Tɔngɛnɛngɛnɛ wekelo aso wa dibuku Bible etshatɔ mɛtɛ?
1 Otombelo wa dibuku Bible etshatɔ mɛtɛ? aki dikambo di’ɔngɛnɔngɛnɔ efula lo losanganya la distrikɛ laki l’ɔtɛ a dui ɔnɛ: “Okitanyiya le Nzambi.” Kema edja tayokamba la dibuku sɔ mbala la mbala l’olimu w’esambishelo, djekoleko etena kayotɔlɔmbɔlaka wekelo wa Bible. Ɔnkɔnɛ, sho pombaka tekesane dimɛna dimɛna la awui wele lo dibuku sɔ. Tayokoka mɛtɛ mbekesanɛ l’awui wele lɔkɔ nɛ dia tatɛ oma lo lomingu la ngɔndɔ ka nɛi 17, 2006 tayotatɛ mbeka dibuku Bible etshatɔ mɛtɛ? lo Wekelo wa dibuku wa lo etshumanelo.
2 Omendji wa wekelo wa dibuku ayokotolaka yambalo ya ampokami lo ambola wele l’etatelo ka tshapita tshɛ. Oma lâsɔ, nde ayokambaka la ambola wele l’ɛse ka dikatshi dia nɔmbɔla wekelo. Avɛsa wasukɛ tokanyi toleki ohomba wayadiemaka ndo kɛtshanyema, ndo kiombo yata ɔnɛ: “Kɛnɛ ketsha Bible” yele la koma ka tshapita tshɛ yayokimanyiyaka dia sala ovuswelo, nɛ dia yɔ yekɔ la ekadimwelo w’oma l’Afundelo wa ambola wele l’etatelo ka tshapita. Wɛ ayɔngɛnangɛna mbisha kɔmatɛrɛ nɛ dia dibuku nɛ nembetshiyaka akambo lo yoho ya hwe, ya wɔdu, ndo ya dimɛna efula.
3 Etenyi ka Okotsha ka dibuku nɛ kekɔ la awui w’ohomba wendana la ɛtɛ w’awui wa weho la weho. Tayokambaka l’akambo asɔ naka ambeki wa Bible wekɔ l’ohomba wa mbeya akambo efula lo ɔtɛ a dui ɔmɔtshi. Mbala mɔtshi tenyi dia l’etenyi ka Okotsha diayɔkɛtshanyemaka lo Wekelo wa dibuku wa l’etshumanelo. Akambo wele l’ɔtɛ wa dui ɔmɔtshi wa lo okotsha wayadiemaka tshɛ oma le ombadi wa wekelo wa dibuku, ndo asawo w’etale wayokahanyemaka lo tenyi tenyi. Ambola wa wekelo bu l’etenyi ka okotsha, koko omendji wa wekelo wa dibuku koka keketsha anto wele lo wekelo dia mbisha kɔmatɛrɛ lo kamba la ambola watɔtɔmiya tokanyi toleki ohomba.
4 Wekelo wa dibuku Bible etshatɔ lo Wekelo wa dibuku wa l’etshumanelo wayotshɔka esadi esadi. Koko hatototshɔ la wekelo lowango lowango etena kekaso l’anto akina, djekoleko wanɛ wele kema kana wele tsho la yema y’ewo tshitshɛ ya awui wa lo Bible. (Etsha 26:28, 29) Lamayotekaka l’anto Bible lawakawɔ lo dibuku nɛ, ayonga ohomba kɛtshanyaka avɛsa dimɛna dimɛna, nembetshiyaka asango ndo awui akina. Ɔnkɔnɛ, yadjɛ oyango wa mbɔtɔka lo wekelo ndo mbishaka kɔmatɛrɛ lomingu tshɛ lo wekelo wa dibuku Bible etshatɔ mɛtɛ?