“Kanyutshaki okone” Eohwelo kayosalema lo ngɔndɔ ka Nɛi 5
1. Lande na kele osalelo wa Eohwelo ekɔ ohomba efula?
1 “Kanyutshaki okone, dia mbuhomi.” (Luka 22:19) Oma l’ɛtɛkɛta ɛsɔ, Yeso akadjangɛ ambeki ande dia vɔ mbohɔka nyɔi kande k’olambo. Lo menda kɛnɛ tshɛ kakakotsha tshungo, lushi loleki ohomba le Akristo ele lushi la Eohwelo kasalema ɔnɔnyi tshɛ. Lam’ele Eohwelo kayosalema ɔnɔnyi ɔnɛ lo ngɔndɔ ka Nɛi 5 kekɔ lo ndjasukana, ngande wakokaso mɛnya lowando laso le Jehowa?—Kol. 3:15.
2. Ngande wakokaso mɛnya lowando laso dikambo dia Eohwelo oma lo wekelo ndo okanelo wa yimba?
2 Toyalɔngɔsɔlɛ: Mbala efula, sho ndjalɔngɔsɔlaka di’akambo wele ohomba efula le so. Sho kokaka nɔngɔsɔla etema aso dikambo dia Eohwelo lo mbeka kâmɛ oko nkumbo akambo wakete lo nshi y’ekomelo ya lɔsɛnɔ laki Yeso la la nkɛtɛ ndo nkana yimba l’akambo akɔ. (Ez. 7:10) Etenyi kɛmɔ k’avɛsa wendana l’akambo asɔ tanemaka lo alamanaka la lo Tɔsɛdingolake Afundelo lushi la lushi, ndo listɛ l’otondo la totshapita tɔtɔnɛ l’awui asɔ lele lo dibuku Onto loleki woke, tanemaka lo Tshoto y’Etangelo ya ngɔndɔ ka Hende 1, 2011, lɛkɛ 23-24 lo Falase.
3. Ngande wakokaso mɛnya lowando laso lo dikambo dia Eohwelo lo ndjasha efula l’esambishelo?
3 Tosambisha: Sho kokaka mɛnya nto lowando laso lo ndjasha efula l’olimu w’esambishelo. (Luka 6:45) Esambishelo ka lânde kayosalema l’andja w’otondo dia mbelɛ anto oya lo Eohwelo kayotatɛ Lushi la samalo, ngɔndɔ ka Sato 17. Onde wɛ hakoke ntshikitanya ekongelo kayɛ dia nsambisha efula, ondo lo mbɔsa olimu w’ombatshi mboka wa tshanda? Lande na kahanyakɛtshanya dikambo sɔ lo nkumbo etena kayonyosala Ɔtɛmwɛlɔ wa lo nkumbo wa la dikɔlɔ wa mbala kayaye?
4. Wahɔ akɔna wayotokondja lo salaka Eohwelo?
4 Ande wahɔ wakondjaso lo mbɔtɔka lo Eohwelo kasalema ɔnɔnyi tshɛ lee! Ɔngɛnɔngɛnɔ aso ndo ngandji kokaso Nzambi fulaka etena kakanaso yimba dikambo dia lokaho la Jehowa lo woho wakandakimɔ Ɔnande ɛtɔi lakandote oko tshungo. (Joa. 3:16; 1 Joa. 4:9, 10) Kɛsɔ totshutshuyaka diaha sho nsɛna nto lo dikambo diaso shoamɛ. (2 Kor. 5:14, 15) Kɛsɔ nomialomiaka nto nsaki kele laso ka ntombola Jehowa lo sɛkɛ. (Osam. 102:19-21) Lo mɛtɛ, ekambi wa Jehowa wele la lowando wekɔ lo nkongɛ l’asolo walomɔlomɔ diaaso diayonga la so lo Eohwelo kayosalema lo ngɔndɔ ka Nɛi 5 dia ‘mbewoya anto nyɔi ka Nkumadiɔndjɔ.’—1 Kor. 11:26.