Ekimanyielo kele bu wolo tana
1. Ngande wakoka mbɔla lonyuma l’onto?
1 Anna, kadiyɛso kɛmɔtshi kele omɛnde kema ombetawudi ndo lele olimu ande mbɔsɛka wenya efula, aki l’okakatanu dia mbɔtɔka lo nsanganya y’Akristo mbala la mbala, dia sambishaka ndo dia mbekaka Ɔtɛkɛta wa Nzambi. Kânga mbakandatetemalaka mboka Jehowa ngandji, nde akayɔlaka lo nyuma. Diɛsɛ ko dikumanyi diakayakiyanyaka dikambo diande wakôkimanyiya.
2. Lo yoho yakɔna yakoka Akristo tshɛ monga ekimanyielo kele bu wolo tana?
2 Mbetawɔ ekimanyielo ka lo nyuma lo tshimbo y’etshumanelo k’Akristo mɛnyaka wɛkamu w’onto le Jehowa. Lo mbokoya ekokelo ka la ngandji kaki Yeso Kristo, dikumanyi dia l’etshumanelo nyangaka waaso wa mbisha ekeketshelo ndo ekimanyielo ka dimɛna le wanɛ wadiɛnɛ l’ekakatanu l’olimu awɔ w’Okristo. (1 Tes. 5:14) Mbala efula, tshɛkɛta y’ɔlɔlɔ yakeketsha yotombi oma lo divɛsa dimɔtshi koka monga kɛnɛ kele ohomba. Mbɔsa yɛdikɔ ya sukɛ wanɛ wambɔla lo tshanda mɔtshi mendanaka la Akristo tshɛ, koko aha dikumanyi to. Aha la tâmu, onto tshɛ la l’atei aso ambɛnaka wolo wele la ‘dui diotami l’etena kahombama.’—Tuk. 25:11; Is. 35:3, 4.
3, 4. Kakɔna kalɔmbama dia kimanyiya anto akina, ndo ngande wakokaso sala dui sɔ?
3 Ɔsa yɛdikɔ: Ndjasha la ngandji le anto wele l’ohomba w’ekimanyielo nɔmbaka dia sho mbɔsa yɛdikɔ, mbaoka kɛtshi ndo ndjasha le wɔ l’otema ɔtɔi. Etena kakeye Jɔnatana okakatanu wa wolo waki la Davidi, nde “akunela, akatshu le Davidi la Horeshe. Ndi akatûkikitsha.” (1 Sam. 23:15, 16) Kimanyiya anto akina lo sawola lawɔ la ngandji. Ɛtɛkɛta wɛnya ndjasha ka l’otema ɔtɔi mbelaka etombelo w’amɛna. Lâdiko dia lâsɔ, Yeso akɛnya hwe dia ekɔ ohomba sala tshɛ, mbuta ate mbidja welo wele l’oyango wa kaloya ɔnangɛso kana kadiyɛso ka lo nyuma lo mboka. (Luka 15:4) Monga la nsaki k’oma k’ɛse otema ka kimanyiya onto okina ayototshutshuya dia sho tetemala mbisha ekimanyielo oyadi etombelo w’amɛna hawɛnama esadi.
4 Ekɔ mɛtɛ ekeketshelo etena kɔsaso yɛdikɔ ya mbelɛ anto akina, ɛnyɛlɔ wanɛ wele lo olui aso wa wekelo wa dibuku, dia vɔ totshindɛ lo esambishelo. Etena kakimanyiyaso osekaso okambi wa Jehowa dia nde sambisha, sho koka kamba la diaaso sɔ dia mbokeketsha. Tena dia ngasɔ di’ɔngɛnɔngɛnɔ dietshaso kâmɛ l’olimu wa Jehowa diekɔ tena di’ekeketshelo le wanɛ wonga nto la wɛdimo awɔ wa lo nyuma.
5. Ekimanyielo kakɔna kakoka dikumanyi mbisha lo tena dimɔtshi?
5 Yɛdikɔ yoludi la ngandji: Wanɛ wambetsha ngɔndɔ mɔtshi hawoyosambisha kana hawoyosangana l’etshumanelo wekɔ l’ohomba w’ekimanyielo kekina dia keketsha mbetawɔ kawɔ. Wekelo wa Bible l’onto lo dibuku diele oko Tɛmɔla Nzambi ɔtɔi ka mɛtɛ, Approchez-vous de Jéhovah kana Bible etshatɔ mɛtɛ? mbeyaka monga kɛnɛ kele ohomba. Lam’ele onto akɔ ambobatizamaka, wekelo hawohombe tetemala l’etena k’otale. Kɔmite k’olimu ka l’etshumanelo pombaka mbidja yimba efula dia menda wana wahomba kondja wahɔ oma lo yɛdikɔ shɔ.—Enda lo Ekadimwelo lo ambola anyu wele lo Olimu aso wa Diolelo wa Ngɔndɔ ka dikumi l’ɔtɔi 1998 ndo wa Ngɔndɔ ka dikumi l’ɔtɔi 2000.
6. Ngande wakayokeketshama nto kadiyɛso kɛmɔtshi lo nyuma?
6 Anna lakatatɛkɛtshi l’etatelo, aketawɔ la lowando ekimanyielo kakawosha dikumanyi dia nde mbeka Bible la kadiyɛso kɛmɔtshi kambotshunda lo nyuma. Akahombama paka wekelo ɛnɛi eto dia mbokimanyiya woho wa nde ndjasukanya nto la Jehowa. Nde akatatɛ nto mbɔtɔ lo nsanganya ya l’etshumanelo ndo akonge nto la nsaki ka tombola Jehowa Nzambi lo sɛkɛ. Kadiyɛso kɛsɔ kambotshunda lo nyuma akokimanyiya l’olimu lo tshɔka la nde le ambeki akina wa Bible polo ndo etena kakandakeketshama dimɛna dia monga l’akoka wa sambisha lo luudu la luudu. Ekimanyielo koludi la ngandji mbaki kɛnɛ kaki lande ohomba dia nde nyomotatɛ nto kamba elimu wa lo nyuma!
7. Ɛtshɔkɔ akɔna wonga lo keketsha anto akina lo nyuma?
7 Keketsha wanɛ wele lo dihombo mbelaka anto tshɛ ɛtshɔkɔ. Ɔnɛ lakimanyiyama ngɛnangɛnaka dia nyomoyasukanya nto la Jehowa ndo ndjoyashaka nto l’olimu wakambema l’atei w’okongamelo Ande. Dikumanyi ngɛnangɛnaka dia mɛna ehamelo wa ngasɔ wa lo nyuma. (Luka 15:5, 6) Ase etshumanelo wekɔ la diɔtɔnganelo dia kâmɛ lam’asawɔ oko wɛnyanyawɔ vɔ tshɛ ngandji k’onto l’ɔnango. (Kol. 3:12-14) Tekɔ mɛtɛ la ɛkɔkɔ w’eshika wa mbokoya Jehowa, ekimanyielo kele bu wolo tana!—Ef. 5:1.