Nyɛsɔ tɛnya lowando laso—Eohwelo kayosalema lo ngɔndɔ ka nɛi 17
1. Nsaki kakɔna kaki la omembi w’esambo kakokaso monga la tɔ djekoleko lo nshi ya Eohwelo?
1 L’ɔtɛ wa lowando laki lande lo kɛtshi k’efula kakawoke Jehowa ndo woho wakandôtshungola, omembi w’esambo akambola ate: “Kayumusha [Jehowa] ne dia etshoko andi le mi?” (Osam. 116:12) Ɛlɔ kɛnɛ, ekambi wa Nzambi wekɔ l’ɛkɔkɔ efula wa monga la lowando. Ntambe efula l’ɔkɔngɔ w’ɛtɛkɛta wakasambiyama ɛsɔ fundama, Jehowa akasha anto woshasha woleki woke, mbuta ate tshungo. Oko wayalɔngɔsɔlaso dia nsala eohwelo ka nyɔi ka Kristo lo Ngɔndɔ ka nɛi 17, tekɔ l’ɔkɔkɔ wa dimɛna wa mɛnya lowando laso.—Kol. 3:15.
2. Naa ɛkɔkɔ ɛmɔtshi watotshutshuya dia mɛnya lowando lo kɛnɛ kendana la tshungo?
2 Ɛtshɔkɔ wakondjaso oma lo tshungo: Diɛsɛ oma lo tshungo, mbayaso l’akoka wa nkondja “edimanyelu ka kolo yasu.” (Kol. 1:13, 14) Dikambo sɔ tokimanyiyaka dia sho ntɛmɔla Jehowa la nkum’otema ka pudipudi. (Heb. 9:13, 14) Sho kokaka nsawola la Jehowa lo tshimbo ya dɔmbɛlɔ aha la mboka wɔma. (Heb. 4:14-16) Wanɛ wele la mbetawɔ lo tshungo wekɔ la elongamelo ka woke ka ndjokondja lɔsɛnɔ la pondjo!—Joa. 3:16.
3. Woho akɔna wakokaso mɛnya lowando laso le Jehowa lo kɛnɛ kendana la tshungo?
3 Toho takokaso mɛnya lowando: Yoho mɔtshi yakokaso mɛnya lowando l’efula lele la so ele lo nsɛdingola wadielo wa Bible wendana la Eohwelo lushi tshɛ ndo kanaka yimba l’awui akɔ. Sawo diele lo Tshoto y’Etangelo ya Ngɔndɔ ka hende 1, 2011 diele l’ɔtɛ a dui ɔnɛ: “Onde wɛ amboyalɔngɔsɔla dikambo dia lushi loleki ohomba la l’ɔnɔnyi?” lo Falase, diakatondjama dia tokimanyiya lo dikambo sɔ. Sho kokaka nto mbutɛ Jehowa lo tshimbo ya dɔmbɛlɔ di’oma k’ɛse otema woho wɔsaso tshungo la nɛmɔ di’efula. (1 Tes. 5:17, 18) Naka sho monga lushi layosalema Eohwelo dia nkitanyiya didjango dia Yeso, kete tayɛnya dia tekɔ la lowando. (1 Kor. 11:24, 25) Lâdiko dia lâsɔ, sho kokaka mbokoya ngandji k’efula ka Jehowa ndo mbelɛ anto efula dia vɔ ndjosangana kâmɛ la so.—Is. 55:1-3.
4. Eshikikelo kakɔna kahomba monga la so?
4 Ekambi waki Jehowa wele la lowando hawɔshi losanganya la Eohwelo oko losanganya lɔmɔtshi la ngako. Lɔ lekɔ losanganya loleki ohomba la l’ɔnɔnyi! Etena katataleke nsukana la Eohwelo, nyɛsɔ toyashikikɛ oko omembi w’esambo lakafunde ate: “Utema ami, utumbuli [Jehowa], tuhelaki etsha w’ololo wa [Jehowa].”—Osam. 103:2.