Esambishelo ka l’andja w’otondo dia mbelɛ anto lo losanganya la distrikɛ lele l’ɔtɛ a dui ɔnɛ: “Etshungwelo kaya suke!”
Apandjudi wa lo tshumanelo tshɛ wayokahanya dikatshi dia leeta dia lânde
1 Tatɛ oma lo eleko kamɔnga akatshi ka lo 2006 lo lɛkɛ la nɔrdɛ polo ndo lam’ayoshila nsanganya ya distrikɛ yayosalema lo nkɛtɛ k’otondo, esambishelo ka lânde kayosalema dia mbelɛ anto lo nsanganya ya distrikɛ yayosalema lo wedja oko 155. Esambishelo ka lânde kɛsɔ mendanaka ndo la nsanganya ya weke ya lânde yayosalema la Allemagne, la République tchèque ndo la Pologne lo Ngɔndɔ k’esambele ndo lo lomingu la ntondo la Ngɔndɔ k’enanɛi 2006.
2 Lam’ele tekɔ lo nsɛna lo etena k’ekomelo ka nshi y’ekomelo, nsanganya yaka epole ɔsɛkɛ lo daka diaki Nzambi dia tshungola anto oma lo dikongɛ nɛ di’akambo dia kɔlɔ, yayonga dui di’ɔngɛnɔngɛnɔ efula le anto wele l’etema w’ɛlɔlɔ. Losango lɔsɔ layowatshutshuya dia kana yimba lo kɛnɛ kayosalema lo nshi yayaye. Dia miliyɔ y’anto kondja diaaso dia mboka losango lɔmɔtshi l’oma lo Bible lakeketsha ndo lasha elongamelo, tshumanelo ndekana 98000 di’Ɛmɛnyi wa Jehowa diambokeketshama dia mbelɛ anto la wangasanu tshɛ lo losanganya la distrikɛ layowɔtɔ.
3 Wayotomɛ tshumanelo ekanda k’ɔlɔlɔ k’akatshi wa leeta dia opandjudi tshɛ kondja yɛdikɔ y’akatshi wa leeta 50. Ambatshi mboka wa lo etshumanelo kokaka kamba la akatshi wa leeta wayotshikala. Lo etshumanelo tshɛ, esambishelo ka lânde kɛsɔ kayosalema mingu shato la ntondo ka losanganya la distrikɛ layɔtɔ etshumanelo kawɔ. Kɛsɔ ayosha apandjudi etena k’efula ka vɔ kindjakindja ɛtshi ka nkɛtɛ k’otondo k’etshumanelo kawɔ kana etenyi ka woke.
4 Lo dihole tshɛ, ekɔ ohomba mbisha ompokami tshɛ dikatshi diande dia leeta lo anya. Koko, naka anto amɔtshi bu lawakawɔ, kete kokaka mbaɔmɔyɛ akatshi awɔ wa leeta lo asoko awɔ aha la kotola yambalo y’anto akina. Pombaka mbidja welo efula dia kahanya akatshi wa leeta lo mingu shato shɔ.
5 Oma lo welo wayodjama dia mbelɛ anto lo losanganya la distrikɛ lele l’ɔtɛ a dui ɔnɛ: “Etshungwelo kaya suke!” lɔkɛtshanyemi lo sawo nɛ, tekɔ la eshikikelo dia esambishelo ka diambo kayoshama lo andja w’otondo. Tambɔlɔmba Jehowa dia nde tshɔkɔla welo wayonyodja lo esambishelo ka lânde kɛsɔ kayosalema lo andja w’otondo.