛnɔ la pondjo.’ (Etsha 13:48) Tekɔ l’ɔngɛnɔngɛnɔ dia kamba kâmɛ la nyu dihɛka lo dihɛka l’olimu w’ohomba efula ɔsɔ ndo sho nyotomɛka mɔyɔ wa ngandji kaso ka Okristo.

Anangɛnyu,

Bɛtɛlɛ Congo-Kinshasa