Djaka yimba tena tshɛ lo wetshelo ayɛ
“Uyalamaki [tena tshɛ], ulamaki ndu wetshelu aye. Utetemalaki lu akambu aso. Ne dia lam’ayuyutsha osoku, we ayuyashimbela, ndu we ndu wane wuka aui aye.”—1 TIMOTE 4:16.
1, 2. Bonde keso l’ohomba w’efula w’embetsha wele l’ohetoheto ɛlɔ kɛnɛ na?
‘NYOTSHU, nyetɛ anto wa lo wedja tshɛ ambeki, . . . nyowaetsha dia ntsha kɛnɛ tshɛ kakamanyodjangɛ.’ (Mateu 28:19, 20) Lo ndjela didjango nɛ diaki Yeso Kristo, Akristo tshɛ pombaka ntsha tshɛ dia koma embetsha. Tekɔ mɛtɛ l’ohomba w’embetsha wele l’ohetoheto dia kimanyiya akanga w’etema ɔlɔlɔ dia vɔ kondja ewo kaki Nzambi kam’ekeso la diaaso. (Romo 13:11) Ɔpɔstɔlɔ Paulo akakɔkɔmiya ate: “Usambishaki diui; utetemalaki mbatela lu tena di’ololo la tena dia kolo.” (2 Timote 4:2) Dikambo sɔ mendanaka la wetshelo wa l’etei ndo wa l’andja k’etshumanelo. Lo mɛtɛ, olimu w’esambishelo nɔmbaka akambo efula, koko aha mbewoya tsho losango laki Nzambi ko pe. Wetshelo w’oshika wekɔ ohomba dia wanɛ wayasha koma ambeki.
2 Tekɔ lo sɛna lo ‘tena dia pâ dia wolo mbikikɛ.’ (2 Timote 3:1) Anto wambonganyiyama l’awui wa filozofi ndo la wetshelo wa kashi. ‘Timba t’anto efula tekɔ wodjima oto’ ndo wekɔ ‘akanga a lonyu.’ (Efeso 4:18, 19) Amɔtshi wakayatshatsha la lonyangu. Eelo, anto ‘wambɔkɔmɔ ndo wambohandjɔnɛ oko ɛkɔkɔ waha l’elami.’ (Mateu 9:36) Koko, naka sho kamba la yewo yaso ya ndakanya, kete tayokimanyiya anto w’ɛlɔlɔ dia vɔ tshikitanya nsɛnɔ yawɔ.
Embetsha l’atei w’etshumanelo
3. (a) Olimu waki Yeso wa ndakanya mendanaka nto la dui diakɔna na? (b) Waa na wele ntondotondo l’ɔkɛndɛ wa mbetsha l’atei w’etshumanelo?
3 Lo mbekaka l’anto Bible lawakawɔ, miliyɔ y’anto wekɔ lo nongola wetshelo wɛdimi la wɔ. Koko, l’ɔkɔngɔ wa vɔ batizama, anto asɔ mongaka l’ohomba w’ekimanyielo ka lâdiko dia vɔ ‘mbika edio ndo monga l’etshina k’ɔlɔlɔ.’ (Efeso 3:17) Lam’akambaso olimu wakatosha Yeso wɔkɔndwami lo Mateu 28:19, 20, ndo walɔmbɔlaso eyoyo oya l’ɔlɔngɔswamelo wa Jehowa, vɔ kondjaka wahɔ oma lo woho wetshamawɔ l’atei w’etshumanelo. Lo ndjela Efeso 4:11-13, apami wakasɔnama dia kamba oko ‘elami ndo embetsha dia mingolaka ekilami woho wa vɔ mbeya mpika demba dia Kristo.’ Mbala mɔtshi, yewo yawɔ ya ndakanya mbalɔmbaka dia vɔ ‘mingola anto, mbahangwɛ ndo mbalaka la lotutsha.’ (2 Timote 4:2) Olimu w’embetsha waki ohomba efula, diɔ diakɔ diele lam’akandafundɛka Ase Kɔrɛtɔ, Paulo akatɛkɛta di’embetsha oma lâle apɔstɔlɔ l’amvutshi.—1 Koreto 12:28.
