Toyasha le anto akina—Lo mendaka ampokami aso dimɛna
1 Lam’asambishaso lo ahole w’anto efula ndo lo luudu la luudu, tena efula sho mendaka ompokami aso la ntondo ka sho tatɛ tɛkɛta. L’etena ka mondo kɛsɔ, oma lo ɛnamelo kawɔ ka lo elungi, sho koka mbeya kanyi yawɔ, mbuta ate mbeya kana vɔ ngɛnangɛnaka kana hawɔngɛnangɛna oyelo aso. Woho akɔ wâmɛ mbakokawɔ mbishola akambo efula lo dikambo diaso. Lo kɛnɛ kendana l’Ɔmɛnyi wa Jehowa ɔmɔtshi wakatshu towenda, mama kɛmɔtshi akate ate: “Kɛnɛ kohɔmi lo dikambo di’ɔmɔnɔmɔnɔ waki lande l’elungi ele nde aki la ki ka lo yimba. Dui sɔ diakakotola yambalo yami.” Kɛsɔ mbakasha mama kɛsɔ diaaso dia nde mpokamɛ lokumu l’ɔlɔlɔ.
2 Mendaka ampokami aso tokimanyiyaka dia sho tatɛ sambisha etena kasambishaso lo toshinga kana l’ahole akina watanema anto efula. Ɔnangɛso ɔmɔtshi akendaka wanɛ wakayasukanaka oya le nde. Lam’akandahomanyaka la wɔ washo, nde akamɔnamɔnaka, ko l’ɔkɔngɔ diko, akawashaka periodikɛ. Lo salaka ngasɔ, nde akasawola dimɛna la anto efula ndo akasha anto ekanda efula.
3 Toshole tokanyi t’anto akina: Mendaka ampokami aso ayotokimanyiya dia sho mbishola tokanyi tawɔ. Ɛnyɛlɔ, naka onto hoki kɛnɛ kotshiso dimɛna kana hetawɔ kɛnɛ kotshiso, kete kɛsɔ ayɛnama oma lo elungi kande. Naka nde ekɔ la olimu kana ekɔ prɛse, kete tayoshola akambo asɔ tshɛ oma lo elungi kande. Ɔnkɔnɛ, sho koka susa, kana nyomotaloya sawo diaso lo ndjela kɛnɛ kayotɛna. Mbidja yimba lo tokanyi t’anto akina ekɔ yoho ya dimɛna yakokaso mɛnya dia sho ndjashaka le wɔ.
4 Ndjasha l’otema ɔtɔi ndo la dietawɔ: Lo mbekelo y’anto efula, mendaka ompokami ayɛ mɛnyaka ɔnɛ wɛ ndjashaka l’otema ɔtɔi le nde. Tende woho wakakadimola Yeso lam’akawombola ambeki ande vate: “Akona ayeya nshimbamela?” Bible mbutaka ɔnɛ: “Jesu akawaende tee, akati ati: Antu haweyi ntsha dikambu so, keli [Nzambi] mbeyaka ntsha akambu tshe.” (Mat. 19:25, 26) Aha la tâmu, leendo laki Yeso la la dietawɔ lakakimanyiya dia vɔ mbetawɔ ɛtɛkɛta ande. Yoho yakɔ yâmɛ mbele, mendaka ampokami aso dimɛna ayotokimanyiya dia sho mbewoya losango la Diolelo l’otema ɔtɔi ndo la dietawɔ.—2 Kor. 2:17; 1 Tes. 1:5.