Tewoya lotombo la Jehowa
1 Omembi w’esambo akate ate: “Nyimbeli [Jehowa]. . . . nyu wa la kete tshe. . . . Nyusanyaki lutumbu landi l’atei a wedja, la elimu andi wa mamba l’atei antu tshe.” Naka sho kana yimba lo kɛnɛ kakatosalɛ Jehowa, katosalɛnde ndo kayondotosalɛ, kete etema aso wayototshutshuya mɛtɛ dia mbewoya lotombo lande!—Osam. 96:1, 3.
2 Lo olimu aso: Ɛmɛnyi wa Jehowa wekɔ la diɛsɛ dia mɛmba lokombo la Nzambi ndo litombola lo sɛkɛ lo nkɛtɛ k’otondo. (Mal. 1:11) Ande otshikitanu la ewandji wa lo Lokristokristo wakanya lokombo la Nzambi oma lo dikadimwelo diawɔ dia Bible la otako tshɛ lee! Olimu wa mbeyanya lokombo la Nzambi ekɔ olimu wahomba kambema la shamanya, nɛ dia anto pombaka tɛndɛ lokombo lɔsɔ la mbetawɔ dia vɔ shimbamɛ lo fɔnu ka woke kayaye. (Romo 10:13-15) Ndo nto, wɔladi wa lo ahole tshɛ ndo wa lam’asa anto wa la nkɛtɛ nemanɛka la okidiamelo wa lokombo la Nzambi. Lo mɛtɛ, etsha tshɛ wa Nzambi kakatana la lokombo lande.
3 “[Jehowa] keli wuki, ndi kukuki ntumbwama.” Koko dia anto ‘mbisha Jehowa lotombo lɛdimi la lokombo lande,’ vɔ pombaka mbeya mɛtɛ lo kɛnɛ kendana la nde. (Osam. 96:4, 8) Koko, amɔtshi hawetawɔ dia Nzambi ekɔ. (Osam. 14:1) Akina mbutaka dia nde kema la wolo kana ɔnɛ nde hadje akambo w’anto yimba. Sho tombolaka Jehowa etena kakimanyiyaso anto wele la etema w’ɛlɔlɔ dia vɔ kondja ewo ka mɛtɛ kendana la Otungi aso, la asangwelo ande ndo la lonto lande la dimɛna efula.
4 Oma lo lɔkɛwɔ laso: Nsɛna lo yoho yɔtɔnɛ la ɛlɛmbɛ wosembwe waki Jehowa mbotombolaka. Anto mɛnaka lɔkɛwɔ laso l’ɔlɔlɔ. (1 Pet. 2:12) Ɛnyɛlɔ, ɛnamelo kaso ka pudipudi ndo ka kɔmba koka tshutshuya anto akina dia vɔ mbuta awui w’ɛlɔlɔ lo dikambo diaso ndo tosha diaaso dia tɛkɛta awui wendana la wahɔ waya lo nsɛna lo yoho yɔtɔnɛ la atɔndɔ watanema lo Ɔtɛkɛta wa Nzambi. (1 Tim. 2:9, 10) Sho ngɛnangɛnaka mɛtɛ etena ‘kɛna anto akina etsha aso w’ɔlɔlɔ ndo kashawɔ Shɛso lele l’olongo lotombo’!—Mat. 5:16.
5 Oma lo ɛtɛkɛta ndo lo etsha aso, nyɛsɔ totombolake Nzambi kaso ka diambo lushi tshɛ, lo mbetawɔ lo leeta la l’ɔngɛnɔngɛnɔ lata ɔnɛ: “Nyimbeli [Jehowa], nyutumbuli lukumbu landi, nyutaki dia panda kandi la lushi la lushi!”—Osam. 96:2.