4. Ngande watokimanyiya dikoka dia ndakanya dia sho kitanyiya dako dia Paulo dia lo Heberu 10:24, 25?
4 Aha Akristo tshɛ mbele dikumanyi kana emendji. Koko, anto tshɛ keketshamaka dia tɔmbɔshana ‘lo ngandji ndo l’elimu w’ɔlɔlɔ.’ (Heberu 10:24, 25) Ntsha ngasɔ lo nsanganya nembetshiyaka nto mbisha kɔmatɛrɛ yɔlɔngɔswami ndo y’oma k’ɛs’otema yakoka mbodia ndo keketsha anto akina. Apandjudi wa Diolelo wambohokɔ akambo mbeyaka nto ‘tshutshuya anto l’elimu w’ɔlɔlɔ’ lo mbishanaka tokanyi la wanɛ wêke eyoyo lam’atombawɔ l’olimu w’esambishelo. Lo tena dia ngasɔ ndo lo tshakitudi, wetshelo w’ɔlɔlɔ kokaka mbishama. Oko ɛnyɛlɔ, Bible nɔmbaka wamato wambotshunda dia monga ‘embetsha w’akambo w’ɔlɔlɔ.’—Tito 2:3.
‘Vɔ sɛngiyamaka dia mbetawɔ’
5, 6. (a) Lo na otshikitanyi Lokristo la mɛtɛ l’ɔtɛmwɛlɔ wa kashi na? (b) Woho akɔna wakimanyiya dikumanyi anto wêke eyoyo dia vɔ mbɔsa tɛdikɔ t’amɛna?
5 Lokristo la mɛtɛ tshikitana efula l’ɛtɛmwɛlɔ wa kashi, wɛnɛ wele efula kawɔ nyangaka dia nɔmbɔla tokanyi t’anto awɔ. Lam’aki Yeso lanɛ la nkɛtɛ, ewandji w’ɛtɛmwɛlɔ wakayangaka dia ndjela oseka kiambokambo tshɛ yakatshaka anto lo mbadjɛ ɛlɛmbɛ washidi. (Luka 11:46) Mbala efula, ngasɔ mbakatshaka ɛlɔmbɛdi wa lo Lokristokristo.
6 Koko, ɔtɛmwɛlɔ wa mɛtɛ, kɛdikɛdi ‘olimu w’ekila’ wakambaso l’‘ekanelo ka lomba.’ (Romo 12:1) Ekambi wa Jehowa ‘sɛngiyamaka dia mbetawɔ.’ (2 Timote 3:14) Mbala efula, wanɛ walɔmbɔla mbeyaka shikikɛ alako amɔtshi dia nɔmbɔla etshumanelo dimɛna. Koko, lo dihole dia mbɔsɛ anyaso Akristo tɛdikɔ, dikumanyi mbaetshaka ‘woho wa tshikitanya ɔlɔlɔ la kɔlɔ.’ (Heberu 5:14) Oyango wa ntondo watsha dikumanyi ngasɔ ele dia ndesha etshumanelo ‘oma l’ɛtɛkɛta wa mbetawɔ ndo oma lo wetshelo w’ɔlɔlɔ.’—1 Timote 4:6.
Oyalamake lo wetshelo ayɛ
7, 8. (a) Kakɔna kakimanyiya anto wele l’akoka wasungana dia vɔ kamba oko embetsha na? (b) Kakɔna kɛnya ɔnɛ onto l’onto la dia ntsha la wolo dia koma ombetsha wa manamana na?
