Tetsha akanga wa memakana dia vɔ kɛndakɛnda lo mboka ka Nzambi
1. Ahombaso sala lam’alɔmbɔlaso wekelo wa Bible?
1 Wakate dia ambeki waki Yeso wa lo ntambe ka ntondo waki lo “Mbuka.” (Etsha 9:2) Lokristo la mɛtɛ mendanaka la akambo tshɛ wa lo lɔsɛnɔ l’onto. (Tuk. 3:5, 6) Ɔnkɔnɛ, lam’alɔmbɔlaso wekelo wa Bible, hatohombe komɛ tsho lo sambiyɛ ambeki aso ewo k’oshika ka wetshelo wa lo Bible, koko sho pombaka nto mbakimanyiya dia vɔ kɛndakɛnda lo mboka ka Jehowa.—Osam. 25:8, 9.
2. Kakɔna kakoka kimanyiya ombeki wa Bible dia nde kitanyiya wadjango waki Nzambi?
2 Tokimanyiya ambeki dia vɔ mboka Jehowa la Yeso ngandji: Ekɔ mɛtɛ dui dia wolo le anto wele kema kokele dia mbɔtɔnganyiya tokanyi, waonga, asawo, ndo lɔkɛwɔ lawɔ la lolango la Nzambi! (Romo 7:21-23; Ef. 4:22-24) Koko, ngandji kokawɔ Jehowa nde la Ɔnande, kimanyiyaka akanga wa memakana dia vɔ kandola okakatanu ɔsɔ. (Joa. 14:15; 1 Joa. 5:3) Ngande wakokaso kimanyiya ambeki aso wa Bible dia vɔ monga la ngandji kɛsɔ?
3. Ngande wakokaso kimanyiya ambeki dia vɔ mboka Jehowa la Yeso ngandji?
3 Kimanyiya ombeki ayɛ dia nde mbeya woho w’onto wele Jehowa. Ɔnangɛso ɔmɔtshi akalembetshiya ate: “Anto hawokoke mboka onto lahaweye ngandji, ɔnkɔnɛ dimi mbetshaka ambeki ami lokombo laki Nzambi kam’atatɛso wekelo, ndo dimi nyangaka waaso wa ndeka mbalembetshiya waonga waki Jehowa.” Mbika epole ɔsɛkɛ lo ɛnyɛlɔ kaki Yeso ekɔ yoho yoleki dimɛna ya sala dikambo sɔ. (Joa. 1:14; 14:9) Lâdiko dia lâsɔ, kamba la kiombo y’ovuswelo yele la koma ka tshapita tshɛ ya dibuku Bible etshatɔ dia kimanyiya ombeki dia nde kana yimba lo waonga wa diambo waki Nzambi ndo wa Ɔnande.
4. a) Lande na kele ambeki efula mbokaka wolo sambisha? b) Ngande wakokaso mbakimanyiya dia vɔ tatɛ sambisha?
4 Towaetsha oma lo ɛnyɛlɔ kaso k’ɔlɔlɔ: Oko weso embetsha ndo ɛnɔmbɔdi, oma lo etsha aso, sho mɛnyaka anto akina kɛnɛ kelɛwɔ kɛndakɛnda lo mboka ka Nzambi. (1 Kor. 11:1) Ɛnyɛlɔ, ambeki wa Bible efula bu la mbekelo ka sawola l’anto wahaweye dikambo dia dietawɔ diawɔ. Lɔkɔ mbele, mbeyaka monga ohomba sho monga la solo dia lotutsha ndo la diewo dia mbakimanyiya dia vɔ monga la ngandji, mbetawɔ ndo la dihonga dia vɔ sambisha ndo mbetɛ anto ambeki. (2 Kor. 4:13; 1 Tes. 2:2) Nsaki kele laso ka nɔmbɔla ambeki aso wa Bible kayototshutshuya dia sho mbakimanyiya etena katatɛwɔ sambisha.
5. Ngande wakoka ɛnyɛlɔ k’ɔlɔlɔ kimanyiya ambeki dia vɔ mɛna kɛnɛ kelɛwɔ kitanyiya wadjango wa Nzambi?
5 Ɛnyɛlɔ kayɛ k’ɔlɔlɔ kokaka kimanyiya ambeki ayɛ lo akambo akina w’ohomba wa lo lɔsɛnɔ l’Okristo. Lam’embolayɛ ɛkɔnyi kana lam’alongolayɛ anto akina l’ɔngɛnɔngɛnɔ tshɛ lo nsanganya ya l’etshumanelo, vɔ mɛnaka ngandji lo etsha. (Joa. 15:12) Etena kɔmbayɛ kana kasolayɛ Mbalasa ka Diolelo, kana kakimanyiyayɛ anto akina, wɛ ekɔ lo mbaetsha woho wa kambɛ anto akina. (Joa. 13:12-15) Lam’ɛnawɔ dia wɛ ekɔ lo nsɛna lɔsɛnɔ l’ɔsɛlɛngɛ, vɔ shihodiaka kɛnɛ kalembetshiya ‘tetemala nyanga ntondo diolelo.’—Mat. 6:33.
6. Etombelo akɔna wakondjaso lo kimanyiya anto akina dia vɔ kambɛ Jehowa?
6 Olimu w’esambishelo ndo wa mbetɛ anto ambeki nɔmbaka welo efula. Kânga mbediɔ ngasɔ, sho mongaka mɛtɛ la ɔngɛnɔngɛnɔ efula wonya wɛnaso akanga wa memakana ‘watakɛndakɛnda lo akambo wa mɛtɛ’!—3 Joa. 4.