Tokambe dimɛna la ekanda aso walembetshiya Bible

1, 2. Ngande wɔsa anto efula ekanda aso ndo dui sɔ monyiyaka dimbola diakɔna?

¹ “Dimi lakatatɛ mbadia ekanda anyu oma ko 1965. Dimi kambaka la Bible etena kadiami ekanda akɔ ndo oseka dui tshɛ diele lo ekanda anyu mbɔtɔnɛka la Bible. Dimi lakakombolaka nshi tshɛ dia mbeya mɛtɛ ka shikaa lo dikambo dia Nzambi ndo dia Yeso ndo lo mɛtɛ dimi koka mbuta dia lekɔ lo tana ekadimwelo wa mɛtɛ lo ekimanyielo ka ekanda anyu ndo ka Bible.” Kɛsɔ mbakafundɛ pami kɛmɔtshi mbalasa ka woke kalɔmbɔla olimu wa Ɛmɛnyi wa Jehowa. Lo mukanda wâmɛ, nde akalɔmbɛ dia mbeka Bible.

² Lo ɛnyɛlɔ ka pami kele la lowando kɛsɔ, miliyɔ y’anto lo andja w’otondo ngɛnangɛnaka ekanda wakimanyiya dia mbeka Bible watondja ‘ɔhɔmbɔ wa kɔlamelo ndo wa kɛsɔ.’ (Mat. 24:45) Ɔnɔnyi tshɛ, lofulo laheyama mbadia l’ekanda tondjamaka dia kimanyiya anto wele la etema w’ɛlɔlɔ dia ‘kondja ewo ka shikaa k’akambo wa mɛtɛ.’ (1 Tim. 2:⁠4) Ngande wakokaso kamba dimɛna la ekanda aso walembetshiya Bible?

3. Ngande wakokaso mbewɔ dia kɛnya la ekanda aso?

³ Tewɔ dia kɛnya l’ekanda aso: Etena kɛmɔtshi, sho koka ndjamɔtshiya ekanda efula oleki wɛnɛ weso lo kamba la wɔ mɛtɛ olimu. Kakɔna kakokaso sala dia mbewɔ dia kɛnya la ekanda aso wa nɛmɔ? Shɛnɔdi yekɔ ohomba efula etena kɔsaso ekanda dikambo di’esambishelo. Lo dihole dia mbɔsa kɔpi efula y’okanda wayangaso tosha anto, sho mbeyaka mbɔsa paka kɔpi ɔtɔi kana hiende ndo kalola dia ndjɔsa nkina l’ɔkɔngɔ wa sho kahanya wɛnɛ tshɛ wakatɔshi ntondo. Dui sɔ diayoshimba diaha sho ndjamɔtshiyɛ ekanda efula lo mvudu yaso. Woho akɔ wâmɛ mbele, naka tekɔ la lofulo l’efula la periodikɛ yeso tatakahanya, kete ayonga dimɛna sho kitshakitsha lofulo lalɔmbaso.

4. Kakɔna kakoka salema naka etshumanelo kekɔ la ekanda wamboleka lo eombelo kawɔ?

⁴ Ekanda wamboleka: Naka etshumanelo kekɔ l’ekanda wamboleka, kete ɔnangɛso lendana l’awui w’ekanda mbeyaka kombola mɛnana la tshumanelo dikina dia lo mbilo kawɔ dia mbeya kana vɔ kokaka kamba la ekanda ekina wa lâdiko. Apandjudi kokaka mbisha ase nkumbo yawɔ wele bu ambetawudi, ambeki wa Bible ndo anto akina ekanda w’edjedja. Wanɛ weke eyoyo lo etshumanelo mbeyaka ngɛnangɛna dia kondja ekanda w’edjedja ɛsɔ dia mbaomba lo bibliɔtɛkɛ awɔ w’ekanda wa teokrasi.

5. Ngande wakokaso mɛnya dia sho mbɔsaka ekanda aso la nɛmɔ?

⁵ Sho kombolaka dia ekanda aso kotsha oyango awɔ, mbuta ate kimanyiya anto wele l’etema w’ɛlɔlɔ dia vɔ mbeka awui efula lo kɛnɛ kendana la asangwelo wa diambo waki Jehowa. Oko waki Yeso kombikasha mbo ya ndɛ yakatshikala l’ɔkɔngɔ wa nde mbashayɔ lo dihole dia vɔ ndɛ, oyango aso pombaka monga wa kamba dimɛna l’ekanda walembetshiya Bible wa nɛmɔ efula watoshawɔ. (Joa. 6:​11-13) Losango lashimbɛ nsɛnɔ lele lo ekanda aso halokoke munanda etema w’anto wosembwe naka vɔ tshikalaka paka lo eombelo kaso kana lo atapa aso. Ɔnkɔnɛ, sho pombaka monga la ekanelo k’ɔlɔlɔ etena kɔsaso ekanda dikambo di’esambishelo ndo kamba la wɔ dimɛna dia kondjiyɛ anto akina wahɔ.​—⁠Fil. 4:⁠5.