7 Nyɛsɔ tɔtɛkɛtɛ nto di’olimu aso wa mbetsha anto. Onde vɔ tɔlɔmbaka dia monga l’akoka amɔtshi wa lânde, mbɔtɔ kalasa lo yɛdikɔ mɔtshi, dia mbeya kamba olimu ɔsɔ? Atonga na. Mbala efula, olimu ɔnɛ wa wetshelo wakambema l’andja w’otondo wekɔ lo ntshama oma le anto k’anto wele l’akoka waha kawotake. (1 Koreto 1:26-29) Paulo ate: “Keli shu teko la diango ne dia mumba [olimu] lu dikitshelu dia kete [alemba w’ekokele], ne dia wuki a wulu utamanya ayali uma le [Nzambi], aha uma le su shame.” (2 Koreto 4:7) Etombelo w’ɔlɔlɔ efula wakondjama oma l’olimu w’esambishelo ka Diolelo wasalema l’andja w’otondo mɛnyaka nkudu kele la nyuma kaki Jehowa!
8 Koko, olimu akɔ nɔmbaka di’onto tshɛ ntsha la wolo dia koma ‘okambi wahoke dui sɔnyi, walembetshiya akambo wa mɛtɛ lo yoho y’ɔlɔlɔ.’ (2 Timote 2:15) Paulo akakɔkɔmiya Timɔtɛ ate: “Uyalamaki, ulamaki ndu wetshelu aye. Utetemalaki lu akambu aso. Ne dia lam’ayuyutsha osoku, we ayuyashimbela, ndu we ndu wane wuka aui aye.” (1 Timote 4:16) Ko lâsɔ, ngande wakoka onto ndjalama lo wetshelo ande oyadi l’atei kana l’andja w’etshumanelo na? Onde dia ntsha dikambo sɔ paka onto monga l’akoka amɔtshi kana la toho tɔmɔtshi ta wetshelo?
9. Kakɔna koleki akoka wa lôtɔ ohomba na?
9 Lo Dako diande dia lo Dikona, Yeso akɛnya mɛtɛ woho wakandahotɔka toho tambetsha anto. Lam’akandashidiya la tɛkɛta, ‘anto wakatshikala enyɔ hwe lo menda yoho yande ya ndakanya.’ (Mateu 7:28) Lo mɛtɛ, ndoko onto l’atei aso lakoka mbeya ndakanya oko Yeso. Koko, dui sɔ hɛnya ɔnɛ dia monga ombetsha wa manamana, sho pombaka mbɛsa efula l’onyɔ. Lo ndjela Jobo 12:7, kânga ‘nyama ya lo ngelo’ kana ‘fudu ya l’olongo’ kokaka mbetsha aha la tɛkɛta! Oyadi diewo kana dikoka dia lôtɔ dia ngande diele laso, kɛnɛ koleki ohomba ele, ‘yoho y’anto weso,’ mbut’ate: waonga ndo mbekelo ya lo nyuma yele laso yakoka ambeki aso mbokoya.—2 Petero 3:11; Luka 6:40.
Ambeki wa dui dia Nzambi
10. Ngande wakasha Yeso ɛnyɛlɔ k’ɔlɔlɔ oko ombeki wa Dui dia Nzambi na?
10 Ombetsha w’ɔlɔlɔ w’Afundelo pombaka monga ombeki wa Dui dia Nzambi. (Romo 2:21) Yeso Kristo akasha ɛnyɛlɔ ka dimɛna efula lo dikambo sɔ. Lam’akandakambaka olimu ande, Yeso akashile kana akakɛnɛmɔlaka tokanyi tɔtɔnganɛ la kahende ɔtɔi k’abuku wa l’Afundelo wa Hɛbɛru.a Woho wakandeyaka Dui dia Nzambi akɛnama lam’akinde êke l’ɛnɔnyi 12, lam’akawotani ‘odjashi l’atei w’embetsha ahokamɛ ndo awaoka wembola.’ (Luka 2:46) Lam’akandole, Yeso aki la mbekelo ka ntshɔka lo shinangɔnga, lɛnɛ akawadiaka Dui dia Nzambi.—Luka 4:16.
