Tokimanyiya ompokami lo nkana la nde yimba
1. Yoho y’esambishelo yakɔna yoleki monga l’etombelo w’ɛlɔlɔ?
1 Yoho y’esambishelo yakɔna yoleki dimɛna: Onde nyɛ ya mbetawoya onto la wolo kana ya nkimanyiya ompokami lo nkana la nde yimba ndo nkandola dikambo lo yoho ya dimɛna? Ɔpɔstɔlɔ Paulo akakambe la yoho ya hende etena kakandasambisha ase Juda wa la Tɛsalɔnika ndo “amotshi waketawo.” (Etsha 17:2-4) Kakɔna kalɔmbama dia nkana l’anto yimba?
2. Ngande wakokaso mbokoya ɛnyɛlɔ ka Paulo etena kasambishaso lokumu l’ɔlɔlɔ?
2 Tɔsɛdingole waetawɔ ndo awui wele l’ampokami aso: Dia nkimanyiya anto wa l’ɛtshi kaso ka nkɛtɛ, sho pombaka mbidja yimba lo waetawɔ wele la wɔ. Paulo akatatɛ sawo diande l’ase Ngirika waki l’Areopango waki komonga ambetawudi lo nshila akambo wakaweyaka dimɛna ndo wakawetawɔka. (Etsha 17:22-31) Ɔnkɔnɛ, etena kalɔngɔsɔlaso mbɔtwɛlɔ kaso, todje yimba lo waetawɔ ndo lo tokanyi ta kɔlɔ tele l’anto wa l’ɛtshi kaso ka nkɛtɛ. (1 Kor. 9:19-22) Naka ompokami aso ambotondja wekamu, toyange dikambo dimɔtshi diasangaso la nde lolemi ndo tosawole dikambo diakɔ.
3. Ngande wakokaso nkana l’anto yimba lo nkamba la ambola l’ɔkɔmi tshɛ?
3 Tokambe la ambola l’ɔkɔmi tshɛ: Hatokoke ndakanya ɔmɛngɔdi mboka ka nde nkoma otsha lɛnɛ atandatshu naka hateye dihole diatandatshu shikaa. Woho akɔ wâmɛ mbele, hatokoke nkimanyiya ompokami aso dia nde ntana okandwelo wa shikaa wa dikambo dimɔtshi naka hateye kɛnɛ kakanyiyande. La ntondo ka nde kana l’ompokami ande yimba, mbala efula Yeso akokaka ambola dia mbeya kanyi yele l’onto. Ɛnyɛlɔ, etena kakawombola pami kɛmɔtshi ɔnɛ: “Ayumutsha na dia nkita lumu la pundju?” Yeso akayange dia mbeya kanyi yande la ntondo ka nde mbokadimola. (Luka 10:25-28) Lo diaaso dikina, etena kakasha Petero okadimwelo wa kɔlɔ, l’ɔkɔmi tshɛ Yeso akakambe la ambola dia nɔngɔsɔla kanyi yaki lande. (Mat. 17:24-26) Ɔnkɔnɛ, naka ompokami aso amboka dimbola dimɔtshi kana ambɔkɛnɛmɔla kanyi ya kɔlɔ, sho kokaka nkamba la ambola dia mbokimanyiya lo nkana la nde yimba.
4. Lande na kahombaso nkimanyiya ompokami aso lo nkana la nde yimba?
4 Etena kakimanyiyaso ompokami aso lo kana la nde yimba, sho mbokoyaka Yeso, Ombetsha a Woke kâmɛ l’esambisha ekina watomanamana wa lo ntambe ka ntondo. Tosha ompokami aso kɛnɛmɔ ndo tɔlɛmiya. (1 Pet. 3:15) Etombelo wayonga la dui sɔ ele nde mbeyaka ndeka nkombola dia sho nkalola dia tosawola lande nto.