Tonge la yewo ya kana la anto yimba
1. Ɔkɔndɔ akɔna wa lo Bible wayangaso sɛdingola, ndo lande na?
1 Sawo diakasha ɔpɔstɔlɔ Paulo lo shinangɔnga ka la Atiyɔka wa la Pisidiya diofundami lo Etsha 13:16-41 toshaka ɛnyɛlɔ k’ɔlɔlɔ ka woho wa kana la anto akina yimba. Paulo akadje yimba lo dihole ndo lo tokanyi t’ampokami ande ndo akɔtɔnganyiyaka esambishelo kande ka lokumu l’ɔlɔlɔ la awui asɔ. Etena katatasɛdingola ɔkɔndɔ ɔsɔ, nyɛsɔ tende woho wakokaso sala woho akɔ wâmɛ lo esambishelo.
2. Kakɔna kekaso oma lo woho wakatatɛ Paulo sawo diande?
2 Toyange dui dimɔtshi diosangiso la wɔ lolimi: Kânga mbakendanaka losango laki Paulo la ɔkɛndɛ w’ohomba efula wele la Yeso lo okotshamelo wa sangwelo dia Nzambi, nde kotatɛ sawo diande la dui sɔ. Koko, nde akatɛkɛta dia dui dimɔtshi diakandasange la ampokami ande w’ase Juda lolimi, mbuta ate nde akatɛkɛta dia ɔkɔndɔ w’ase Juda. (Etsha 13:16-22) Woho akɔ wâmɛ mbele, tayoleka munanda etema w’anto akina naka sho nyangaka dui dimɔtshi diosangiso la wɔ lolimi. Kɛsɔ nɔmbaka dia sho mbakeketsha lo ekimanyielo ka ambola wa la yewo dia vɔ mbisha tokanyi tawɔ ndo mbahokamɛ la yambalo tshɛ dia shihodia kɛnɛ kele mɛtɛ ohomba le wɔ.
3. Kakɔna kakashimbe ampokami waki Paulo dia mbetawɔ esadi eto dia Yeso aki Mɛsiya wakalakema?
3 Etena kakandatɛkɛtaka dia ɔkɔndɔ w’ase Juda, Paulo akohola ampokami ande dikambo dia daka diaki Nzambi dia tondja Oshimbedi oma lo ɔlɔndji wa dioho dia Davidi. Koko ase Juda efula wakakongɛka oshimbedi w’ɔsɔlayi wakahombe mbatshungola oma lo lowandji l’ase Rɔma ndo mbetɛ wodja wa Juda lâdiko dia wedja ekina tshɛ. Vɔ wakeyaka mɛtɛ dia ewandji w’ɛtɛmwɛlɔ w’ase Juda wa la Jerusalɛma wakatone Yeso, wakokimɔ l’anya wa ewandji w’ase Rɔma ndo wakodiakisha. Ngande wakakoke Paulo mbaetawoya dia Onto ɔsɔ aki Mɛsiya wakalakema?
4. Ngande wakakoke Paulo kana yimba dimɛna la ampokami ande w’ase Juda?
4 Tɔtɔnganyiya mbɔtwɛlɔ kaso: Oko wakandeyaka kanyi yaki ampokami ande, Paulo akakambe la Afundelo dia kana la wɔ yimba lo ekimanyielo ka awui wakawetawɔka. Ɛnyɛlɔ, nde akɛnya dia Yeso aki kanula ya Davidi ndo onto lele Joani Obatizanyi, lakɔsamaka le anto efula oko ɔprɔfɛta wa Nzambi, akatɛkɛta dikambo diande. (Etsha 13:23-25) Paulo akɛnya dia etena kakatone ewandji w’ɛtɛmwɛlɔ w’ase Juda Yeso ndo kakawodiakisha, ‘vɔ wakakotsha akambo wakate Aprɔfɛta.’ (Etsha 13:26-28) Ndo nto, nde akalembetshiya dia anto amɔ waki ɛmɛnyi wa eolwelo kaki Yeso oma lo nyɔi ndo nde akakotola yambalo yawɔ lo avɛsa wa lo Afundelo wakeyaka ampokami ande w’ase Juda ndo wakakotshama lo eolwelo kaki Yeso.—Etsha 13:29-37.
5. a) Ngande wakɔtɔnganyiya Paulo mbɔtwɛlɔ kande etena kakandasambisha ase Ngirika? b) Ngande wakokaso mbokoya ɛnyɛlɔ kaki Paulo etena kasambishaso lo ɛtshi kaso ka nkɛtɛ?
5 Lo wedi okina, etena kakandatɛkɛtaka l’ase Ngirika lo Areopango wa l’Atɛna, Paulo akakambe la mbɔtwɛlɔ ka woho okina. (Etsha 17:22-31) Koko, nde akasambisha losango lâmɛ ndo esangɔ akɔ ehende, nde akakondja etombelo w’ɛlɔlɔ. (Etsha 13:42, 43; 17:34) Woho akɔ wâmɛ mbele ɛlɔ kɛnɛ, tayokondja etombelo w’ɛlɔlɔ l’esambishelo naka sho nyangaka awui wosangiso la ampokami aso lolimi ndo naka sho mbɔtɔnganyiyaka mbɔtwɛlɔ yaso la mbekelo ndo la tokanyi tawɔ.