11. Naa dionga di’ɔlɔlɔ diendana la wekelo diahomba monga l’ombetsha?
11 Onde wɛ ekɔ ombadimbadi wa Dui dia Nzambi? Paka lo ditshimola mbakoka onto ‘mbeya elɛwɔ mboka Jehowa wɔma ndo mbishola ewo ka mɛtɛ kaki Nzambi.’ (Tukedi 2:4, 5) Omalɔkɔ, onga la mbekelo y’ɔlɔlɔ ya wekelo. Kôtshake la wolo dia mbadiaka tshinyi mɔtshi y’Afundelo lushi tshɛ. (Osambu 1:2) Onga la mbekelo ka mbadiaka numɛlɔ tshɛ ka Tshoto y’Etangelo ndo Réveillez-vous! kam’alongolɛ. Yelaka nsanganya ya l’etshumanelo la yambalo tshɛ. Eka woho wa tshaka eyangelo dimɛna. Lo mbeka woho ‘wa mbidja akambo tshɛ l’ɔnɔngɔ,’ wɛ kokaka mbewɔ di’aha ndekaka tshɔbɔla ndo ayetshaka anto akambo wokɛma hwe.—Luka 1:3.
Tôke wanɛ wetshaso ngandji ndo tâlɛnya
12. Naa dionga diaki la Yeso tsha le ambeki ande?
12 Dui dikina di’ohomba ele monga la dionga di’ɔlɔlɔ otsha le wanɛ wetshayɛ. Afarisɛ wakokaka wanɛ wakahokamɛka Yeso kɛlɛ. Vɔ wakate ɔnɛ: “Keli ului w’antu [ɔnɛ] waheyi elembe, wambudjama mananu.” (Joani 7:49) Koko Yeso aki la ngandji ndo la dilɛmiɛlɔ di’efula otsha le ambeki ande. Nde akate ate: “Dimi hanyeti ntu nti: Ekambi, ne dia ukambi heyi katsha uwandji andi. Keli dimi lambunyeta nti: Engenyi, ne dia lambunyewoya akambu tshe wakamuki le Papa.” (Joani 15:15) Dui sɔ mɛnyaka nganɛ wahomba ambeki wa Yeso tetemala l’olimu awɔ wa wetshelo.
13. Ngande wakɔsaka Paulo anto wakandetshaka?
13 Oko ɛnyɛlɔ, Paulo aki la diokanelo di’ɔlɔlɔ efula lasande l’ambeki ande. Nde akatɛ Ase Kɔrɛtɔ ate: “Kuyanga nyu nyeko la elombodi waheyama mbala le Kristu, nyu kema la washenyu efula, ne dia le Kristu Jesu kakamanyuti lu lukumu l’ololo.” (1 Koreto 4:15) Mbala efula, Paulo akakɛdiaka ndo asɔi lam’akandalakaka wanɛ wakandetshaka! (Etsha 20:31) Nde aki la lotutsha l’efula ndo l’ɔlɔlɔ w’otema. Diɔ diakɔ diakandakoke mbutɛ Ase Tɛsalɔnika ɔnɛ: “Keli shu taki la memakana l’atei anyu, uku atûmbaka wali an’andi.”—1 Tesalonika 2:7.
