Ekadimwelo lo ambola anyu
◼ Kakɔna kashikikɛ dia kana sho kokaka tshikɛ onto ɔmɔtshi okanda aso?
Dikambo dioleki ohomba ele nsaki kɛnya onto. Naka nde ambɛnya nsaki ka shikaa, kete sho kokaka mbotshikɛ periodikɛ hiende, biukubuku, dibuku kana okanda okina washaso anto lo ngɔndɔ kakɔ. Ngasɔ mbediɔ oyadi tambɛna dia nde ekɔ la yema ya falanga tshitshɛ kana bu la yɔ dia nkimɔ oko woshasha dia nsukɛ olimu wakambema l’andja w’otondo. (Jobo 34:19; Eny. 22:17) Lo wedi okina, hatotosha anto wahɛnya nsaki ekanda aso woshinga a wolo.—Mat. 7:6.
Ngande wakokaso mbeya ɔnɛ ompokami aso ambɛnya nsaki? Djembetelo mɔtshi ya dimɛna ele woho wetawɔnde dia sawola la so. Naka nde ekɔ lo mpokamɛ la yambalo tshɛ etena katɛkɛtaso, kadimolaka ambola wokaso ndo mbishaka kanyi yande, kete nde mɛtɛ ekɔ lo ndjasha lo sawo. Naka nde tatoyelaka etena katatadia Bible kete nde nɛmiyaka Ɔtɛkɛta wa Nzambi. Mbala efula, ekɔ ohomba mimbola onto dia kana nde ayoyadia okanda wowoshaso. Apandjudi pombaka monga l’ekanelo k’ɔlɔlɔ dia nshikikɛ dia kana onto ekɔ lo mɛnya nsaki. Ɛnyɛlɔ etena katatasambisha lo shinga, hatonga ohomba dia sho mbisha onto tshɛ lahomana la so periodikɛ, tobukubuku kana abuku aha la sho nsɛdingola dimɛna. Naka sho bu l’akoka wa nshikikɛ kana onto ekɔ lo mɛnya nsaki, kete ayonga ohomba sho mbosha traktɛ kɛmɔtshi.
Woho akɔ wâmɛ mbele, lofulo l’ekanda lɔsa opandjudi oma lo lɔkɔtɔ l’etshumanelo pombaka mbɔtɔnɛ l’ehomba wele l’opandjudi dia nde nkotsha olimu ande, koko aha lo ndjela weshasha wakimɔnde. Hatokimɔ weshasha dia nsomba ekanda koko dia nsukɛ toho tshɛ t’olimu aso w’esambishelo wakambema l’andja w’otondo. Oyadi ekondjelo kakɔna kele la so, lowando lele la so ayototshutshuya dia sho nkimɔ weshasha la lokaho tshɛ lo ndjela kɛnɛ kele la so dia nsukɛ wahɔ wa Diolelo. (Mako 12:41-44; 2 Kor. 9:7) Dui sɔ diayototshutshuya nto dia sho mbɔsa paka ekanda wele la so ohomba, woho waha sho ndjokamba la weshasha wakimɔma dia nsukɛ otondjelo w’ekanda lo yoho ya kɔlɔ.
[Efundelo wa l’etei w’odingɔ wa lo lɛkɛ 2]
Apandjudi pombaka monga l’ekanelo k’ɔlɔlɔ dia nshikikɛ dia kana onto ekɔ lo mɛnya nsaki