14. Lande na ekɔ ohomba ndjasha efula le ambeki aso wa Bible? Sha ɛnyɛlɔ.
14 Onde wɛ mbokoyaka Yeso la Paulo? Ngandji k’oshika kokaso ambeki aso tokimanyiyaka dia sho nɛndja munga tshɛ kele laso kendana l’akoka aso wa lôtɔ. Onde ambeki aso wa Bible ndjaokaka dia sho mɛtɛ ndjashaka l’otema ɔtɔi le wɔ? Onde sho mbɔsaka yema ya wenya dia mbaeya dimɛna? Lam’akɛnyi kadiyɛso kɛmɔtshi ɔnɛ ombeki ande wa womoto hahame lo nyuma, nde akawombola la loshilambo tshɛ ate: “Onde ekɔ dui dimɔtshi diakokiyanya?” Womoto ɔsɔ akamɛ mbodihwɛ otema ndo akɔkɔndɔlɛ akambo tshɛ wakonyangiyaka ndo wakokiyanyaka. Mama kɛsɔ akangɛnangɛna sawo diawɔ dia ngandji sɔ woho w’anyanya. Lo tena dia ngasɔ, ekɔ ɔlɔlɔ kamba la tokanyi t’oma l’Afundelo ndo l’ɛtɛkɛta washa esambelo ndo wakeketsha. (Romo 15:4) Têye dia: Ombeki ɔmɔtshi wa Bible kokaka pama esadi esadi, koko ondo nde ekɔ la lɔkɛwɔ lɔmɔtshi lahombande tshika lahɔtɔnɛ la l’Akristo. Ɔnkɔnɛ, bu dimɛna mbowɔtɔ lo demba oko kanga tshungu. Tatotambake elelo w’Akristo.—1 Koreto 15:33.
15. Ngande wakokaso mɛnya ɔnɛ sho nɛmiyaka ambeki aso wa Bible?
15 Nɛmiya ambeki aso, nembetshiyaka nto aha sho ndjatambiya tshavu lo nsɛnɔ yawɔ. (1 Tesalonika 4:11) Oko ɛnyɛlɔ, mbeyaka monga ko tekɔ lo mbeka la womoto ɔmɔtshi lodjashi la pami kahûtshuki lo ndjela ɛlɛmbɛ wa lɛɛta. Ondo wambota ndo ana. Ɔnkɔnɛ, oko wambondokondja ewo k’oshika kaki Nzambi, womoto ɔsɔ olanga mbidja akambo l’ɔnɔngɔ lam’asande la Jehowa. (Heberu 13:4) Onde nde pombaka tshukana l’onto ɔsɔ kana kakitɔna la nde? Ondo sho mbeyaka fɔnya ɔnɛ tshukana l’onto lahayasha l’akambo wa lo nyuma mbeyaka ndjonga wekamu lo ehamelo kande ka lo nyuma lo nshi yayaye. Lo wedi okina, sho mbeyaka mɛna ɔlɔlɔ vɔ tshukana di’aha ana ndjɛna pâ. L’oseka dikambo tshɛ kema ɔlɔlɔ ndjatambiya lo lɔsɛnɔ l’ombeki aso wa Bible ndo nyanga mbofundɛ dia nde mbetawɔ kanyi yaso. Kɛnɛ kahombaso mbeya ele ndamɛ mbahomba mɛmba wotsho w’etombelo wa yɛdikɔ yande. Onde hatoleka ɔlɔlɔ ndowanya ombeki ɔsɔ dia nde kamba ‘l’ekanelo kande ka yimba’ dia nde ndjaɔsɛ yɛdikɔ ndamɛ?—Heberu 5:14.
16. Ngande wakoka dikumanyi mboka ɛkɔkɔ ngandji ndo mbalɛnya?
16 Ekɔ ohomba efula dikumanyi dia l’etshumanelo mbokaka ɛkɔkɔ ngandji ndo mbalɛnyaka. Lam’akandafundɛka Filɛmɔna, Paulo akate ate: “Kuyanga dimi la dihunga efula le Kristu dia nkosengola dia we ntsha dikambu diusunganyi, keli layukosengasenga ne dia ngandji kakukami.” (Filemona 8, 9) Tena dimɔtshi, awui wa nyangu mbeyaka tomba l’etshumanelo. Wonya ɔmɔtshi, ekɔ ohomba monga awui wolo. Paulo akakɔkɔmiya Tito dia nde ‘pangwɛ [atshi wa kɔlɔ] wolo, dia vɔ monga nge lo mbetawɔ.’ (Tito 1:13) Kânga la ntondo k’awui wa ngasɔ, emendji pombaka menda ɔlɔlɔ di’aha tondjɛ etshumanelo ɛtɛkɛta wa lonyangu. Paulo akafunde ate: “Ukambi wa Khumadiondjo hahumbi ndjala la tamu, keli ayali la memakana le antu tshe, lama mbetsha antu, ayali la wolamu.”—2 Timote 2:24; Osambu 141:3.
17. Munga kakɔna kakatshe Mɔsɛ, ndo wetshelo akɔna wakoka kondja dikumanyi oma lɔkɔ?
17 Emendji pombaka mbohɔka nshi tshɛ ɔnɛ ‘ɛkɔkɔ waki Nzambi’ mbalɔmbɔlawɔ. (1 Petero 5:2) Kânga mbakinde l’okitshakitsha, Mɔsɛ akayohɛ dui sɔ etena kɛmɔtshi. As’Isariyɛlɛ “wakahindja utema andi, ku ndi akatundja aui waki kunkuka l’elomo andi.” (Osambu 106:33) Nzambi kɔngɛnangɛna kânga yema yoho shɔ yakandatshela ɛkɔkɔ Ande, kânga mbele mɛtɛ vɔ wakakoke pangwemɛ. (Walelu 20:2-12) Ɛlɔ kɛnɛ, lam’ahomana dikumanyi l’ehemba wa ngasɔ, vɔ pombaka ntsha tshɛ dia ndakanya ndo mbetsha la yimba ndo l’ɔlɔlɔ w’otema. Anangɛso l’akadiyɛso ngɛnangɛnaka efula lam’awatshelawɔ akambo la dilɛmiɛlɔ tshɛ ndo oko anto wele l’ohomba w’ekimanyielo koko aha oko atshi wa kɔlɔ wahayokoka mingɔma. Dikumanyi la dia monga la kanyi y’ɔlɔlɔ yaki la Paulo lam’akandate ate: “Shu teko la elungamelu le Khumadiondjo dikambu dianyu, shati: Nyu nyatutshaka ndu nyayutshaka akambu wanyutelasu.”—2 Tesalonika 3:4.
Tokotsha ehomba awɔ
18, 19. (a) Ngande wakokaso kotsha ehomba w’ambeki wele bu l’akoka w’efula? (b) Ngande wakokaso kimanyiya ambeki wele l’okakatanu l’awui amɔtshi weyama?
18 Ombetsha w’ɔlɔlɔ mbɔtɔnganyiyaka wetshelo ande l’akoka wele l’ombeki ande. (Ɛdika la Joani 16:12.) Lo wɛɛla wa Yeso wa talata, owandji akasha ‘onto l’onto diɛsɛ diɔtɔnganɛ l’akoka ande.’ (Mateu 25:15) Sho kokaka ndjela ɛnyɛlɔ kɛsɔ wonya wekaso Bible. Lo mɛtɛ, ekɔ dimɛna shidiya mbeka dibuku diɔmbɔla awui wa Bible lo etena k’ɔlɔlɔ ndo ka mondo. Koko, pombaka mbeya dia aha anto tshɛ mbele l’akoka w’ɔlɔlɔ wa mbadia kana wa kimɛ awui esadi esadi. Omalɔkɔ, shɛnɔdi yekɔ ohomba lam’alangaso mimɔ oma lo dikambo dimɔtshi otsha lo dikina naka wanɛ weka la so wekɔ ɛtɛ wetsho. Lo dihole dia tshɔ lowango lowango, kɛnɛ koleki ohomba ele kimanyiya ambeki dia vɔ mana akambo wekawɔ fundo.—Mateu 13:51.
19 Kɛsɔ mbakokaso mbuta ndo lo dikambo di’ambeki wa Bible wele l’okakatanu l’awui amɔtshi wa lânde, ɛnyɛlɔ oko dia Losato Losanto kana fɛtɛ ya l’ɛtɛmwɛlɔ. Kânga mbele bu ohomba efula mbidja tokanyi t’oma l’abuku akina lam’awekaso l’ambeki aso, tena dimɔtshi sho mbeyaka sala dikambo sɔ naka tokanyi takɔ tayonga ohomba efula le wɔ. Ekɔ ohomba monga la shɛnɔdi y’ɔlɔlɔ di’aha ndjokawoya ombeki ɛkɔngɔkɔngɔ lo dihole dia nde pama.
Ongaka la wangasanu!
20. Ngande wakasha Paulo ɛnyɛlɔ lo monga la wangasanu ndo l’eshikikelo lo wetshelo na?
20 Paulo ate: “Nyohetaki ngaingai la nyuma.” (Romo 12:11) Eelo, oyadi tekɔ lo nɔmbɔla wekelo wa Bible kana tekɔ lo mbisha dako dimɔtshi lo losanganya la l’etshumanelo, sho la dia monga l’ohetoheto ndo la wangasanu. Paulo akatɛ Ase Tɛsalɔnika ate: “Ne dia lukumu l’ololo lakayi le nyu, aha la diui tu, keli ndu lu wulu wa Nyuma [k’ekila], ndu la mbetawo ka wulu.” (1 Tesalonika 1:5) Paulo l’asekande wakasha anto ‘aha lokumu l’ɔlɔlɔ loto, koko ndo anima [awɔ] hita.’—1 Tesalonika 2:8.
21. Ngande wakokaso mbetshaka la wangasanu lam’akondjaso diaaso dimɔtshi?
21 Sho mongaka la wangasanu wa mɛtɛ etena kayashikikɛso ɔnɛ ambeki aso wa Bible wekɔ lo nomɔlomɔ dia mboka awui wakatalɔngɔsɔdi dia mbatɛ. Katetshake anto la saki tshɛ koko aha oko mashinyi mbawaetsha. Lo dikambo sɔ, Ɛzɛra akadjaka yimba lo wetshelo ande. Nde “akadji utema andi dia mbeka la ntsha elembe wa [Jehowa], mbetsha elembe ako la andjangu l’atei wa Isariyele.” (Ezera 7:10) Sho pombaka ntsha ngasɔ lo ndjalɔngɔsɔlaka dimɛna ndo mɛnya nganɛ woyalɔngɔsɔdiwɔ lo ndjela ohomba wele l’awui wataso. Tɔlɔmbɛ Jehowa dia nde tolodja la mbetawɔ ndo l’eshikikelo. (Luka 17:5) Wangasanu aso kokaka kimanyiya ambeki aso wa Bible dia vɔ nanga akambo wa mɛtɛ l’otema ɔtɔi. Lo mɛtɛ, mbidja yimba lo wetshelo aso mbeyaka tɔlɔmba nto dia monga la toho tɔmɔtshi ta lânde t’olakanyelo. Lo sawo diayela, mbayotɛna toho tɔmɔtshi.
[Footnote]
a Enda lo Vɔlimɛ 1, ya Étude perspicace des Écritures, lɛkɛ 771, dibuku diakatondjama oma le Watch Tower Bible and Tract Society of Pennsylvania.
[Caption]
[Footnote]
[Caption on page 12]
[Review on page 12]
Onde wɛ akohɔ?
◻ Bonde keso l’ohomba w’embetsha wa tomanamana ɛlɔ kɛnɛ na?
◻ Naa mbekelo y’ɔlɔlɔ ya wekelo yahombaso monga layɔ?
◻ Lande na ekɔ ohomba mboka wanɛ wetshaso Bible ngandji ndo mbalɛnya na?
◻ Ngande wakokaso kotsha ehomba w’ambeki aso wa Bible?
◻ Lande na ekɔ ohomba monga la wangasanu ndo l’eshikikeko lam’etshaso anto akina?
[Caption]
[Questions]
[Caption on page 8]
[Caption on page 8]
Embetsha w’ɔlɔlɔ wekɔ vamɛ ambeki wa Dui dia Nzambi
[Caption on page 11]
[Caption on page 11]
Yashaka le ambeki ayɛ wa Bible